Daniel 3
3
Na' qaỹa'dooto naua ne'cootal so nadenqatec qom imaañi 'oro
1Ca' so nashi Nabucodonosor relaataxanlec quiyim qaỹa'ue so nadenqatec qom imaañi 'oro, treinta metros da ladogaxa chaqai tres metros da leca'gue. Ca 'naac quiyim qoỹanalec so quemarelec leenaxat Dura quiyi 'laua Babilonia. 2Na' ime, ca' roỹaxane'oga na nashillipi quenaua 'lauari, chaqai na nouaataxanaq lashillipi, na ichoxota'pe naua leloxoỹaxaco, nauá'maq napoondac ana nam, na neraxanyipi, na imitac na nasauaxaset chaqai na liỹa lotauaripi so nashi quenaua 'lauari, qaỹahotaque ỹalequetaho ma' qoỹaanshiguim só'maq nadenqatec qom relaataxanlec so nashi. 3Sá'ogue so leta'allípi nashillipi quiyi 'laua lapou'a so nadenqatec na' ỹovita quiyim qoỹaanshiguim. 4Ca só'maq qaỹamaxalec quiyim netaxaỹaq ma' taañi quiyim qoỹaanshiguim, ca na' retaqa ỹaatqajam nelamaxaren, 'naac:
—Ñaq na'xaỹaxañiñi qamiá'ogue qamiri ỹoreta'oguita naua ra'qaataxahi: 5Ma' 'xaiỹaque quiyim qaipi'chigui na npe'tellipi, na niviiguellipi, na nasaquinataipi, na nouaxanallipi chaqai ná'ogue ana ỹaleque'ejta' niviiguellipi, ca' 'yiiñii naua re'cootallii, ca' nqouagaxaiñiỹot ñi nadenqatec 'oro, ñí'maq relaataxanlec ñi qarashi Nabucodonosor. 6Ca ná'ogue ná'maq se ỹa'chi'iñi naua le'cootal chaqai se nqouagaxainot ñi nadenqatec qom imaañi 'oro, ca chaqa'ma' qainaxaugui ñi nqatelaxanaxaqui ỹaviquetaugui.
7Ca' chaqaida 'neeta nqohin queso qomyipi lapoota'ta', na' 'xaỹaque so lelamaxa so ỹoreta'oguit niviiguellipi na' qaiviiguigui, ca sá'ogue ỹa'yi'iñi ana le'coota, ca' nqouagaxainot so nadenqatec qom imaañi 'oro.
8Ca' 'vii saua Caldea lase' nquipitero quiyim talaxaneguelo saua judío lase' queso nashi Nabucodonosor. 9Ca 'nerac:
—¡Qami' qarashi, sqaica lqodoc da nachaalataxaqui', chaqai no'leentaxat da qadeenaxachi'! 10Qami' qarashi 'ñirac quiyim ná'ogue na qom ỹa'chi'iñi naua le'cootal chaqai nqouagaxainot ñi nadenqatec qom imaañi 'oro ma' ilamigui na niviiguellipi, 11ca cá'maq se ipacqajñigui da ra'qaachiqui', ca' qainaxaugui ñi nqatelaxanaxaqui ỹaviquetaugui. 12Hua', qam nagui 'vii daua judío lase' dauá'maq qami', qami' qarashi, ñi'ra'ñi quiyim idaandelec na 'laua Babilonia, ỹaatqajam qaica ca ỹauaaque qami', chaqai se na'xaỹaxan se nqouagaxainot na rashiilqui' nqolaquipi chaqai ñi nadenqatec qom imaañi 'oro só'maq laataxañirelec na'le quiyim qaỹo'uet. Ca' so Sadrac, Mesac chaqai so Abed-nego chaqaisaua sauá'maq se na'xaỹaxane'.
13Ca' so Nabucodonosor ỹaatqajam ro'o, ca' relaataxane'ogalo quiyim qaỹaueguero saua Sadrac, Mesac chaqai so Abed-nego. Ca, na' mashic reloqota'guita, 14ca inate':
—¿Ỹaatqajam lliqueta quiyim qamiri se nqouagaxaiñiỹot na qota'olqaipi caỹim chaqai ñi selaataxanlec nadenqatec qom imaañi 'oro? 15¿Qamiri shichita quiyim ma' 'xaiỹaque ca niviiguellipi, ca 'chiiñi naua re'cootallii quiñí'maq selaataxanlec quiyim qaỹo'uet chaqai nqouagaxaiñiỹot? Ma' no'm se nqouagaxaiñiỹot, ca' nagui chaqa'ma' qainaxarougui qamiri ñi nqatelaxanaxaqui ỹaviquetaugui. Ca ¿negue' queto' ca qota'olec rca'laxachiiuec?
16Ca saua tres ne'naqa 'nerac:
—Dajo qaica quet cá'maq 'neeta quiyim setaxaiqatapigui. 17Ñi qota'olec coqomi', ñí'maq ñqouagaxainqatacot, ñi'maxare ishit quiyim qarca'laxatec quena lauaq ñi nqatelaxanaxaqui chaqai quená'ogue ná'maq se no'uen vi'saque 'ñiteteguelo qomi', qami' qarashi, ca ñi qota'olec qarca'laxatec ma'le. 18Qam no'm se qarca'laxatec, qam 'yiiñite' quiyim se ñqouagaxainqot na rashiilqui' nqolaquipi chaqai se sa'daqoto naua qare'cootal ñi nadenqatec qom imaañi 'oro.
Saua tres ne'naqa se ileue' chicqoterougui so nqatelaxanaxaqui ỹaviquetaugui
19Ca co'na' 'xaỹa dajo na'qaatec so nashi Nabucodonosor, ca' netoguec na lashic quena lauel quesaua tres ne'naqa. Ca' relaataxanlec quiyim liỹa qaỹalonougui ñi nqatelaxanaxaqui, qaiyi paguec nqo'neuec da lpa'ỹaaxa. 20Ime, ca' ilate' saua nale' paguec quesaxanaxaqa quiyim ỹaxate' saua Sadrac, Mesac chaqai so Abed-nego, ca' qainaxariñigui so lauaq so nqatelaxanaxaqui. 21Ca' saua tres ne'naqa ñaqai ỹansañi saua loho lo'ueenataxanaxaqui', ca' qoỹaxateguelo, ca' qainaxarougui so lauaq so nqatelaxanaxaqui. 22Ca ma' só'maq nashi ỹahotaque quiyim chaqa'ma' qaỹo'uet dá'maq lelaataxanaxac, ca ma' so nqatelaxanaxaqui ñaqai 'xoic so lauaq, ca' ỹovira'ogalo sauá'maq inaxaro saua tres ne'naqa, ca' ileue'. 23Ca' saua ne'naqa taariñigui so lauaq so nqatelaxanaxaqui qoỹaxateta'que.
24Ca co'na'le, ca' so Nabucodonosor ne'laxatashiguim, ỹaatqajam 'ue da le'laxa, ca inate' saua lotaua', 'naac:
—¿Mesqai treeso' ỹale' nanaqatqa caua senaxasoxoro quiñi nqatelaxanaxaqui ỹaviquetaugui?
Ca' saua lotaua' 'neraco':
—Ajá'a.
Ca' so nashi 'naaco':
25—Qam ỹim cuatro dauá'maq ỹale' sedaantau'alo soosauec 'ec qaica nqai'ne' na norec lauaq ỹouoosapigui, ca dá'maq liỹa 'ec qota'olec lelaatec chicqashiguim.
26Ca na' 'naac dajo, ca so Nabucodonosor nqo'neu'a ñi lasom ñi nqatelaxanaxaqui, ca ỹaualaq, 'naac:
—¡Sadrac, Mesac chaqai Abed-nego, lelaatqa ñi ỹapacauec qota'olec, nenoxoñiuec, naiquenajo!
Ca' saua tres nenoxondec, chicqoterougui so norec lauaq. 27Ca sá'ogue so lotauaripi so nashi hueeta'anyi nqo'neu'alo saua ỹale' sauá'maq se ỹavigaxate' naua loshicma' so norec. Ca' iuanta quiyim vire'ta na laue' saua'maxare qaica ca ỹovira'a so norec lauaq, chaqai saua loho ỹansañi no'ueente', chaqai qaica ca nesalaxaripi lahita no'ueenaho.
28Ca' quiyi na'le, ca' so nashi Nabucodonosor 'naaco':
—¡Qaimaqachin ñi qota'olec ñí'maq lashiilgue' saua Sadrac, Mesac chaqai Abed-nego, ma' nela' so lelaatec piguim le'ec quiyim nca'laxaterec saua qamaxaraqa lelaatqa, quiyim se na'xaỹaxanta ỹim quiyim ỹim nashi! Ca se itene' quiyim qaỹalauate', qam se nqouagaxaintot ca liỹa nashiilec, qaiñiita ñí'maq lashiilgue' qota'olec. 29Ca' ỹim shinac nagui quiyim canchaqaica qom se no'uen ca ỹa'xat quiñi qota'olec ñí'maq lashiilgue' nauajo ne'naqa, ca qaichaqatajlec chaqai qanopoxoỹaxajñi ca lauo', quecanchaqaica na'ñi quenaua na'aate', chaqai cá'maq lauo', chaqai caua la'qaatqa ỹa'xate', ma' qaica liỹa nashiilec ca'laqataxan 'nejem ñi'maxare.
30Na' ime, ca' so nashi ỹa'ue ca lo'ueenategue' saua tres ne'naqa, ca lo'ueenategue' paguec lecaic quesó'maq 'auaxaic quiyi 'laua Babilonia.
(4.1-37 So Nabucodonosor 'ue da leleguemaxa, ca qanataren.)
Currently Selected:
Daniel 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.