2 SIANGPAHRANG 14
14
Amaziah Pennak
(2Cha 25.1-28)
1Israel siangpahrang Joahaz fapa Jehoash a bawi kum hnihnak ah, Judah siangpahrang Joash fapa Amaziah cu pen hram aa thawk. 2Pen hram aa thawk ah kum kul le kum nga a si i Jerusalem in kum kul le kum kua a uk. A nu min cu Jehoaddin a si, Jerusalem khuami a si. 3Bawipa mithmuh ah a dikmi kha a tuah, asinain a pu David bantuk ngaingai kha cu a si lo; zeizong vialte a tuahnak ah khan a pa Joash nih a tuah bantuk khan a tuah. 4Sihmanhsehlaw khuahrum bo kha a hrawk hna lo i khua hrum bo ah cun mi nih rai an thawi i zihmui kha an khangh ṭheo ko rih. 5Cun siangpahrang nawlngeihnak kha a kut chungah fek tein a um cangka, a sinum hna, a pa siangpahrang a rak thattu kha a thah hna. 6Sihmanhsehlaw Moses phungbia cauk ah, “Pale hna cu fale can ah thah an si lai lo i fale hna zong pale can ah thah an si lai lo, sihmanhsehlaw mah le sualnak ruang cio ah thah an si lai,” tiah Bawipa nawlbia pekmi aa ṭial bantuk khan, lainawngtu hna an fale cu a that hna lo. #Deu 24.16
7Cite Nelrawn ah Edom mi thong hra a thah hna i Sela cu hlauhsaphak in a lak, cun Jokthe-el tiah min a sak i cu cu nihin tiang hin a min a si lan.
8Cun Amaziah nih Israel siangpahrang, Jehu fapa Jehoahaz i fapa Jehoash sinah khan lamkal a hei thlah hna i, “Ra tuah, pakhat le pakhat hmaitonh tein i zoh tuah u sih,” tiah a ti. 9Cun Israel siangpahrang Jehoash nih cun Judah siangpahrang Amaziah cu bia a leh i, “Lebanon tlang i a ummi hlingkung nih Lebanon tlang i a ummi sidar thingkung sinah bia a cah i, ‘Na fanu cu ka fapa nupi caah ka pe tuah,’ tiah a ti; cun Lebanon i ram sa pakhat cu a ra i hlingkung cu a lamh i a nan. 10Edom cu na tei taktak ko i na hnar a puar hi ta. Sunparnak na hmuhmi cu i za ko law inn ah um ko; zeicahtiah zeicahdah nangmah tluknak dingah le nangmah sinah Judah zong tlukter dingin hnahnawhnak kha na chuahter lai?” a ti.
11Sihmanhsehlaw Amaziah nih a ngai duh lo. Cucaah Israel siangpahrang Jehoash cu a hung kal i Judah ta a simi Beth-shemesh khua ah cun Judah siangpahrang Amaziah he khan pakhat le pakhat hmaitonh in an i do. 12Cun Judah cu Israel nih a tei i an inn cio ah an zam dih. 13Cun Beth-shemesh ah cun Israel siangpahrang Jehoash nih khan Judah siangpahrang Amaziah cu a tlaih, amah cu Joash fapa a si, Joash cu Ahaziah fapa a si. Cun Jerusalem ah a ra i ralhau kha Efraim Kutka in Kulhnak Kil Kutka tiang dong zali a chimh. 14Cun Bawipa inn chungah a ummi le siangpahrang inn rokuang chungah a ummi sui le ngun vialte le umkheng vialte kha a lak hna i hreng i a tang dingmi zong kha a tlaih hna; cun Samaria khua ah a kir.
15Jehoash tuahsernak a tang rihmi le a ṭhawnnak le zeitindah Judah siangpahrang Amaziah he an i tuknak kha, Israel Siangpahrang hna Chanrelnak Cauk chungah an i ṭial lo mei? 16Cun Jehoash cu a pupa hna sinah a it i Israel siangpahrang hna sinah khan Samaria khua ah an vui; cun a fapa Jeroboam cu amah hmun ah khan bawi a hung cang.
17Judah siangpahrang Joash fapa Amaziah cu, Israel siangpahrang Jehoahaz fapa Jehoash thih hnuah kum hleinga a nung. 18Amaziah tuahsernak a tang rihmi hna cu Judah Siangpahrang hna Chanrelnak Cauk chungah an i ṭial lo mei? 19Cun amah rawinak ding kha Jerusalem ah an tuah i Lakhish ah a zam. Sihmanhsehlaw Lakhish ah cun mi an hei dawiter hna i khika ah khan an thah. 20Cun rang in an tlunpi i Jerusalem khua chungah a pupa hna sinah khan David khua chungah an vui. 21Cun Judah mi vialte nih kum hleiruk a timi Azariah kha an lak i a pa Amaziah hmun ah khan siangpahrang ah an ser. 22Siangpahrang kha a pupa hna sinah a ih hnuah Elath khua kha a ser i Judah ram chungah a chiah ṭhan.
Jeroboam Pennak
23Judah siangpahrang Joash i a fapa Amaziah a bawi kum hleinganak ah, Israel siangpahrang Jehoash i fapa Jeroboam cu Samaria khua ah bawi hram a thawk i kum sawm li le kum khat a pen hna. 24Cun amah nih Bawipa mithmuh i thil ṭhalo kha a tuah; Nebat fapa Jeroboam nih Israel mi a sualter hnanak a sualnak vialte kha a kaltak hna lo. 25Amah nih Israel ramri cu Hamath khua luhnak khan Arabah Rili tiang a siter ṭhan; mah cucu Bawipa, Israel Pathian nih a sal profet Jonah sinin a rak chimmi ning khan a si; Jonah cu Gath-hefer khuami Amittai fapa a si. #Jon 1.1 26Zeitintiah Israel mi nih hremnak an inmi cu a fak ngaingai ti kha a hmuh, zeitintiah ahohmanh an tang ti lo, sal si hna seh, miluat si hna seh, Israel bawmtu dingah pakhat hmanh an tang ti lo. 27Sihmanhsehlaw Bawipa nih Israel min cu vanrang toi hin ka hloh lai, a ti lo, cucaah Joash fapa Jeroboam kut in a khamh hna.
28Jeroboam tuahsernak a tang rihmi le a tuahmi vialte le a ṭhawnnak, zeitindah ral a doh i Israel caah Judah ta a rak simi Damaskas le Hamath a lak ṭhannak hna kha, Israel Siangpahrang hna Chanrelnak Cauk chungah an i ṭial lo mei? 29Cun Jeroboam cu Israel siangpahrang hna, a pupa hna sinah a it i a fapa Zekhariah cu amah hmun ah cun a hung bawi.
Currently Selected:
2 SIANGPAHRANG 14: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006