1 Timoteo 4
4
Ca qom totqai quelec da lpi'ỹaxac
1Qam so Espíritu Santo ỹaatqajam ỹa'xateta'guita naua co'uaataxante' na'xata', ca 'uo' ma'le ca totqai quelec da lpi'ỹaxac, queeta'pegue' na se re'xogui yinaxanaxaiquipi, chaqai na'xaỹaxantapega na napaxaguinataxanaxaquipi chicqo'ot na lelaatqaipi so na'ỹaapec. 2Chaqai na'xaỹaxantapega na qomyipi sqa ỹaataxalec chaqai 'maatqaic, chaqai quedá'maq la'deenataxanaxac tot qaica ca nauataque, 'eco' mashic qaỹavigaxat queca lecat pa'e. 3Najo qomyipi se ỹa'maxaren quiyim 'ue ca 'on, chaqai 'ue na se ỹasen quiyim qaỹa'ic quena na'ic. Qam ñi qota'a ỹo'uet najo na'ic, ỹauaaque quiyim ỹa'ic ná'maq mashic icoñiguit da na'qaatec chaqai ná'maq ỹa'deenta da leloxoỹaxac ỹaatqajam llic, ca ỹaantecshiguim da na'aachic quena' que'e. 4Ma' ná'ogue ná'maq lo'ueenatec ñi qota'a ỹaatqajam 'xoic loyac chaqai mese lliỹoxosqa'piguit. Ta'ta'a quiyim seconaxaguit, ca saanqatacot da qana'aachic ñi qota'a. 5Ma' naua la'qaatqa ñi'maxare chaqai da qouagaxainaxac ishit quiyim co'teeta nqai'en ca na'ic.
Cá'maq ỹaatqajam no'uen lo'ueenataxanqajnec so Jesucristo
6No'm paxaguinataxañitegue dajo quena qarqaỹaripi, ca' ỹaatqajam qami' no'uen lo'ueenataxanqajnec so Jesucristo, chaqai ra'ñaaqataxanqachichi' naua na'qaatqa quedá'maq leloxoỹaxac da npi'ỹaxac chaqai dá'maq 'maxaraic napaxaguinataxaqui' qui'salec. 7Qalaxam se na'xaỹaxañita cá'maq chi na'qaataxanaxac huelecna chaqai na sqaica ca 'negue. Ta'ta'a quiyim raqamqaiterelec quiyim qui'salec ñi qota'a. 8Ma' dá'maq lpa'ataxaric na qaroshicmaxa 'ue da 'negue, qam qailligueme'. Qam no'm ỹaatqajam qoyiquejlec ñi qota'a, ca' ỹaatqajam 'ue da 'negue. Ma' ỹaatqajam chicqaugui da 'aachicyaxac queda qanachaalataxac nagui, chaqai quecá'maq chaalataxac ñaqa naata. 9Ca' dajo dá'maq ỹaatqajam lliqueta, chaqai ishit quiyim ná'ogue huelec. 10Ca' chaqaida dá'maq 'em so'ueenataxanqatac chaqai ña'ñaxataxaguit da qanishiuenaxac, ma' mashic selloqo'ot da qanaquitaxac ñi qota'a ñí'maq nca'leetauec, ma' chaqaiñi ñí'maq ỹahotaque quiyim nca'laxatec ná'ogue na qomyipi. Qam cá'maq ỹaatqajam huelec ñi'maxare, ca' chaqaica cá'maq qanca'laxatec.
11Ca' dajo ỹa'qaatec dá'maq qami' laataxañirelec chaqai paxaguinataxañitegue. 12Qam na'maxachite', qaiyi qaica ca se icoñiguit qami' ma' ñaqa qami' ne'necoqui'. Ta'ta'a quiyim qami' naloqojnaxanaxat quená'maq mashic icoñiguit da na'qaatec, quedá'maq 'maxaraic retaxaỹaxaqui', chaqai dá'maq no'uen qayiquiaxaqui', chaqai da re'xorenataxanaxa'e', chaqai da no'ueenataxaqui', chaqai da rpi'ỹaxaqui', chaqai 'maxachitetegue da nachaalataxaqui'. 13Qam quiyim saqa' sovi', ca' qami' quiisalec quiyim taqaiseguelgoto naua la'qaatqa ñi qota'a quenaua lapoxoco, 'ñaxachisac na qarqaỹaripi, chaqai paxaguiñisac. 14Ỹaatqajam quirelec 'viichi' dá'maq lo'ueenataxanaxac dá'maq qoỹaañiraxarom quiñi qota'a na' saua la'gaxalate' ná'maq icoñiguit da na'qaatec queda llilnataxanaxac ñi qota'a quiyim ỹashil-lec qami'.
15Qam quiisalgoto quiyim ỹaatqajam ra'i'terelgoto nauajo, qaiyi ná'ogue iuana quiyim noquiiquetashiguim da no'ueenataxaqui'. 16Qam ỹaatqajam richilliralta' qami', ra'i'terelec dá'ogue dá'maq rapaxaguinataxanaxaqui', ỹaatqajam quiiterelec dá'maq sa'xatetac. Ca no'm 'viichi' dajo, ca ỹovireta'a quiyim qanca'laxatec qami' chaqai ná'ogue ná'maq na'xaỹaxantapega qami'.
Currently Selected:
1 Timoteo 4: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.