2 Corintios 10
10
Ỹaatqajam 'ue nqai'negue so Pablo ma' Jesús lelaatec
1Aỹim Pablo, ñi'xoresentouguilo qamiri, sahote'e da neneequesenaxac chaqai da lqouagaxa so Cristo. Qohinaco' quen quiyim aỹim neneequesenaxai quena' salequetauguilo qamiri, qam ỹaatqajam quesaxañi naua ỹa'qaatqa quena' qoỹoqo'ta aỹim. 2Hua', qam ñi'xoresentouguilo qamiri nagui quiyim ma' sovitalo qamiri, totaxan 'viichiỹo' quiyim 'ue ca se sa'maxata'gue caqamiri quená'maq 'ue na inaqateguelgoto qomi' quená'maq chi lo'ueenataxanaxac na qom. Ca' ỹim ỹaatqajam sahotaque seloqoguita ma'le caua'maxare. 3Llic ma' qom qomi', qam se seloquiaqatac shinqajam na chaqai qom huelec na 'laua. 4Ma' nauá'maq qaro'goxonqate' sqai huerelec najo 'laua, ma' hueetagui da lquesaxanaxa ñi qota'a quiyim iuagaxatac canchaqaica nquesaxanaxa. 5Vichiguiño' qomi' seuagaxatqac ná'ogue nanchaqaina nasauaxaseteripi chaqai canchaqaica maqajnaxac quiyim ỹahotaque se qaỹa'den ñi qota'a. Chaqai ná'ogue ná'maq chi la'deenataxanaxac na qom saanqot so Cristo, qaiyi qana'xaỹaxana so'maxare. 6Chaqai qomi' sahoqotaque souaxanaq ná'ogue na se na'xaỹaxan, quiyima' ỹovita quiyim qamiri na'xaỹaxañita.
7Qamiri ra'iitapigui na chaqai qom. Ca no'm 'ue ca 'neetapega ỹaatqajam queeta'pegue' so Cristo, ca qai'neeta retanta quiyim qomi' qai'neeta qolqata'pegue' so Cristo. 8Ma' ỹim 'eco' cocho'qui' 'ue da ipagaxallic quedá'maq lquesaxanaxa da qaro'ueenataxanaxac, qam qaica ca ñayiloxontaque, ma' só'maq qara'gaxala' nañaanoxorom, qaiyi 'ue ca qachaxataxaguii qamiri quená'maq se re'xogui, qam se sahoqotaque quiyim seuagaxatqa'pe qamiri. 9Se yqo'ta quiyim 'ec sqo'ỹoqochiteta'pe qamiri quiyim sahota'ahi naua ilaata. 10Ma' qohinaco' quen quiyim naua ỹerecse ilaata se nesatete' chaqai 'xoic da lquesaxanqa', qam quiyim aỹim salequetauo, ca se squesaxan chaqai da itaxaỹaxac sqaica nqo'ta. 11Qam cá'maq 'naac dajo, qai'neeta ỹa'den quiyim quedá'maq shinqatari' quenaua qara'qaatqa quena' sahoqai ana qarelaata quiyim qoỹore'talo qomi', chaqaida shinqata ma' 'ue ca so'ueetaq ma' salecqatauguilo qamiri.
12Ma' qomi' se sahoqotaque quiyim shinqajam malam, loqo'm quiyim ñaloqojnaxaguit ca nachaalataxac ca qom no'uen ca ỹa'xatetac, qam chi na'xateteguelta'. Ma' dajo chi lo'maxac ca'maxare, ma' chi neguemaxateteguelta' chaqai quiñi 'óna chi naloqojonta'piguit da nachaalataxac ca liỹa. 13Ma' qomi' se sahoqotaque ñapacqalec cá'maq qomi' qoỹaanema, ma' ñi qota'a ñí'maq itan cá'maq lqodoc cá'maq qaro'ueenataxanqa'. Ma' chaqaiñi ñí'maq ỹo'uet quiyim ñovirqa'alo qamiri quena Corinto. 14Ca vichiguiño' se ñapacqalgoto naua lqodoco dá'maq qanañaanoxorom qaro'ueenataxanaxac. Ñapacqateguelgoto naua lqodoco da qaro'ueenataxanaxac quetaxan sqai shi'co' ñovirqa'talo qamiri. Qam qomi' nauá'maq 'au sovitaxalo qamiri na'le quiyim sa'xataq dá'maq na'qaatec na'qaataxac so Cristo. 15Chaqai se spa'axalec cá'maq shi'gue lo'ueenatec ca liỹa qom quiyim 'ec qaralamaxat. Ta'ta'a quiyim sahoqotaque nqo'neuec ca rpi'ỹaxaguii, ca nqo'neuec ca qaro'ueenataxanaxac caqamiri. Qam se ñapacqalec cá'maq lqodoc ná'maq qaro'ueenataxanqa'. 16Ca ma' ime, ca sahoqotaque ñqo'naxe'ogalo naua qoỹoqote'ogalo 'lauari quena ñiita'ñi, ca sa'xataq da na'qaatec chicqaugui da nca'laxa quená'maq paguec qoỹoqote'oga caqamiri, qam se sahoqotaque spa'axalec ca lo'ueenatec ca liỹa qom.
17Ca no'm 'ue ca ỹahotaque nemaqajan, ca 'maxaraic nemaqajanlec so qara'gaxala'. 18Ma' cá'maq qom quiyim qaỹa'maxarenta, qam mesqaica ca chi na'xateteguelta'; ta'ta'a cá'maq qaimaqachin quiñí'maq qara'gaxala'.
Currently Selected:
2 Corintios 10: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.