2 Tesalonicenses 3
3
Nqouagaxaiñitalgoto qomi'
1Ca dá'maq pa'aatec qara'qaatec caqamiri qarqaỹa' quiyim qouagaxaiñitalgoto qomi', qaiyi da la'qaatec so qara'gaxala' sqaỹaloq ỹovire'oga ná'ogue na qomyipi quiyim imaqachin icoñiguit, qaican ỹapaguec na'le caqamiri. 2Qai'neeta nqouagaxaiñitalgoto qomi', qaiyi qaica nqai 'negue coqomi' na qomyipi hualoxonyipi, ma' mesqai ná'ogue 'ue ca lpi'ỹaxac. 3Qam so qara'gaxala', ma' se napacalec da la'qaatec, ỹaatqajam nolliichiriñi qamiri, chaqai ro'ootaxanlgoto qamiri quena se no'uen. 4'Ue qanaquitaxac queso qara'gaxala' quedá'maq 'viichitac chaqai quiyim quiitalec 'viichitac dá'maq selaataxanaxalec caqamiri. 5Ca' so qara'gaxala' ỹotauane' qamiri quiyim nauachiỹa'guit da lqo'iichi ñi qota'a, chaqai quiyim 'ue ca reualaxaviguii 'nejem da leualaxavic so Cristo.
Dá'maq leloxoỹaxac da no'ueenataxanaxac
6Qamiri qarqaỹa', saqataxalo qamiri quiyim noỹoochiuec quecanchaqaica qarqaỹa quiyim se nqo'ta ro'ueenataxan, chaqai quecá'maq sqai quelec da qarapaxaguinataxanaxac saanqaima qamiri. 7Ma' qamiri 'yiiñita dá'maq 'ñiitari' quiyim quiitalec da leloxoỹaxac da shinqatari' na' salecqatauguilo qamiri. Ma' qomi' ỹaatqajam so'ueenataxanaq na'le, 8chaqai sqaica ca sa'guinaq ca loq quiyim se seshiuetenaq. Ta'ta'a quiyim ỹaatqajam so'ueenataxanaq, 'xoic na qaresoochi quenaua na'xata' chaqai quenaua piri. Ma' sahoqotaque quiyim sqaica ca 'ec nesallaxainta'pegueto qomi' caqamiri. 9Mesqaida quiyim sque'guenqateguelgoto qamiri quiyim qarotauañii. Qaidaata quiyim so'ueenataxanaq, ma' sahoqotaque quiyim quiijlec dá'maq qano'ueenataxac. 10Ma' na' seuqatauguilo qamiri, saanaxauec da qara'qaatec quiyim shinqac: ¿Qa' que'o' cá'maq se ro'ueenataxan? 11Ma' qomi' 'ue na sa'xaiqateguelec quiyim 'uo' na se ro'ueenataxan caqamiri. Ta'ta'a ỹalamqajlec quiyim qaica ca icona'pegue'. 12Ca' ma' qomi' lelaatqa so qara'gaxala' Jesucristo, ca' selaraxalec cajo qom chaqai saqataxa quiyim ỹaatqajam ro'ueenataxan, qaica ca taỹapigui lauel, qaiyi nauec cá'maq louenec.
13Qamiri qarqaỹa', se neme quiyim 'viichitac ca ỹa'maqachiguiñi. 14No'm 'ue ca se na'xaỹaxana da qara'qaatec hueetalec najo qoderecse lere, ca ỹaatqajam na'ijñii'tegue ca'maxare. Ca' ime, ca se naqachiiguit, qaiyi nayiloxon ca'maxare ma'le. 15Qam sqai 'ñiita'gue ca npa'guenaxauahi, ta'ta'a quiyim qachiỹa 'maxachii'tegue, 'ñiita'gue ca rqaỹahi.
So Pablo ỹahotaque quiyim qoỹaan ca no'uen ñicyaxac
16Ca' so qara'gaxala' Jesús, só'maq hueeto'ot da na'maxa, so'maxare ỹaanema qamiri ca ra'maxahi naua'que naua na'xata' chaqai quená'ogue nanchaqaina caqamiri. Ca so qara'gaxala' ỹalequetauguilo qamiri.
17Ỹim Pablo ỹaatqajam shiriñi najo iquinaxanaxac, sahote'e ana ñapoquena chaqai na ỹerec. Ca 'eda da shinta'gue ná'ogue ana ilaatallipi quena' seraxan. 18Ca' so qara'gaxala' Jesucristo ỹaanema qamiri ca no'uen qayicyaxaguii. Ajá'a, ca' chaqaida 'neeta dajo.
Currently Selected:
2 Tesalonicenses 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.