Efesios 2
2
Qanca'laxaterec qomi' queda le'xorenataxanaxa ñi qota'a
1Ñi qota'a ỹaanema qamiri quiyim rca'laxauahi so Cristo, 'eno'm ñaqai viitaugui na'le da nelauaxa sauaxat na se no'uen chaqai na nasauaxaset 2na' ñaqai viitaugui, ca' quiitalec dá'maq no'ueenataxac na qomyipi hueetalec na 'laua, 'viichitac ná'maq ỹahotaque só'maq relaataxantac na'ỹaapec se re'xogui só'maq ỹa'ñaxat ná'maq se na'xaỹaxana ñi qota'a. 3Chaqai qomi' qai'neeta shinqatari' quen quesaua 'auaxaqa ñaxari, qolqata'pegue' dá'maq chi qaramaanaxanqachic, so'ueetqatac dá'maq chi lqo'itaxanqachic na qaroshicmaxa chaqai quedá'maq chi qara'deenataxanaxac. Ca' quedajo, ca' ỹaatqajam 'chichiguiñi quet ca chalego lecaic qanouaxanaxaset quiñi qota'a, shinqata ná'ogue na liỹa qomyipi. 4Qam ñi qota'a ỹaatqajam chalego lecaic da le'xorenataxanaxa ma' ỹaatqajam ỹauoteguelo qomi', 5ca' ỹaanema qomi' quiyim qarca'laxaua so Cristo, ma' 'eno'm ñaqai seuqataugui yi nelauaxa sauaxat na qarasauaxaseteripi. Qam chaqaida dá'maq chi lqouagaxa ñi qota'a, ca' nca'laxaterec qamiri. 6Ñi qota'a qai'neeta liỹa nca'laxaterec qomi', qariỹaatashiguim nqai'en so Cristo Jesús. Ime, ca qarqa'xanaxañi'ñi' so'maxare queda piguim. 7Dajo 'ne'tegue, ma' ỹahotaque ỹachaxan quenauá'maq naasaho na'xata' dá'maq chalego lecaic le'xorenataxanaxa coqomi', chaqai da lqouagaxa coqomi' chicqochigui nqai'en so Cristo Jesús. 8Ma' quedá'maq le'xorenataxanaxa ñi qota'a, ca' nca'lerec qamiri, chicqochigui da rpi'ỹaxaguii. Qam dajo sqai qamiri chi ro'ueenachiguii, ta'ta'a quiyim chaqai ỹaanema qamiri ñi qota'a. 9Mesqai chicqaugui cá'maq ỹa'maqachiguiñi ỹo'uet ca qom, qaiyi qaica quet cá'maq ishit quiyim nemaqajan. 10Ma' qomi' lo'ueenatqa ñi qota'a, chaqai ñaxata'alo nqai'ne' qomi' so Cristo Jesús, ma' ỹahotaque quiyim so'ueetaq cá'maq no'uen. Ma' ñi'maxare shi'co' ỹahotaque quiyim so'ueetaq.
Da qara'maxa chicqo'ot so Cristo
11Ca' vichiguiño' no'viñita'gue dá'maq 'ñiitari' quen quesom, sqai qamiri judío lase'. Ca vichiguiño' na judioipi ma' ỹo'uet na netanec na loshicmaxa na llaalqaipi, ca' ỹa'ue dá'maq chaqai legaxanaxat, 'neetasa': 'ue netanaxaset. Ca' qamiri ỹamata'guelo qaica ca netanaxaset. 12Ma' queca'maxare na'le qaica so Cristo caqamiri, ca' ỹoreta'ogalo na'le qamiri quena llaalqaipi so Israel, chaqai sqa 'yiiñii dá'maq 'maqataxac chaqai dá'maq ỹachaxantac ñi qota'a. Ca' viitalec najo 'laua, qam qaica ca naquitaxaguii, chaqai qaica ñi qota'a caqamiri. 13Qam nagui mashic na'yiitau'a so Cristo Jesús, ma' quesom qoỹore'talo na'le qamiri, qam nagui sqo ỹore'ogalo nqohine' qamiri queda lelauaxa so Cristo. 14Chaqaiso so Cristo só'maq ỹo'uet da qara'maxa. Ma' so'maxare ỹo'uet quena judioipi chaqai quena sqai judioipi 'ec neuo' laseripi, ma' mashic ỹamaxañi so lquepaxaset só'maq 'em se neuojonta' na qomyipi, ca ỹoreta'chi nqai'en. 15Ca' quesó'maq chi lalamaxaret loshicmaxa so Cristo, ca' lqodoc nqai'en so lelaataxanaxac na naqataxaquipi. Ca' ỹo'uet quená'maq judioipi chaqai quená'maq sqai judioipi quiyim ima'ta' 'ec neuo' laseripi, na'deu'a so'maxare. Ca' quedajo, ca' ỹo'uet da qara'maxa. 16Ca' quedajo 'neeta nqai'en so Cristo na' ileualec so npatenaxala', ma' ỹahotaque lqodoc só'maq neloquiaxac hueetauguilo naua dos ma' se neuo' laseripi. Ca ỹo'uet quiyim nemande'e' ñi qota'olec, chaqai ỹo'uet quena'maxare quiyim 'ec 'oonoqui' nqai'en.
17So Cristo novi', ca' ỹa'xat dá'maq no'uen na'qaatec chicqaugui da na'maxa quená'ogue, ca 'eno'm qoỹore'talo qamiri quiñi qota'a, qam 'nejem nqohin ma'le ná'maq judioipi ma' sqoỹoqaque quiñi'maxare. 18Ma' chicqochigui nqohin so Cristo, ca ná'ogue ná'maq judío chaqai ná'maq sqai judío quiyim ñqo'naxau'a ñi qota'a, chicqochigui nqohin so Espíritu Santo. 19Ca vichiguiño' qamiri 'eco' totqai ỹoqa'a ca chigoxoỹa'gue quiyim 'ec ỹoqa'a quet na ñiitalec 'laua. Ta'ta'a quiyim ỹaatqajam ra'aayaxauahi ná'ogue ná'maq lalamaxareteripi ñi qota'a, chaqai ỹaatqajam qamiri lauo' laseripi ná'maq llaalqaipi ñi'maxare. 20Qamiri 'ñiitari' ca 'imec, ca' qaillijlec qamiri só'maq no'xonaxanaxala' ỹa'auaxanyiñi saua lelaatqa so Jesús chaqai so letaxaỹaxanqajanqaipi ñi qota'a. Ca' chaqaiso só'maq Jesús 'eco' ca qa' nolliitañi cajo 'imec. 21Ca' sojo no'xonaxanaxala' chaqaiso so Cristo, ca' ñá'ogue ñí'maq 'imec qano'xontashiguim, ca' ỹaatqajam qaỹa'maxachichiriñi naua lahil, ca chi ỹovireto'o' quiyim 'nejem ca 'imec ta'chiguit quiyim qaimaqachintac so qara'gaxala' Jesús. 22Ca' qaican ỹapaguec caqamiri quiyim na'yiitau'a so Cristo, ca lapohiguit ná'ogue na liỹaripi, chi ỹovireta'a quiyim 'ec qamiri 'imec. Ca' neetaugui ñi qota'a queso Espíritu Santo.
Currently Selected:
Efesios 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.