Efesios 6
6
1Chaqai qamiri ñaaqaipioqui', dá'maq 'neeta ma' mashic coñiguit da na'qaatec, ca na'xaỹaxañiỹalo naua qata'allii, ma' dajo dá'maq ỹaatqajam no'uen. 2Ma' dá'maq 'auaxaic na'le queso naqataxaquipi chicqo'ot so Moisés quiyim 'ue da qaỹachaxantac 'neetasa': “Se napaquiralec ca qataa'i' chaqai aca qachii'i', 3qaiyi ỹaatqajam qami' no'uen chaqai ladoc aca rqauaxagui'i' quena 'laua.”
4Chaqai qamiri ma' qamiri neta'al, sqai 'ooqochichii' caua qachaalaxahi. Ta'ta'a quiyim naquetashi'me' nqai'ñii da no'uen na'deenataxanaxac, paxaguiñita'gue quiyim huelec so qara'gaxala'.
5Chaqai qamiri nelaatqa na'xaỹaxañiỹa ca na'coori quenajo 'laua, se napaguiỹalec, richilli'a, raqamaxaita, shiquiaxam 'ueenataxañitacot so Cristo.
6Quiyim 'ueenataxañii, mese repaguitaque quiyim ỹa'ajanta'pe qamiri ca na'coori, qaiyi nqo'talo qamiri. Ta'ta'a quiyim 'ec qamiri lelaatqa so Cristo machiỹauec añi re'taxanatahi quiyim 'viichitac dá'maq ỹahotaque ñi qota'a. 7Quiyim 'ue ca 'viichii, ca' ỹaatqajam rasapchii'ta 'ec ná'maq quiyim 'ueenataxañitacot so qara'gaxala'. Mesqai 'ec ca qom nqai'ñii ca 'ueenataxañitacot. 8Ma' mashic 'yiiñii quiyim quiñi 'óna icoñiguit ma'le queso qara'gaxala' cá'maq laseue' cá'maq lo'yaxanec ỹo'uet, na'ac loqo'm se na'ac.
9Chaqai qamiri ma' qamiri 'cooro', qai'neeta denaxachiichigui dá'maq 'neetari' na relaataxahipi, sqai yiñitalec. Ñaqai 'yiiñi'a quiyim qamiri chaqai na'maxare viito'ot ñi qara'gaxala' ñí'maq neeta'gue da piguim, chaqai quiyim ñi'maxare qaica ca ỹapacqajnauec, ná'ogue naloqojne'ejta'.
Naua lo'goxonqate' se re'xoguilo cá'maq queeta'pegue' so Cristo
10Ca' nagui qamiri ỹaqaỹa', na'ñaxachiỹo', ma' mashic na'yiitau'a so qara'gaxala' quiyim chicqochigui da rquesaxanaxahi dá'maq chalego lquesaxanaxa so'maxare. 11Quepaqataxañiỹalo naua'que nauá'maq ro'goxonqachiri ỹaanema qamiri ñi qota'a, qaiyi ralohita'pegue' na layinaxanaxaquipi so na'ỹaapec. 12Ma' se seloquiaqata'pegue' ca chaqai qom qara'aajshaxaua, ta'ta'a ná'maq lquesaxanaxa se re'xogui na se no'uen hueeto'ot na piguim, ná'maq relaataxanac chaqai 'ue da lquesaxanaxa, chaqai ỹoiquentac ná'maq ñaqai hueetaugui na napalaxa quenajo 'laua. 13Ca vichiguiño' chaqa'ma' ñiiñi naua'que nauá'maq nquepaqataxanqate' quena roshicmaxahi ỹaanema qamiri ñi qota'a, qaiyi shichii nachaachiỹa'guit ca se no'uen ma' novi' quecajo na'xa'a. Ca ma' ime 'ñii'tegue dajo, ca na'ñaxachiñi. 14Ca' ỹaatqajam na'ñaxachichiguiñi, 'ec nosaachitagui dá'maq lliqueta, chaqai quepaqataxañiỹa da 'maxaraic 'ueenataxac, 'nejem nqai'en aca lquepaqataxanqate cana lotogue ca neetaho quena nouaataxanaq. 15Chaqai na'maxachitañi quiyim 'xachii da na'qaatec chicqaugui da na'maxa, 'nejem quena' na'maxajñi ca neetaho quena nouaataxanaq quena' ỹañiñi caua lapelate'. 16Qam quedá'ogue dajo, ca coñiỹa da rpi'ỹaxaguii, 'ec nqai'ñii aca nquepaqataxanqate quiyim ỹo'mat ná'ogue na novic ỹaviquetaugui lahinaxanqate so na'ỹaapec. 17Chaqai da rca'laxahi, 'neetari' nqai'ñii aca nado'ii lquepaxaset na rqahiguii. Chaqai coñiỹa da la'qaatec ñi qota'a, 'nejem nqai'ñii ca lecat ỹaanema qamiri so Espíritu Santo. 18Qam nqouagaxaiñii quiyim 'viichii dá'ogue dajo. Se neme ne'xorishiñitacot ñi qota'a, qam quiichigui nqai'ñii da rashiilaxanaxaguii so Espíritu. Ỹaatqajam nelohitec, qaiyi shichii 'viichii dajo. Se reuallitegueñi, chaqai nqouagaxaiñitalec ná'ogue ná'maq lalamaxaret ñi qota'a. 19Chaqai nqouagaxaiñitalec aỹim qai'neeta, qaiyi ỹa'vii caua ỹa'qaatqa ñi qota'a ma' setaqa, qaiyi ra'ñiigui na iuel quiyim sa'xat dá'maq se re'xogui quedá'maq na'qaatec chicqaugui da nca'laxa. 20Ma' ñi qota'a yila' ma' ỹauaaque aỹim letaxaỹaxanqajnec quiyim sa'xat dajo na'qaatec. Ca' chaqaida dá'maq 'em qaycoñiretari' nagui. Ca' nqouagaxaiñitalec aỹim ma'le, qaiyi se yo'chaalec ma' sa'xat da na'qaatec.
Da pa'aatec liquinaxanaxac so Pablo
21Ca' ñi Tíquico ñí'maq qanauochaxaua qarqaỹa chaqai qamaxaraic qarotaua queda lo'ueenataxanaxac so qara'gaxala', ñi'maxare ỹa'xat ma'le dá'ogue dá'maq shintari' chaqai quedá'maq so'ueetetac. 22Ca' vichiguiño' selatalo qamiri, qaiyi ñi'maxare ỹa'xatema qamiri dá'maq shinqatari' quenajo. Ca' quedajo, ca ỹa'ñaxate' qamiri ma'le.
23Ca' ñí'maq qota'olec chaqai so qara'gaxala' Jesucristo ỹaanem na qarqaỹaripi da na'maxa chaqai da ne'xorenataxanaxa, liỹaata nqai'en da npi'ỹaxac. 24Ca' ñi qota'a ỹaanem ma'le ca no'uen llicyaxac cá'maq nqo'ta so qara'gaxala' Jesucristo quiyim se ỹoỹoota'a cá'maq lqo'iichi queso'maxare. Ajá'a, ca' chaqaida 'neeta dajo.
Currently Selected:
Efesios 6: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.