2 Corintios 13
13
Da naqataxaquipi chaqai da niquinaxanaxaquipi pa'aatec
1Ca' nagui ma'le quenajo, ca' tres sovitalo qamiri. Qam ná'ogue nanchaqaina quena nasauaxaset quiyim qaỹa'xat, ỹouen quiyim ra'qaataxane' caua dos, loqo'm tres qomi'. 2Qam quená'maq shi'gue 'ue na lasauaxaset, chaqai quená'ogue na liỹaripi, nagui ma' ñaq qoỹoqo'ta ỹim, ca lotqai sopilalec da ỹaqataxac, 'nejem dá'maq shi'ntegue na' co'uaataxanaxaic salequetauguilo qamiri. Ca' nagui saho'te da ra'xaỹaxaguii: quiyim ma' sovitalo qamiri, ca' tot qaica quiyim 'ue quet ca liỹa se'xoren. 3Ca' yi hua'ñi ma'le, ca' 'yiiñii cá'maq michitaque ma' re'oq quiyim retaqaugui aỹim so Cristo. Qam so Cristo mesqaida quet quiyim qaica quet ca lquesaxanaxa quiyim 'ue ca 'ne'teguelo qamiri. Ta'ta'a quiyim ichoxot da lquesaxanaxa ma' hueetanguilo qamiri. 4Qam llic ma' so'maxare qaipateno 'ec quiyim qaica ca lquesaxanaxa, qam nachaatetaugui da lquesaxanaxa ñi qota'a. Ca' qomi' qai'neete' salecqau'a dajo quiyim qaica ca qarquesaxanaxa. Qam no'm ña'daqatau'a so'maxare, ca' hueetauguilo qomi' da lquesaxanaxa ñi qota'a, ma' salecqatauguilo qamiri.
5Ca' chi na'ajñiỹalta' qamiri ma'le, qaiyi 'yiiñii quiyim ỹaatqajam llic 'ue ca rpi'ỹaxaguii. Ñaq ni'guiñiỹalta'. ¿Se retañio' quiyim so Jesucristo hueetauguilo qamiri? Ta'to'o' no'm sqai ỹaatqajam llic coñiguit da na'qaatec. 6Ca' vichiguiño' 'ue da qanaquitaxac quiyim retañii quiyim mesqai qomi' 'maatqaqa. 7Chaqai ñqouagaxainqatacot ñi qota'a, qaiyi qamiri sqo 'viichii ca se no'uen. Qam se sahoqotaque quiyim ñachaxanqatac quiyim qomi' ỹaatqajam llic dá'maq sa'xatqatac, qaidaata quiyim qomi' sahoqotaque quiyim 'viichii ca ỹa'maqachiguiñi, 'eno'm 'ec sqai llic cá'maq sa'xataq. 8Ma' qaica quet cá'maq shinaxague quiyim seloxoỹaxaguit dá'maq lliqueta na'qaatec, ta'ta'a quiyim sotauanaq. 9Vichiguiño' ñitoonaq quena' qaica ca qarquesaxanaxa, qam qamiri quesaxanaxaqa. Chaqai qolqatalec quiyim ñqouagaxainqatalgoto qamiri, qaiyi vire'to' ma' ralohichiguiñi. 10Shiriñi anajo ilaata ma' saqa' shicpegueto qamiri, qaiyi ma' sovitalo qamiri se souen caqamiri da nquesaxanaxa nañaañim so qara'gaxala', qaiyi nqo'ñishiguim ca llaxataxague' qamiri queda se re'xogui, qam se sahotaque seuagaxata'pe qamiri.
11Qamiri ỹaqaỹa', nagui, ca' qaidaata quiyim no'uen ca qayicyaxaguii. Ỹaatqajam daañiỹaque ca la'maxa da chaalataxac, ỹa'maqachigui nqai'ñii na qavillii, niñiiquishiñitecta' queda ra'maxahi. Ca ñi qota'a chicqo'ot da na'maxa chaqai da ne'xorenataxanaxa hueetauguilo ma'le qamiri. 12Ca 'maxaraic quiyim ma' niquiñiỹata', ca' quiñi 'óna nqo'goq ca liỹa, chaqai ne'xoriñiỹata'. 13Ná'ogue ná'maq mashic icoñiguit da na'qaatec ila' da liquinaxanaxac caqamiri.
14Chaqai coñiguit da lqouagaxa so qara'gaxala' Jesucristo, chaqai da le'xorenataxanaxa ñi qota'a, chaqai quiyim ỹalequetauguilo qamiri so Espíritu Santo. Ajá'a, ca' chaqaida 'neeta dajo.
Currently Selected:
2 Corintios 13: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.