YouVersion Logo
Search Icon

Éxodo 6

6
1Hinaqtinmi Señor Diosqa Moisesta khaynata contestaran:
—Qanqa kunanmi rikunki, imakunatas *rey Faraonta ruwasaq chayta. Noqaqa ancha atiyniywanmi nishu sasachakuykunata paypa contranpi ruwasaq. Chaymi payqa kay Egipto nacionninmanta ripunaykichista dejasunkichis; hinallataqmi llapallaykichista qarqosunkichispas, nispa.
2Señor Diosqa Moisestan nillarantaq:
—Noqan Señor Diosqa kani, nispa. 3Noqaqa “Tukuy Atiyniyoq Diosmi” kani. Chay sutiywanmi Abrahamman, Isaacman hinallataq Jacobmanpas rikhuriykurani. Ichaqa manan paykunamanqa “Señor Dios” sutiywanqa reqsichikuranichu. 4Hinaspapas noqaqa paykunawanmi *pactota ruwaspa, huk promesata ruwarani, Canaán allpata paykunaman qonaypaq. Chaypin paykunaqa forastero kaspa, ñawpaq tiempokunapi tiyaranku. 5Saynallataqmi noqaqa uyarini Israelpa miraynin runakuna nishuta ñak'arispa waqasqankutapas. Paykunataqa Egipto nacionniyoq runakunan esclavoman tukuchispa, nishuta llank'achishanku. Chayta rikuspan, paykunawan pacto ruwasqayta yuyarini. 6Chayraykuyá Israelpa miraynin runakunataqa khaynata ninki:
—Noqan Señor Diosqa kani. Noqan Egipto nacionpi *esclavo kasqaykichismanta orqosqaykichis. Hinaspan esclavo kaspa ñak'aririsqaykichismanta librasqaykichis. Noqaqa Egipto nacionniyoq runakunata anchata castigaspan, ancha atiyniywan librasqaykichis. 7Hinaspan noqaqa chashkisqaykichis llaqtay kanaykichispaq. Saynapin noqaqa qankunapa Diosniykichis kasaq. Hinaspan qankunaqa yachankichis, Egipto nacionpi ñak'arisqaykichismanta orqosuqniykichis Señor Dios kasqayta. 8Hinaspan noqaqa pusasqaykichis ñawpaq abueloykichiskunaman prometesqay allpaman. Chay allpata qonaypaqmi noqaqa huk juramentota ruwaspa, Abrahamman, Isaacman hinallataq Jacobman ima prometerani. Chay allpatan huk herenciata hina qosqaykichis, qankunapa kananpaq. Noqaqa Señor Diosmi kani, nispa.
9Saynatan Moisesqa Señor Diospa chaykuna nisqanta, Israelpa miraynin runakunaman willaran. Ichaqa manan Moisestaqa uyariyta munarankuchu, ancha desanimasqa kasqankurayku hinallataq esclavo kaspanku nishuta ñak'arisqankurayku.
10Hinaqtinmi Señor Diosqa Moisesta khaynata niran:
11—Egipto nacionpi rey Faraonman rispayki, khaynata nimuy: “Israelpa miraynin runakunata dejay, llaqtaykimanta ripunankupaq”, nispa.
12Ichaqa Moisesqa Señor Diostan khaynata contestaran:
—Manan Israelpa miraynin runakunaqa uyariwarankuchu. Hinaspapas noqaqa manan faciltachu rimani. ¿Chaychu rey Faraonri noqata uyariruwanqa? nispa.
13Hinaqtinmi Señor Diosqa Moisesta hinallataq Aarontawan rimapayaran. Hinaspan kamachiran, Israelpa miraynin runakunata hinallataq rey Faraontawan khaynata nimunankupaq: “Señor Diosmi kamachimuwanku, llaqtamasiy Israelpa miraynin runakunata kay Egipto nacionmanta orqonaykupaq”, nispanku.
Aaronpa hinallataq Moisespa ñawpaq abuelonkunamanta
14Moisespa hinallataq Aaronpa ñawpaq abuelonkunaqa kaykunan karanku:
Rubén, payqa karan Israelpa kurak kaq wawanmi. Rubenpa wawankunaqa kaykunan karanku: Hanoc, Falú, Hezrón hinallataq Carmi ima. Paykunan Rubenpa familiankunaqa karanku.
15Simeonpa wawankunaqa kaykunan karanku: Jemuel, Jamín, Ohad, Jaquín, Zohar hinallataq Saúl ima. Kay Saulqa Canaán nacionniyoq warmipa wawanmi karan. Paykunan Simeonpa familiankunaqa karanku.
16Leviypa wawankunaqa kurakmanta asta sullk'akaman kaykuna karanku: Gersón, Coat hinallataq Merari. Leviyqa kawsaran 137 watankaman.
17Gersonpa wawankunaqa kaykunan karanku: Libni hinallataq Simei. Paykunan Gersonpa familiankunaqa karan.
18Coatpa wawankunaqa kaykunan karanku: Amram, Izhar, Hebrón hinallataq Uziel. Coatqa 133 watatankaman kawsaran.
19Meraripa wawankunaqa kaykunan karanku: Mahli hinallataq Musi.
Paykunan Leviypa mirayninkuna karanku, kurakmanta asta sullk'akama.
20Amram sutiyoq runan casarakuran tian Jocabet warmiwan. Paymi onqokuran Aaronta hinallataq Moisestawan ima. Amramqa 137 watankaman kawsaran.
21Izharpa wawankunaqa kaykunan karanku: Coré, Nefeg hinallataq Zicri.
22Uzielpa wawankunaqa kaykunan karanku: Misael, Elzafán hinallataq Sitri.
23Aaronmi casarakuran Elisabetwan. Elisabetqa Aminadab sutiyoq runapa ususinmi karan hinallataq Naasonpa hermanan ima. Elisabetpa onqokusqan wawankunaqa kaykunan karanku: Nadab, Abiú, Eleazar hinallataq Itamar ima.
24Coreypa wawankunaqa kaykunan karanku: Asir, Elcana hinallataq Abiasaf. Paykunan Coré runapa familiankuna karanchu.
25Aaronpa wawan Eleazarmi casarakuran Futielpa ususinwan. Hinaspan chay warmiqa onqokuran Finees sutiyoq qari wawanta. Paykunan jefekuna karanku, papanku Leviypa mirayninman hina.
26Kay miraymanta nacemuq Aaronta hinallataq Moisestawanmi Señor Diosqa ñawpaqtaraq rimapayaran khaynata:
—Egipto nacionmanta Israelpa miraynin runakunata orqomuychis grupo-grupokunapi, nispa. 27Paykunan Egipto nacionpi rey Faraonta rimapayaranku, Israelpa miraynin runakunata chay nacionmanta orqomunankupaq.
Moisesta Dios kamachisqanmanta
28Señor Diosmi Moisesta Egipto *nacionpi 29rimapayaran khaynata:
—Noqan kani Señor Diosqa. Egipto nacionpi *rey Faraonta niy noqapa tukuy nisqaykunata, nispa.
30Ichaqa Moisesñataqmi Señor Diosta contestaran khaynata:
—Noqaqa manan ni allin rimaytapas atinichu. ¿Chaychu noqatari rey Faraón kasuruwanqa? nispa.

Currently Selected:

Éxodo 6: QEAÑT

Highlight

Share

Copy

None

Want to have your highlights saved across all your devices? Sign up or sign in