Éxodo 2
2
Co'na' ne'qaañi so Moisés
1Ca 'uo' so ỹale chigoxougui so llaalqaipi so Leví. 'Uo' aso loua llaale só'maq qai'neeta chicqaugui so llaalqaipi so Leví. 2Ca 'mano' na'le aso'maxare, ca 'uo' so llaalec. Ca aso'maxare co'na' iuana so llaalec quiyim lo'yaxanec, ca ỹoxojño' quesaua tres shiriguiri. 3Qam co'na' tot ishit quiyim queeta ỹoxotetegueñi, ca' icono' aso nepaqata natal. Ca' ỹapoguilo naua lauaco quena qo'paq louaq, qaiyi se ca'laaho na huaxaỹaq. Ime, ca' inaxañigui aso nepaqato'lli' so noctoqui'. Ime, ca' illaugui so na'uaatesat quiyi lahi aso lachiugue leenaxat Nilo. 4Co'na'le 'naaco' casó'maq lqaỹa so noctoqui' quiyim no'ueenañi, qam se loỹootaque, qaiyi ỹauanchigui canchaqaica 'neeta so'maxare.
5Ca co'na' ncopauc, ca' aso llaale so Faraón quepegue' aso lachiugue nachilaxasom. Qam saua lelaata ñaq ỹouoxonsac na lahi aso lachiugue, ca aso'maxare iuantaxaso'ma aso nepaqata neetañigui ca na'uaatesat. Co'na'le, ca 'uo' aso ila' quesaua la'aa quiyim caqso'ma asó'maq nepaqata. 6Ca' aso llaale so Faraón co'na' ỹauajñigui aso nepaqata, ca iuanchi'ño' so noctoqui' noỹentac. Ca ỹaatqajam 'uo' da le'xorenataxanaxa queso'maxare. Ca 'naaco':
—Najo noctoqui' chicqaugui na hebreo laseripi.
7Co'na'le, ca só'maq lqaỹa so noctoqui' 'naaco' caso llaale so Faraón:
—¿Tegue' chaqai 'maxariñite' quiyim sedaanaque acá'maq cochiỹa na noctoqui' quena hebreo lasellipi, qaiyi illipaxan na'maxare?
8—Hua', daañiraque —'naaco' aso llaale so Faraón.
Co'na'le, ca asó'maq nequetegaxai ỹalamaxatau'a asó'maq chi late'e so noctoqui'. 9Co'na'le, ca 'naaco' aso llaale so Faraón:
—Coñita najo noctoqui', ỹaxachi'. Ca' ỹim seshiueten ma'le ca redaxaqui'.
Ca' aso 'aalo ỹodota so noctoqui', ca' iỹaxat. 10Ca co'na' mashic ỹeuc so noctoqui', ca' qaỹodou'a so noctoqui' aso llaale so Faraón. Ca aso'maxare ỹiro quiyim lalamaxaret llaalec. Ca ỹanco' leenaxat Moisés, loqo'm qanaqajshiguim, ma' 'naaco':
—Ỹim ñaqajta na'le sachigoxotañigui yi huaxaỹaq.
So Moisés 'eet, ca'e yi Egipto
11Ca co'na' mashic sham qo'xoic so Moisés, ca 'uo' so na'xa'a eec, ra'piichiu'ga so lqaỹaripi chi lauo' laseripi. Ca retano' quiyim chalego lquesaxanaxa da lo'ueenataxanaxac. Co'na'le, ca iuane'to' so Egipto le'ec ỹouaxantac so chi lauo' le'ec hebreo le'ec. 12Co'na'le, ca' 'au ỹomateta'pe naua lahil yi hueete'e. Ca co'na' qaica ca leseeca'a iuana, ca ỹalauato' so Egipto le'ec, ca ishinño' queca lo'uaxanaxa. 13Ca' queso liỹa nete'e, ca lotqai liỹa taauec. Ca iuane'talo' saua dos hebreo lase' nco'uaatecta'. Co'na'le, ca inato' só'maq ỹouaxantac so liỹa:
—¿Chi'negue ma' huaxañi'sac dá'maq ralamaxarichi' qauochi' le'ec?
14Ca só'maq hebreo le'ec 'naaco':
—¿Negue' cá'maq ỹanagui qami' quiyim qarelachi', chaqai quiyim 'ñirapegalo qomi' queca ỹa'maqachiguiñi chaqai queca se ỹa'maxañi? ¿Loqo'm vi'saque quiyim yalauachi', 'ñitetegue aỹim dá'maq 'ñitetegue na' lauachi' so Egipto le'ec?
Ca co'na' 'xaỹa dajo so Moisés, ca' 'ue da lqolonaxa, ma' retano' quiyim mashic qaỹa'den quiyim ỹalauat so Egipto le'ec. 15Ca' chaqaida 'neeto', ma' co'na' ỹa'den so Faraón quiyim so Moisés ỹalauat so Egipto le'ec, ca' relaataxan quiyim qaidaanaque so Moisés, ca' qaỹalauat. Qam so Moisés shi'co' 'eet, quepegue' yi 'laua leenaxat Madián. Co'na' ỹovita, ca nqa'xanño' quena lahi aso ni'ỹa.
16Ca' so letaxaỹaxanqajnec só'maq na'ñi yi Madián quiyim retaxaỹa'pegue' na nenatqaipi, so'maxare 'vio' saua siete llaale. Ca' queso na'xa'a, ca saua'maxare querepegue' aca ni'ỹa, ỹahosaque naviquishiguim na huaxaỹaq, ca ne'taxane' aso lalo qagreta so leta'a'. 17Qam qaỹo'derauco' quesauá'maq liỹa' neloxoỹa' cana qagreta. Ca co'na'le, ca ne'laxashiguim so Moisés, ca ro'ootaxanlgoto, ca ne'taxan so qagretaipi quena huaxaỹaq. 18Ca co'na' saua'maxare pilda'a ca neeta'ñi so leta'a', ca so'maxare renataxano':
—¿Negue' cá'maq 'neeto' ma' chita'gue, ca' liỹa novirita?
19Ca saua'maxare 'neraco':
—'Ue so Egipto le'ec ro'ootaxanlgoto qomi' queso liỹa neloxoỹaripi cana qagreta. Ime, ca' naqajshiguim na qari'llivioxot, chaqai ne'taxan na qagretaipi.
20Co'na'le, ca' so Reuel inate'o' saua llaale:
—¿Negue' ca hueeta'gue cajo ỹale? ¿Chi'neco' ma' no'ueenaqchiỹañi nodaatec nqai'ñii? ¡Mohi, ỹaxañii'oga, qaiyi naho'quena, ca' que'e!
21Ca' so Moisés saat quiyim na'ñi yi la'a' so Reuel, ca' so Reuel ỹo'naxañiguito' aso llaale leenaxat Séfora. 22Ca so'maxare 'uo' so llaalec, ca' so Moisés ỹanco' leenaxat Gersón, loqo'm ỹoqa'a ca chicqa'gue, ma' 'naaco':
—Ỹim ỹoqa'a ca sachicqa'gue quenajo 'laua sentalec nagui.
23Ca co'na' mashic 'vii saua ñaxari, ca ileuo' so nashi quiyi Egipto. Qam so llaalqaipi so Israel ñaqai queeta nqohin da le'xoric, ma' na'aquipi. Co'na'le, ca' ñi qota'olec 'xaỹa da noỹenaxac. 24Ca na'xaỹaxana da rashiilaxantaque, ma' no'ueena'co' da na'maqataxaco' na'le queso Abraham, Isaac chaqai so Jacob. 25Ca' ñi qota'olec iuana, ca' retan dá'maq 'neetari' so llaalqaipi so Israel.
Currently Selected:
Éxodo 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.