LAMKALTU 2
2
Thiang Thlarau A Rung Ṭum
1Pentekos ni kha a phak tikah zumtu vialte cu hmunkhat ah an i pum. #Lev 23.15-21; Deu 16.9-11 2Chikkhatte ah khin van in aw pakhat a rung i a thawng cu thlitu fak piin a hrangmi thawng bantuk a si i an ṭhutnak inn kha a khat dih. 3Cun meizik he aa lomi leiṭe an hung chuah kha an hmuh hna i cuka i a ummi hna an dihlak cungah khan lei cu pakhat cio ah an i fu. 4Annih cu Thiang Thlarau in an khat i Thlarau nih chim khawhnak a pek hna bantuk cio khan, holh dang in an holh.
5Cun Jerusalem khua chungah vawleicung khuazakip in a rami Judah mi an um liote kha a si; cu hna cu biaknak lei i aa zuam ngaingaimi pawl kha an si. 6Cu thawng cu an theih tikah mi tampi an i pum. A zummi hna an holh tikah khan midang aa pum vemi hna nih khan kanmah holh in an holh, tiin an rak theih cio tikah khan an khuaruah a har ngaingai. 7An lung a suk ngaingai hna i, “Hiti in bia a chimmi hna hi Galilee mi an si ko ṭung! 8Zeitindah kan i chuahkehpimi holh cio holh in kan dihlak in kan theih kun hna? 9Kannih cu Parthia ram hna, Media ram hna, Elam ram hna, Mesopotamia ram hna, Judea ram hna, Kappadosia ram hna, Pontas ram hna, Asia ram hna, 10Frizia ram hna, Pamfilia ram hna, Izipt ram hna le Libia ram chung i a ummi Sairin khua pawng ram hna in a rami kan si; cun a cheu cu Rom khua in a rami kan si, 11Judah mi kan si ah, Judah phun aa hrawmmi Jentail mi kan si ah, cun a cheu cu Krit tikulh le Arabia ram in a rami kan si fawn — asinain Pathian nih thil lianngan a tuahmi hna kha an chim tikah an chimmi cu kan holh in an chim tiin kan theih cio hna,” tiah an ti. 12Khuaruahhar le lung-ar in, “Mah hihi a sullam zeidah a si hnga?” tiah pakhat le pakhat an i hal lengmang.
13Sihmanhsehlaw midang nih cun an nihsawh hna i, “Hi hna hi zu an ri,” tiah an ti hna.
Peter Phungchimnak
14Khi tikah Peter cu lamkaltu hleikhat hna he khan a hung dir i, aw thang ngaiin a thawh hna i, “Ka phun hawi Judah mi hna le Jerusalem khua ah a ummi vialte hna, hiti in thil a hung ummi sullam hi zeidah a si tiah kan chimhmi hna hi ṭha tein ngai tuah u. 15Hi mi hna hi nannih nih nan ruahnak ah zu an ri, nan ti; cucu a si lo, zu an ri lo; atu cu zinglei suimilam pakua lawng pei a si ko rih hi. 16Zeidah a si deuh ti ahcun, Pathian nih profet Joel kaa in a rak chimmi kong kha a si. Zeitindah a ti tiah:
17‘Ni hmanung bik ah cun mi vialte kha
ka Thlarau ka toih hna lai.
Nan fapa hna le nan fanu hna nih
bia an chim lai;
Nan tlangval hna nih langhnak
an hmuh lai i
Nan tar hna nih mang an manh lai. #Joe 2.28-32
18Asi, ka salnu hna le ka salpa hna cung
hmanh ah khan cu ni ah cun
ka Thlarau kha ka bungh lai i
bia an chim lai.
19Cunglei van ah khin khuaruahharmi
thil ka tuah hna lai i
Tanglei vawlei ah hin hmelchunhnak
ka umter hna lai — thisen le
mei le a chahmi meikhu an si lai.
20Bawipa Ni, a sunglawimi ni le
a liannganmi
ni a phak hlanah khan
Ni cu a mui lai i thlapa cu thisen
bantukin a sen lai.
21Cu tikah Bawipa min a aumi paoh cu
khamhnak an hmu lai,’ a ti.
22“Israel mi hna, hi ka bia hi ngai tuah u. Nazareth khuami Jesuh cu Pathian nih rian a fialmi a si ti kha, Pathian nih amah thawngin a tuahmi khuaruahharnak tehna, hmelchunhnak tehna le thil lianngan hna nih khan an langhter ko; hi ka chimmi hi nanmah hrimhrim nih nan hngalhmi an si, zeicahtiah nanmah lak hrimhrim ah a rak tuahmi thil an si. 23Pathian nih Jesuh cu nan sin i pek awkah khan a rak ruah ciami le a rak khiah ciami a si bangin nannih nih amah cu nan thah, misual mi hna kha amah cu vailamtahnak thing cungah thir in nan khenhter hna. #Mat 27.35; Mar 15.24; Luk 23.33; Jhn 19.18 24Sihmanhsehlaw Pathian nih amah cu mithi hna sin khan a thawhter ṭhan, thihnak nih amah cu a tlaih peng khawhnak ding zeihmanh a um lo. #Mat 28.5-6; Mar 16.6; Luk 24.5 25David nih amah kong hi hi bantukin a rak chim i,
‘Bawipa cu ka hmaiah ka hmuh
zungzal ko;
Ka orhlei kam i a um caah khan
ka awlok a chong lai lo, #Slm 16.8-11
26Hi ruangah hin ka lung cu aa lawm i
ka bia cu thanuamnak in a khat;
Kei cu a thi ko dingmi minung
si hmanh ning law
27Mithikhua ah khan ka thlarau cu
na kaltak lai lo caah
Ruahchannak ngei in hnangam tein
ka um ko lai.
Nangmah an tlaihchanmi na sal cu
ṭhutnak kha na hmuhter lai lo.
28Nunnak lei kalpitu lam kha
na ka hmuhsak i
Nangmah cu ka sinah na um caah
lawmhnak in ka khat,’
a rak ti.
29“U le nau hna, kan pu David kong kha fiang tein in chim tuah hna ning. Anih cu a thi i an vui i nihin ni tiang hin a thlan zong kan sinah a um ko rih. 30Amah cu profet a rak si i Pathian nih a sinah biakamnak a tuahmi kha a hngalh. Pathian nih bia a rak kammi cu, David tefa pakhat khat cu amah David bantuk khan siangpahrang ah a canter te lai, ti hi a si. 31David nih cun Pathian nih zeidah a tuah lai ti kha a rak hmuh i cu caah, ‘Amah cu mithikhua ah a kaltak lo, a titsa cu thutnak a hmu lo,’ tiah a rak ti tikah hin, Messiah a thawh ṭhan lainak kong kha a chimmi cu a si. 32Pathian nih hi Jesuh hrimhrim hi mithi hna sin cun a thawhter i hi thil tehte a khangtu cu kanmah hi kan si. 33Pathian orhlei kamah khan ṭhutter a si i a Pa nih bia a kam bantuk khan Thiang Thlarau cu a Pa sin khan a hmuh; cun atu i nan hmuhmi le nan theihmi hi kannih a kan toihmi a laksawng kha a si. 34Zeicah kan ti ahcun amah David cu vancung ah a kai ṭung lo, aa thawh i pei:
‘Bawipa nih ka Bawipa cu,
“Ka orhlei kamah hin ṭhu tuah,
35Na ke tangah na ral hna cu na kelamh ah ka chiah hna hlan tiangin,” a ti cu,’ tiah a ti kha.
36“Israel mi vialte hna, nannih nih vailam tahnak thing cungah nan khenh chihmi Jesuh hrimhrim hi Pathian nih Bawipa ah le Messiah ah a ser cang, ti kha fiang tein hngal u,” tiah a ti. 37Hi kong kha an theih tikah an lungthin a hriah ngaingai hna i Peter le lamkaltu dang kha an thawh hna i, “U le nau hna, zeidah kan tuah kun lai?” an ti.
38Peter nih annih cu a thawh hna i, “Nan dihlak in, pakhat hmanh bau loin, nan sualnak khan i mer tuah u, nan sualnak kha, ngaihthiam nan si nakhnga nan sualnak khan i mer u law Jesuh Khrih min in tipilnak ing tuah u; cun Pathian laksawng Thiang Thlarau kha nan hmuh lai. 39Zeicahtiah Pathian nih bia a kamhmi hna cu nanmah hi le nan fale hna hi le lam hlat pipi i a ummi hna zong nan si — Bawipa kan Pathian nih an kawhmi hna paoh caah hin a si,” tiah a ti.
40Peter nih cun bia dang zong tampi a chimh hna i, “Hi chan ṭhalo cungah a tlung dingmi dantatnak hin luat i zuam ko u,” tiah a forh hna. 41Mi tampi nih a bia cu an zumh i tipil kha an in; cu ni ah cun an bu ah mi thong thum tluk an i chap. 42Lamkaltu hna cawnpiaknak ngaih awkah khan atu le atu an i pum i hawikomhnak ah khan an i tel i hawikomhnak rawl an dum ṭi i thla an cam ṭi lengmang. 43Lamkaltu hna kha Pathian nih khuaruahharnak le hmelchunhnak tampi a tuahter hna i cu nih cun mizapi kha ṭihnak in a khahter hna. 44A zummi vialte hna cu i kom ṭhipṭhep tein khua an sa i an thil kha pakhat le pakhat an i hrawm. #Lam 4.32-35 45An thil le an ngeihmi kha an zuar hna i tangka an hmuhmi kha a dihlak in an herhning cio paoh in an i phaw. 46Ni fate in a bute in biakinn chungah khan an i pum i an inn ah khan rawl an i hrawng cio hna i lunglawmhnak lungthin le toidornak lungthin he rawl cu an ei. 47Pathian kha an thangṭhat i mi vialte nih an hmaizah hna. Cun khamh a si liomi hna cu Bawipa nih ni fate in an bu chungah khan a luhter lengmang hna.
Currently Selected:
LAMKALTU 2: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006