ISAIAH 2
2
Zungzal Hmunmi Daihnak
1Judah le Jerusalem kong ah Pathian nih Amoz fapa Isaiah cu hi bangin bia a chimh:
2Hmailei caan pi ah cun
Bawipa biakinn a dirnak tlang hi
tlang vialte lakah a sang bik tlang
a si lai.
Miphun vialte kha cuka ah cun
an ra luaimai lai i
3mi tampi nih an i thawh lai i,
“Bawipa tlang ah cun hung
kal u sih,
Israel Pathian biakinn ahcun hung
kal u sih.
Tuah hna seh ti a kan duhmi tuah kha
kan thiam lai i
a kan thimpiakmi lam kha kan zulh
lai,” an ti lai.
Bawipa cawnpiaknak cu Jerusalem in
a ra i
a mi hna sinah Zion in bia a chim.
4Miphun ngan pipi an i siknak cu
a remh hna lai.
An vainam cu tuhmui ah an ser hna lai i
an fei cu namtong ah an ser hna lai.
Phun khat le phun khat an i do ti lai lo,
ral doh zong an i tim ti lai lo. #Joe 3.10
5Atu cu, Jakob tefa hna, Bawipa nih a kan pekmi ceunak chungah cun i chawk cang u sih!
Bawipa Pathian A Ra Lio
6Pathian, na mi Jakob tefa hna cu na hlawt cang hna. Nichuahlei in a rami camhthiam hna le Filistia ram in a rami camhthiam hna cu, hi ram hi an khat dih i hi ram mi hna nih, cu hna phung cu an zulh ve. 7An ram cu sui le ngun in a khat i an rumning cu a dongh in dongh a hngal lo. An ram cu rangtum an khat i an rangleng cu rel cawk lo an si. 8An ram cu siasal in a khat i anmah nih an kut in an ser chommi thil kha an biak hna.
9An dihlak in ningzahnak le hmai-chiatnak an phan lai. Bawipa, annih cu ngaihthiam hna hlah!
10 Bawipa thinhunnak kha thuhtak awkah le a ṭhawnnak le a sunparnak kha thuhtak awkah, lungpang tamnak tlang lungkua chungah an i thup lai, asiloah, vawlei ah khor an i cawh lai. #Biat 6.15; 2The 1.9 11Minung porhlawtnak le ruamkainak a dongh lai ni kha a ra lio. Khi tikah Bawipa cu hlorh a si lai. 12Khi ni ah cun Ralkapbu Bawipa nih a ṭhawngmi le aa porhlawmi le a ruam a kaimi vialte kha a ṭhumh dih hna lai. 13Lebanon tlang i a ummi sidar thingkung sang vialte hna le Bashan ram i a ummi kuhthing vialte hna cu a hau dih hna lai. 14Tlang sang hna le fing bo hna kha a rawnhter hna lai i 15inn sang hna le khua kulhnak ralhau vialte cu a chimh dih hna lai. 16Lawng ngan bikbik hna le lawng dawh bikbik hna hmanh kha ti chungah a pilter dih hna lai. 17Cun minung porhlawtnak cu a dong lai i minung ruamkainak cu a rawk lai. Cu ni a phak tikah cun Bawipa lawnglawng kha hlorh a si lai i 18siasal cu an lo dih lai.
19 Bawipa cu vawlei kha hninh awk i a rat tikah, a thinhunnak zamtak awkah le a lianhngannak le a sunparnak kha thuhtak awkah, mi cu lungpang tamnak tlang lungkua ah khan an i thup lai, asiloah, vawlei ah khor an i cawh hna lai. 20Cu ni a phak tikah cun, an i serchommi sui siasal hna le ngun siasal hna kha, tawte le palak an hlonhhnawh hna lai. 21Bawipa cu vawlei kha hninh awk i a rat tikah, a thinhunnak zamtak awkah le a lianhngannak le a sunparnak kha thuhtak awkah mi cu lungpang tamnak tlang lungkua hna le khor chungah khan an i thup lai.
22Thih thiammi minung cu i bochan hna hlah u. Zeihmanh an ṭhathnem ṭung lo.
Currently Selected:
ISAIAH 2: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006