Éxodo 1
1
Egipto nacionniyoq runakuna Israelpa miraynin runakunata ñak'arichisqankumanta
1Israelpa wawankunaqa sapankamankun familiantinkama Egipto *nacionmanqa haykuranku. Papanku Jacobpas paykunawanmi riran. Jacobpa chay wawankunan kaykuna karanku: 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad hinallataq Aser ima. 5Jacobpa llapallan mirayninkunaqa qanchis chunkan karanku. Ichaqa Joseyqa ñan Egipto nacionpiña kasharan. [Nota: Jacobpa huknin sutinmi karan Israel.]
6Chaymantan Joseyqa wañukapuran, wawqenkunapas hinallataq Egipto nacionman riq llapallan wiñaymasin runakunapas.
7Ichaqa Israelpa mirayninkunaqa ashka wawayoqmi karanku. Saynapin paykunaqa ashkallamanña miraspanku, Egipto nacionmanqa hunt'asharanku. Chayraykun paykunaqa ancha atiyniyoqman tukuranku.
8Ashka watakuna pasaruqtinmi, huk *rey Egipto nacionta gobiernananpaq haykuran. Payqa manan Joseymantaqa yacharanñachu. Chayraykun Egipto nacionninpi runakunata khaynata niran:
9—Qawariychis kay Israelpa miraynin runakunata. Paykunaqa nishu ashkallatañan mirarunku. Hinaspapas paykunaqa aswan más atiyniyoqmi noqanchismantaqa kashanku. 10Kunanqa yuyaywan paykunapa contranpi planeasunchis, paykuna amaña miranankupaq. Mana chayqa yanqan ima guerraña kaqtinpas, enemigonchiskunawan juntarukuspanku, noqanchispa contranchispi peleankuman. Hinaspa noqanchista ganaruwaspanchis, kay Egipto nacionninchismanta ripunkuman, nispa.
11Chayraykun Egipto nacionniyoq runakunaqa capatazkunata churaranku, Israelpa miraynin runakunata, nishu sasa llank'aykunapi anchallataña llank'achispanku, ñak'arichinankupaq. Chaymi chay capatazkunaqa Israelpa miraynin runakunata nishullataña llank'achispanku, ruwachiranku Pitón llaqtata hinallataq Ramesés llaqtatawan ima, chay llaqtakunapi mikhuykunata rey Faraón waqaychananpaq. 12Ichaqa Israelpa miraynin runakunata nishullataña llank'achispa astawan ñak'arichishaqtinkupas, paykunaqa astawanraqmi miraranku. Chaymi Egipto nacionniyoq runakunaqa Israelpa miraynin runakunata aswan mastaraq manchakuranku. 13Hinaqtinmi Egipto nacionniyoq runakunaqa, Israelpa miraynin runakunataqa anchallataña ñak'arichispanku, esclavomanta servichikuranku. 14Hinaspan Israelpa miraynin runakunataqa anchallataña obligaspanku, mana atina llank'aykunapi llank'achiranku. Hinaspan sinchillataña ñak'arichiranku kay ruwaykunapi: barro tupachiypi, ladrillokuna ruwaypi hinallataq campopi tukuy ima llank'aykunapiwan ima. 15Egipto nacionpin ishkay parterakuna karanku, Israelpa miraynin warmikuna wawata onqokuqtinku atiendenankupaq. Chay parterakunapa sutinkun karan Sifra hinallataq Fúa. Chay parterakunatan Egipto nacionpi reyqa waqyachimuspa, khaynata kamachiran:
16—*Hebrea warmikuna wawata onqokuqtinkuqa qankunayá atiendenkichis; hinaspa fijakunkichis qarichus icha warmichus chay nacemuq wawa kasqanta. Sichus qari kaqtinqa wañuchinkichisyá. Ichaqa sichus warmi kaqtinqa aman wañuchinkichishchu, nispa.
17Ichaqa chay ishkaynin parterakunan Diosta anchata respetaranku. Chaymi paykunaqa Egipto nacionpi reypa kamachisqantaqa mana kasukurankuchu. Hinaspan qari wawakuna nacemuqtinqa, mana wañuchirankuchu. 18Chaymi Egipto nacionpi reyqa, chay parterakunata waqyachimuspa, khaynata tapuran:
—Chay qari wawakuna nacemuqkunatari, ¿imanaqtintaq qankunari dejarankichis kawsanankupaq? nispa.
19Hinaqtinmi chay parterakunaqa khaynata contestaranku:
—Israelpa miraynin warmikunaqa manan Egipto nacionniyoq warmikuna hinachu kanku. Paykunaqa kallpasapa fuerte kasqankuraykun, mana nishuta ñak'arispa, facillata onqokunku. Chayraykun noqayku manaraq chayashaqtiyku, paykunaqa ña onqorukunkuña, nispa.
20Israelpa miraynin runakunaqa anchatan miraranku hinallataq atiyniyoq iman karanku. Hinaspapas Diosmi chay parterakunataqa yanaparan. 21Señor Diosta chay parterakuna manchakuywan respetasqankuraykun, Señor Diosqa permitiran chay parterakunapa familiankunapas ashka wawayoq kanankupaq.
22Chaymi rey Faraonqa llaqtanpi llapallan runakunata khaynata kamachiran:
—*Hebreo rimayniyoq runakunapa qari wawanku nacemuqtinqa, chay wawakunataqa llapallantan Nilo mayuman wikch'uyuychis. Ichaqa warmi nacemuqtinqa, chay warmi wawakunataqa aman wañuchinkichishchu, nispa.
Currently Selected:
Éxodo 1: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional