Matiə 2
2
Doɛ̃ wolen mɛnɛn nə da n yii kɔ Yezu ganaa
1Yezu na á yɛ Bɛtlehɛmu kiwi, Zudee gána nɛ, Erɔdi a kiibaa biikoo li. A yɛ kio, leere-dɔ̃lin nə́ n toa lɛ̀giala-n ǹ nə́ daa Zeruzalɛmu. 2Ǹ nə́ nɔ̀n da ǹ nə́ pɛ: «Nɛnyaan mɛn bɛ́ á yɛ, a n die Zuifun kii biɛ, a n maa? Wɔ́ n toa wɔa gána nɛ, wɔ́ a leere yɛ á bɔ lɛ̀giala-n, wɔ n wɔ́ daa a guguru kɔ.»
3Kii Erɔdi bɛ́ á bɛa boo lɛ ma lɔn, a din laanka Zeruzalɛmu minin tumaa gɔ́ɔ̃ nə́ n lɔlɔkɔn. 4Á wúlu-bɔlen goledɛnan laanka a gána a landa sii-daraalin lɛ sɔkɔn-a, á nɔ̀n da ǹ la: «Lawa pɛ mà asɛ á die Minin Nyin-sili mɛn diɛ, a n die yii kiwi mɛn nɛ?»
5Ǹ nə́ tɔ́n pɛ nɛ:
– Bɛtlehɛmu, Zudee gána nɛ, a giala, Lawa a boo gii-dali na á bɛ lɛ kiɛ̃, á pɛ:
6 #
MIS 5.2. «Kasɛn Bɛtlehɛmu minin lɛn,
ka baran taasɛ
mà ka dɔn dinin kiwi kɛ lɛ n kiɛɛrɛ Zudee gána a kiwin bii wa,
a giala, goledɛnaa á re boe a nɛ,
a giã Izirayeli mìi la,
ma din a minin lɛn, a ǹ tamaa.»
7Bɛ kio, Erɔdi doɛ̃ wolen lɛn bíi ka durii ni, á nɔ̀n da ǹ la ka leere lɛ a yɛ pinaa taãn nɛ, 8á tɔ́n nə ǹ dia Bɛtlehɛmu, á pɛ ǹ nɛ: «Ka woo, ka ga nɛnyaan lɛ li taãn-taãnɛ. Bɛ̀ ka yɛ, ka da pɛ ma nɛ, màn mɛn bɛ́ toɛ ma dɔ wo a guguru kɔ.»
9Kii bɛ́ á bɛa boon lɛn da ǹ nɛ á nya, ǹ nə́ kiɛ̃ ǹ nə́ zii saa. Ǹ bɛ́ ǹ nə́ leere mɛn yɛ bɛ̀ ǹ bɛ́ ǹ dinin gána nɛ, ǹ nə́ wusoo ǹ nə́ bɛ lɛ yɛ woe ǹ nyɛɛnɛ. A bɛ́ á woo á dɔ nɛnyaan lɛ a bǎã nɛ, á n zɔ̃ á golee. 10Leere lɛ a yɛ nyɛnyɛɛ gole baa ǹ ganaa parsiini. 11Ǹ nə́ wɔ kion lɛ nɛ, ǹ nə́ nɛ lɛ laanka ǹ dan Mariya yɛ. Ǹ nə́ kaa tán-a, ǹ nə́ nɛ lɛ guguru kɔ. Bɛ kio, ǹ nə́ ǹ mànan lɛ bũ ǹ nə́ gɔ ka sana nɛ, ka da yon gìĩ kɔɔ̃n laanka *miíri nyɔɔ gìĩ kɔɔ̃n nɛ, ǹ tumaa giɔ̀mɔ n kaka parsiini. 12Bɛ kio, Lawa nə́ n gɔn waa ǹ nɛ ka narɛɛ nɛ, mà ǹ baran wusoo ǹ wo Erɔdi li doo wa. Ǹ nə́ nɔmaa ǹ nə́ zii kɔsɔ saa ǹ nə́ woo ǹ gána nɛ.
Baa si a wo Ezipti boo
13Doɛ̃ wolen lɛn woo kio, Dɛnaa a dia dí-a wole goon nə́ bɔ lon á daa n din nyaa Zozɛfu ni ka narɛɛ nɛ, á pɛ nɛ: «Yoo, n nɛ lɛ laanka ǹ dan saa n baa si n wo Ezipti gána nɛ. Giã walan, yǎa ma wusii pii ni máa n nə n bɔyaa n daa. A giala, Erɔdi á re giɛ nɛ lɛ li mà yǎa asɛ dii.»
14Bɛ kio Zozɛfu nɛ lɛ saa, a laanka ǹ dan nɛ, á woo ǹ ne Ezipti tèlò-n. 15#OZ 11.1. Á giã walan yǎa Erɔdi gã. Lawa a boo gii-dali Dɛnaa a boo mɛn da, kɛ na á n zɛnaa á kɔnpɛ ka bɛ lɛ nɛ: «Má maa nɛgiĩ bíi á bɔ Ezipti.»
Nɛnyaanan dɛ boo
16Erɔdi bɛ́ á dɔ̃ mà doɛ̃ wolen lɛn ná asɛ bebele, a foo yoo parsiini. Á tɔ́n pɛ minin manɛ, mà ǹ wo Bɛtlehɛmu laanka a lɛkoro-an kiwin ni. Mà nɛginin mɛn din tumaa bɛ́ á dɔ lɛ̀ paa, hinlaa ta a na nyaabaa lɛ̀ paa ganaa, mà ǹ bɛ tumaa dɛ, a giala doɛ̃ wolen lɛn boo lɛ a diɛ lɛ̀ paa n ke Erɔdi ni. 17Lawa a boo gii-dali Zeremii boo mɛn da a na á kaa bɛ lɛ lɛ:
18 #
ZER 31.15. «Minin nə́ lɛ-dɛ ma boe Ramaa kiwi,
ǹ nə́ wuu laanka bubui lɛ ma.
Zakɔba a lɔ Raseli na a nɛnyaanan gɛ̀ wuu pii,
a ba lɛ koe foo wɔraa ganaa wa,
a giala ǹ kɔ́n ba a yɔrɔ-a doo wa.»
Bɔyaa Ezipti a da Nazarɛti
19Erɔdi bɛ́ á gã, bɛ̀ Zozɛfu bɛ́ Ezipti, Dɛnaa a lon a dia dí-a wole goon nə́ n din nyaa nɛ ka narɛɛ nɛ, 20á pɛ nɛ: «Yoo, n nɛ lɛ laanka ǹ dan saa, n wusoo n wo ǹ ne Izirayeli gána nɛ, a giala, min mɛnɛn bɛ́ ǹ nə́ goã giɛ li mà ǹ nɛ lɛ dɛ, bɛn nə́ gã.»
21Zozɛfu yoo, á nɛ lɛ laanka ǹ dan saa, á wusoo á woo Izirayeli gána nɛ. 22A bɛ́ á ma mà Arkelawusu nə ǹ di Erɔdi bǎã nɛ, Zudee gána a kii lɛa, bɛa bǎã lɛ a wo giãmanɛ a nyɛ́ɛ kũ. Lawa bɛ́ á wusoo á n gɔn waa nɛ ka narɛɛ kɔsɔ nɛ, á nɔmaa á dɛ a gòã nɛ yǎa Galilee gána nɛ, 23#MAR 1.24; LUK 2.39; ZAÃ 1.45. á tɔ́n woo giã kiwi goon ne walan, a tɔ n Nazarɛti. Lawa a boo gii-dalin bɛ́ ǹ nə́ pɛ mà ǹ tá re bíi "Nazarɛti min", a na á n zɛnaa miɛ̃ á bɛn boo lɛ lɛ pã.
Currently Selected:
Matiə 2: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.