1 Timoteo 2
2
So Pablo rapaxaguinataxanegue da qouagaxainaxac
1Dá'maq 'avichiguiñi ỹaqataxac 'neetasa': quiyim quiitalec da nqouagaxainaxaguii, qam qouagaxaiñilec ná'ogue na qom, chaqai 'ỹaañishiguim da na'aachiguii quiñi qota'a. 2Sahotaque qai'neeta quiyim qanqouagaxainlec na nashillipi leta'allipi chaqai ná'ogue na lotauaripi, qaiyi qaica canchaqaica coqomi', qaiyi qara'maqachiguiñi, ma' ỹaatqajam ñañaanqot ñi qota'a, qaiyi quená'ogue na qana'ajnaxac qaỹa'maxarenta. 3Ca' dajo qanqouagaxainaxac ỹaatqajam chaqaida leloxoỹaxac, ca' ỹa'maxarenta ñi qota'a ñí'maq qarca'laxaqui. 4Ma' ñi'maxare ỹahotaque quiyim ná'ogue nca'leuec na qomyipi, ỹovireta'a nqai'en quiyim ỹaatqajam ỹa'den dá'maq ỹaatqajam llic. 5Ma' 'oonoqui' ñi qota'a, chaqai 'ue so 'oonoqui' qom ishit quiyim nemanachite'tot nqai'en na qomyipi ñi'maxare. So'maxare leenaxat Jesucristo. 6Ma' so Jesucristo nañaañiguit da lelauaxa, ca' ishiueten so laseuete da lca'laxa ná'ogue na qomyipi, ca' dajo qaỹa'xat na' chi ỹovita cá'maq laloqo'. 7Ca' chaqaida dá'maq dajo quiyim ñi qota'a ỹa'ue quiyim aỹim la'qaataxanqajnec chaqai lelaatec, quiyim sapaxaguinegue da 'neeta da npi'ỹaxac chaqai dá'maq ỹaatqajam llic leloxoỹaxac ná'maq mesqai judío laseripi. Ma' ỹim mashic seuelec so Cristo, ca' ỹaatqajam llic dá'maq sa'xatetac. Se ña'majan.
8Vichiguiño' sahotaque quiyim ná'ogue na qomyipi quiyim nqouagaxain, ca' ỹachaxansashiguim naua laua', qam ỹaatqajam nachinchiguiñi añi le'taxanata, sqai hueeto'ot ca lonogoxonaxac, chaqai se nco'uaate'e' ca liỹa. 9Chaqai sahotaque quiyim na 'aallipi ỹaatqajam ỹa'deenta da no'ueetaxac. Na'maxateta, chaqai se nemaqajnaxai, chaqai mesqai maqachaqaic da netagaxac, chaqai se no'viichigui ca 'ueetaxat oro, loqo'm aca lo'yaxana 'ueetqate, loqo'm ỹo'uet aca neloxoqui qoỹoqota'a nqai'en. 10Chaqaidaata quiyim ỹo'uet ca ỹa'maqachiguiñi, qaiyi 'ec no'ueetaxat. Ma' chaqaida da 'neetari' aca 'aalo queetalec ñi qota'a. 11Qai'neeta sahotaque quiyim ana 'aalo ỹaatqajam i'maqata quena' na'xaỹaxana da napaxaguinataxac. Se ỹa'maxañi quiyim se na'xaỹaxan. 12Ma' ana 'aalo se sasenem quiyim rapaxaguinataxan queca 'xoic qomyipi, chaqai quiyim napaqueteguelec ca ỹale. Ta'ta'a quiyim i'maqatam. 13Ma' ñi qota'a 'au ỹo'uet so Adán. Ca co'na' ime, ca ỹo'uet aso Eva. 14Ca mesqai so Adán só'maq qaỹayin. Qasoota aso Eva qaỹayin. Ca co'na' qaỹayin, ca' 'uo' da lasauaxaset. 15Qam aca 'aalo nca'leuec no'm netela'a da lco'oxoc quiyim queetalec da lpi'ỹaxac chaqai da le'xorenataxanaxa, chaqai quiyim co'taxateta da nachaalataxac, chaqai netelalta'.
Currently Selected:
1 Timoteo 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.