2 Corintios 9
9
Aso notaanaxanqate qailata so nqaỹaripi
1Qam da 'neeta ana notaanaxanqate quena' qailata ná'maq mashic icoñiguit da na'qaatec, ỹaatqajam se ipacaque shiriñi caqamiri. 2Ma' mashic sa'den quiyim 'maxaraic da 'ñiitari'. Ca' 'ue da ñitoonaxac quena' sa'xat dajo quena Macedonia laseripi quiyim qamiri ñiỹa'ñi na Acaya ỹaatqajam shi'gue ra'maxaitañi quiyim taanaxañii queso liỹa ñaaxa. Ca sham ná'ogue na na'ñi na Macedonia huatau'a dá'maq 'ñiitari' qamiri quiyim rotaanaxan. 3Ca vichiguiño' selate' naua qarqaỹa', qaiyi ỹaatqajam ipaquichigui dá'maq no'uen shinac caqamiri quedajo, qaiyi re'qoota quiyim ỹaatqajam na'maxachitañi quedá'maq shinac. 4'Ase' no'm 'ue ca ỹiỹa quena na'ñi na Macedonia, ca ỹoviralgoto qamiri quiyim se na'maxachitañi. Ca' 'ue ca qarayiloxo ma'le mashic shi'gue semaqachinqata'pe qamiri. Qam se sa'xataq cá'maq chi rayiloxohi queta'le qamiri. 5Ca' chaqaida dá'maq 'em quiyim ñi'xoresenqa'toto naua qarqaỹa' quiyim 'au quepegueto qamiri, ca' ỹotauane' qamiri quiyim nalogoñi acá'maq shi'gue 'ñiỹac lapooñitañi. Qaiyi acá'maq rapooñicshii ỹa'maqatañi, qaiyi re'qoota nqai'ñii cá'maq rqouagaxahi, qam mesqai quiyim qomi' qarque'guenataxanaxac caqamiri.
6Ca' qamiri no'viñita'gue dajo: quiyim cá'maq sqalo ca ỹanñi, qai'neeta sqalo ca naqat; qam cá'maq 'xoic ca ỹanñi, qai'neeta 'xoic ca naqat. 7Ca 'óna ỹaan cá'maq nalootau'a viichigui añi le'taxanata; sqaica ca huapigui lauel, loqo'm chi nque'guenataxanaxac. Ma' ñi qota'a nqo'ta cá'maq huaquichiguiñi quiyim ramiaxan. 8Ñi'maxare ishit ỹaanema qamiri ná'ogue nanchaqaina ỹaleque'ejta' lqouagaxanaxat, qaiyi qaica ca viñitaque quenanchaqaina roviñiguii; chaqai paguec, qaiyi shichii taanaxañii quecanchaqaica 'maxaraic no'ueenataxanaxac. 9Ma' naua naneresañi la'qaatqa ñi qota'a ỹa'xate' ca huagaxaraic qom, 'neetasa':
Ỹachit na 'xoraiquipi,
ca dá'maq no'uen lo'ueenataxanaxac no'ueenaugui na'maxare.
10Ñi qota'a, ma' ỹaan aca nanecse ala quiyim qoỹanñi, chaqai ca na'ic quiyim qaỹa'ic, ca ỹaanema qamiri ná'ogue nanchaqaina quiyim ñiiñi, chaqai quiyim ñaxat nqai'en ca qadañicshiguii, ca ỹovira'a quiyim 'xoic aca la nqai'en, qaiyi ma' qanaqat, ca 'xoic nqai'en ca lo'yaxanec no'ueenataxanaxac chicqochigui. 11Qaiyi ma'le, ca' ỹaleque'ejta' nanchaqaina 'ue caqamiri, ma' qamiri nesallaxanqa. Ma' 'ue ca rachitaxanataxanaxachii lari'ueguelo qomi', ca' ỹo'uet quiyim yi qarqaỹaripi ỹaanshiguim da na'aachic quiñi qota'a. 12Ma' quiyim saanaq anajo rotaanaxanqachii quena qarqaỹaripi, sqai saanqaem quiyim qaidaata 'ue ca louenaxanaxa. Qam qai'neeta so'ueetaq dajo, qaiyi yi qarqaỹaripi ỹaanshiguim da na'aachic quiñi qota'a. 13Ca yaua'maxare imaqachine' ma'le ñi qota'a, ma' quedajo rotaanaxanaxaguii, ca re'oq quiyim na'xaỹaxañii'ta da na'qaatec ỹa'xat so Cristo. Chaqai qai'neete' yaua'maxare imaqachine' ma'le ñi qota'a queda rqouagaxahi quiyi'maxare chaqai quená'ogue. 14Ca yi'maxare, ca nqouagaxaintalgoto qamiri ma'le, ma' 'xoic da lauochaxa ma'le caqamiri queda rqouagaxahi re'oq chicqo'ot ñi qota'a. 15Ca' ¡qomi' saanqot da qana'aachic ñi qota'a, ma' ñi'maxare 'xoic lecaic dá'maq qana'aachicyaxac qomi', ca' da'maxare se seshitaq sa'xataq cá'maq 'neeta da'maxare!
Currently Selected:
2 Corintios 9: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.