Gálatas 4
4
1Dá'maq 'neeta dá'maq shinac 'neetasa': Ca ñaalec no'm qaỹahotaque taalec ca lesallaxa ca leta'a, qam no'm ñaqai noctoqui', ca ca'maxare 'nejem ca chi nelaatec, 'eno'm llic quiyim lalamaxaret cá'ogue. 2Qam 'ue na qom cochiitapega so'maxare, chaqai idaanteguelec dá'maq no'ueenataxac so'maxare, chi ỹovireta'a ca na'xa'a laloqojnec so leta'a. 3Ca' chaqaida 'neeta coqomi'. Ma' na' 'ec ñaqai qomi' ñaaqolqai', ca qomi' qolqata'ueguelo naua chaqai qom la'deenataxanaxaco hueesalec na 'laua. 4Qam na' ỹovita ca laloqo', ca' ñi qota'a nela' so llaalec, ne'qaañi nqai'en caso 'aalo, chicqotougui nqai'en na judioipi ma' hueetaugui da lapaxaguinataxanaxac na naqataxaquipi. 5'Neeta dajo na' novi', ma' ỹahotaque ỹosou'alo qomi' queda lcoñiitaxanaxac na naqataxaquipi, qaiyi ñi qota'a icoñi'chiguita qomi' quiyim ỹaatqajam qomi' lalamaxarete' llaalqa.
6Ca' na' ichoxot ñi'maxare quiyim mashic qamiri llaalqa, ca' nelatalo qamiri so ne'Espíritu so llaalec quiyim tauguilo naua re'taxanatahi. Ca só'maq Espíritu roỹaxan, 'naacsa': “¡Qami' qota'olec!” 7Ca vichiguiño' nagui, ca' ỹaatqajam qami' llaalec ñi qota'a, ca totqai qami' na'ac. Ca ma' mashic qami' llaalec, ca ñi qota'a ỹaanem qami' ma'le ná'ogue ná'maq hueeto'ot ỹachaxantac, chicqochigui nqai'en so Cristo.
So Pablo ỹaatqajam 'ue da leuogoxo quena mashic icoñiguit da na'qaatec
8Quesom na' saqa' huañiỹapega ñi qota'a, ca' qamiri icoñiiteguese' ná'maq se re'xogui qanqouagaxaintacot, qam mese qota'olqaipi. 9Qam nagui mashic huañiỹa ñi qota'a, qam paguec la'maxa quiyim qohinac, ñi qota'a mashic ỹauanalo qamiri, ca ¿negue' quet cá'maq 'neeta quiyim lotqai pillii'ogalo quet naua napaxaguinataxanaxaco qaica ca lquesaxanqa', chaqai qaica ca 'netegue quiyim lotqai liỹa 'guiñiỹoto quiyim liỹa qamiri loiquenatqa? 10Ma' qamiri ñaqai 'viichitac quena' ỹovire'ga yi na'xa'a, shiriguiri, chaqai naua ñaxari. 11Ca 'xoic da ỹoqolonaxa quiyim dá'maq ỹo'ueenataxanaxac qaica ca 'negue caqamiri.
12Qamiri ỹaqaỹa', ñi'xoresentouguilo qamiri quiyim 'ñiita maỹim, ma' ỹim shinta maqamiri. Mesqai 'ec quiyim 'ue quet ca sauaxachii caỹim. 13Ma' qamiri mashic shi'gue 'yiiñii dá'maq 'neeta, na' 'aueta sa'xat caqamiri da na'qaatec chicqaugui da nca'laxa. Shi'ntegue na'le dajo, ma' sauaxat 'ue ca hueetailec yalolaxa. 14Qam na' 'ue cajo yalolaxa, qam chi ñi'guenaxat. Qam mesqaida quiyim sqai coñiguit quet aỹim chaqai mese liỹoxoỹa'piguit aỹim. Ta'ta'a quiyim 'ñiita'gue aỹim ca chicqashiguim lelaatec ñi qota'a; 'ñiita'gue quiyim 'ec chaqaỹim só'maq Jesucristo. 15Ca ¿negue' cá'maq taico' na'le cajo netoonaxaguii? Ca' ỹim seshit quiyim so'uet ca ỹa'qaatec 'maxaraic caqamiri, 'neetasa': quetaxan qaishito' quiyim naqachii' naua chi nqochiri, ca 'ỹaañim aỹim, ca 'ec sqaica quet ca lqalaic. 16Ca' nagui, ca ¿'eco' qamiri ñpa'guenaxaua', quiyim ỹaatqajam llic dá'maq shinac caqamiri?
17Ca' najo qomyipi ỹaatqajam 'xoic da naquitaxac caqamiri, qam se no'uen da 'neeta'pegue. Ma' dá'maq ỹahotaque quiyim ỹoỹoote'ogalo qamiri coqomi', ca' qaiyi ma'le, ca' pacqajñiỹauec naua'maxare. 18Hua' 'nesa, ma' lo'yaxanec quiyim qanaquita'a ca niỹa. Qam quiyim 'maxaraic cá'maq qohinta'pegue, ca' qoyiquetalec, qam mesqaidaata quena' salequetauguilo qamiri. 19Qamiri ỹaalqolqa, lotqai liỹa sovirau'a da nqui'ic caqamiri, shintari' aca 'aalo quena' shim ne'qaañi ca llaalec; qam shiquetalco' da i'xoric, vire'to' ma' nalogoñi quiyim 'ñiitari' so Cristo. 20¡Saxanchi' salequetauguilo qamiri nagui, qaiyi ỹoqa'a ca seloxoỹaxane'tegue ca sa'xat quiyim salequetauguilo qamiri, ma' ỹim ỹaatqajam tot sa'den ca shinta caqamiri!
Qaraloqojnaxañigui aso Agar chaqai aso Sara
21Ma' qamiri viitaque quiyim 'guiñiỹot na naqataxaquipi chicqo'ot so Moisés, ñigo' ñaqai choxochim dajo: ¿Peeta'a sqa 'yiiñii dá'maq reloqo'tegue da 'naac dajo naqataxaquipi? 22Ma' 'naac quiyim so Abraham dooso' saua llaalqa: so 'óna llaalco' aso la'a, ca' so liỹa llaalec asó'maq lalamaxarete loua, ca so'maxare se na'á. 23Da ne'xaỹoqsoxoc so llaalec aso na'á ỹaatqajam chaqaida dá'maq ne'xaỹoqsoxoc ná'ogue ná'maq re'qoochigui ñaaqaipioqui'. Qam co'na' ne'qaañi só'maq llaalec aso se na'á, ca' ipaquichigui dá'maq ỹachaxantac na'le ñi qota'a. 24Ca' dajo, chi qaraloqojnaxañigui. Saua dos 'aalo ñiguilo nqohine' saua dos 'maqataxaco. 'Óna so quesaua 'deenaxaco ñigui nqohin aso quemaralec ladocai leenaxat Sinaí, ca' chaqaso só'maq ñigui nqohin aso Agar. Ca ná'maq hueetaugui sojo 'maqataxac ne'qaañi, qam tai'a quiyim na'ac. 25Ma' aso Agar ñigui nqohin aso quemaralec ladocai leenaxat Sinaí na'ñi yi Arabia. Ca' chaqaso asó'maq ñigui nqohin yí'maq Jerusalén nagui, ma' yijo na'a' nagui 'neetari' aca na'á, chaqai qai'neeta ná'ogue na llaalqaipi. 26Qam se na'á yí'maq Jerusalén hueeta'gue da piguim, ca' qomi', qomi' llaalqa yi'maxare. 27Ma' naua naneresañi la'qaatqa ñi qota'a 'neracsa':
Ỹaatqajam ra'maqaichiriñi qami' 'aalo ma' se co'ii', qami' ma' sqaica ca qachaalqui';
ỹaatqajam raualqai' ma'le queda netoonaxaqui', ma' qami' sqai huañirapega ca nqui'ic quiyim co'ii'.
Ma' cá'maq 'aalo nalate paguec ma'le ca llaalqaipi,
mesqai 'nejem aca 'aalo 'ue ca loua.
28Qamiri ỹaqaỹa', qomi' llaalqa ñi qota'a ỹachaxanta'pe na'le, shinqajam so Isaac. 29Qam chaqaido' dá'maq 'neeto' na'le, quiyim só'maq ñaalec re'qoochigui da ne'xaỹoqsoxoc, ỹaatqajam ỹocanac só'maq liỹa ñaalec chicqo'ot da ne'xaỹoqsoxoc so Espíritu Santo, ca' chaqaida dá'maq 'neeta nagui qai'neeta coqomi'. 30Qam ¿negue' cá'maq 'nerac nauá'maq naneresañi na'qaatqa? Naua'maxare 'neracsa': “O'yirauec añí'maq na'á chaqai ñi llaalec, ma' ñí'maq llaalec añí'maq na'á se ishit quiyim nouanau'a ná'ogue ná'maq ỹa'maqatañi quiyim lalamaxaret nqohin ñí'maq llaalec ñí'maq llaalec añí'maq se na'á.” 31Ca chaqaida, qamiri ỹaqaỹa', mesqai qomi' llaalqa asó'maq na'á. Ta'ta'a quiyim qomi' llaalqa asó'maq se na'á.
Currently Selected:
Gálatas 4: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.