2 SIANGPAHRANG 13
13
Jehoahaz Pennak
1Judah siangpahrang Ahaziah fapa Joash a bawi kum kul le kum thumnak ah Jehu fapa Jehoahaz nih Israel ram cu Samaria in pen hram aa thawk i kum hleisarih a pen. 2Bawipa mithmuh i thil ṭhalo kha a tuah i Nebat fapa Jeroboam nih Israel mi a sualternak hna a sualnak kha a zulh hna i a kaltak hna lo. 3Cun Bawipa thinhunnak cu Israel cungah a alh i Siria siangpahrang Hazael le Hazael fapa Benhadad hna kut chungah khan annih cu a pek lengmang hna. 4Khi tikah Jehoahaz nih Bawipa kha a nawl i, Israel mi an temhinnak, zeitindah Siria siangpahrang nih a hrem hna kha a hmuh caah, a bia kha a theihpiak. 5(Cucaah Bawipa nih Israel mi cu khamhtu a pek hna i Siria mi hna kut chung khan an luat i hlanlio bantuk khan Israel mi cu an inn ah khua an sa. 6Sihmanhsehlaw Jeroboam nih Israel mi a sualternak hna Jeroboam innchungkhar sualnak kha an kaltak hna lo i an zulh hna; cun Asherah zong kha Samaria khua ah a um ko). 7Zeitintiah Jehoahaz ralkap hna cu rangcung ralkap sawm nga le rangleng pahra le ke ralkap sang khat nak tam an tang ti lo; zeicahtiah Siria siangpahrang nih a hrawh hna i rawl cil tik i leidip bantuk ah khin a ser hna. 8Jehoahaz tuahsernak a tang rihmi le a tuahmi vialte le a ṭhawnnak hna cu Israel Siangpahrang hna Chanrelnak Cauk chungah an i ṭial lo mei? 9Cuticun Jehoahaz cu a pupa hna sinah a it i Samaria khua ah an vui; cun a fapa Jehoash cu amah hmun ah khan a hung bawi.
Jehoash Pennak
10Judah siangpahrang Joash a bawi kum sawm thum le kum sarihnak ah Jehoahaz fapa Jehoash cu Israel kha Samaria khua in pen hram aa thawk i kum hleiruk a pen hna. 11Amah zong nih Bawipa mithmuh i thil ṭhalo kha a tuah ve; Nebat fapa Jeroboam nih Israel mi a sualternak hna a sualnak vialte kha a kaltak hna lo, sihmanhsehlaw a zulh lehlam hna. 12Jehoash tuahsernak a taang rihmi le a tuahmi vialte le Judah siangpahrang Amaziah a doh i a ṭhawnnak vialte kha, Israel Siangpahrang hna Chanrelnak Cauk chungah an i ṭial lo mei? 13Cuticun Jehoash cu a pupa hna sinah a it i a bawi ṭhutdan cungah khan Jeroboam a ṭhu; cun Jehoash cu Samaria khua ah Israel siangpahrang hna sinah khan an vui.
Elisha Bia Hmanung Bik le Thihnak
14Elisha cu a thihpi hnga ding zawtnak in a zawt tikah, Israel siangpahrang Jehoash cu a vung kal i a hmaiah a ṭap i, “Ka pa, ka pa! Israel mi rangleng hna le rangcung ralkap hna khing!” tiah a ti. #2Sia 2.12 15Cun Elisha nih amah cu a thawh i, “Li le cantiang i lak hna,” tiah a ti; cucaah li le cantiang cu aa lak hna. 16Cun Israel siangpahrang cu, “Li kha kuai tuah,” tiah a ti i a kuaih. Cun Elisha nih siangpahrang kut cungah cun a kut a chiah hna. 17Cun aa thawh i, “Nichuahlei thlalangawng kha hung,” tiah a ti i a hun. Cun Elisha nih, “Kap tuah,” tiah a ti i a kah. Cun a thawh i, “Bawipa teinak cantiang, Siria teinak ding cantiang! Zeitintiah Siria mi cu Afek ah an dongh cikcek tiangin na tei hna lai,” tiah a ti. 18Cun a thawh i, “Cantiang kha la hna,” tiah a ti i a lak hna. Cun Israel siangpahrang cu, “Cantiang cun vawlei kha tu hna,” tiah a ti i voi thum a tuk i a ngol. 19Cun Pathian mi cu a cungah a thin a hung i, “Voi nga, voi ruk in pei na tuk awk a si cu, cu ti na tuah ahcun Siria mi cu an dongh cikcek hlantiang na tei hna hnga, sihmanhsehlaw atu cu Siria mi kha voi thum tiang lawng na tei hna lai,” tiah a ti.
20Cuticun Elisha cu a thi i an vui. Moab mi bu hna nih ṭhal caan ah hin ram cu an hung chim tawn. 21Cun mipa pakhat an vui lioah khan ramhtu pawl bu khat cu an hmuh hna i mipa cu Elisha thlan chungah an thlak; cun mipa nih Elisha ruh a vun tawngh cangka hna cun a nung ṭhan i a ke in a dir.
22Siria siangpahrang Hazael nih Jehoahaz chan chung vialte cu Israel mi kha a hrem hna. 23Sihmanhsehlaw Bawipa cu an cungah vel a ngei i a zaangfah hna i Abraham, Isak le Jakob sin i a biakamnak ruangah khan anmah leiah aa mer i a hrawk hna lo; a hmaika zongin atu tiangin a hlonh hna lo.
24Siria siangpahrang Hazael cu a thih tikah a fapa Benhadad cu amah hmun ah khan siangpahrang ah a cang. 25Cun Jehoahaz fapa Jehoash nih khan Hazael fapa Benhadad sin khan, a pa Jehoahaz sinin Hazael nih ral lio i a rak lakmi khua kha a lak ṭhan hna. Jehoash nih amah cu voi thum a tei i Israel khua kha a lak ṭhan hna.
Currently Selected:
2 SIANGPAHRANG 13: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006