2 SAMUEL 21
21
Gibeon Mi Kha Phu An Hlampiak Hna
1David caan lioah cun kum thum chung, aa peh lengmang in mangṭam a tlung i David nih Bawipa hmai kha a kawl. Cun Bawipa nih, “Saul le a innchungkhar cungah thisen chuah mawhnak a um caah a si; zeicahtiah Gibeon mi kha a thah hna,” tiah a ti. 2Cucaah siangpahrang nih Gibeon mi kha a auh hna. Gibeon mi cu Israel mi an si lo, Amor mi a tangmi kha an si; Israel mi nih kan in zuah ko hna lai tiin an sinah chiat an rak ser nain, Israel mi le Judah mi hna ca i a ṭan tuknak ah Saul nih khan thah awkah a rak kawl hna. #Jos 9.3-15 3Cun David nih Gibeon mi cu a thawh hna i, “Zeidah kan tuahpiak hna lai? Cun nannih nih Bawipa ro kha thluachuah nan pek naklai kei nih zeitindah sual thianhnak kha ka tuah lai?” tiah a ti. 4Gibeon mi hna nih cun amah cu, “Saul le a innchungkhar le kanmah karlak i thil a ummi hi sui le ngun kong a si lo; cun Israel mi hi ahohmanh kan thah awk hna zong an si fawn lo,” tiah an ti. Cun anih nih, “Kan tuahpiak seh nan ka timi cu zeidah a si?” tiah a ti. 5Siangpahrang sinah cun, “Kannih nih Israel ram chung paohpaoh ah hin hmun kan ngeih nakhnga loin a rak kan hlo i kannih hrawh awkah khua a rak khangtu 6mipa i a fapa hna lakin pasarih cu, Bawipa tlang cungah Gibeon ah Bawipa hmaiah kan thlai hna nakhnga, kan pe hna law kan duh,” tiah an ti. Cun siangpahrang nih, “Kan pek hna lai,” tiah a ti.
7Sihmanhsehlaw Saul fapa Jonathan i fapa Mefibosheth kha cu a zuah, zeicahtiah annih karlak ah, David le Saul fapa Jonathan karlak ah khan Bawipa chiatserhnak a rak um. #1Sam 20.15-17; 2Sam 9.1-7 8Siangpahrang nih cun Aiah fanu Rizpah nih Saul a hrinpiak mi fapa pahnih Armoni le Mefibosheth le Saul fanu Merab nih Meholah mi Barzillai fapa Adriel a hrinpiakmi fapa panga kha a lak hna i #1Sam 18.19 9Gibeon mi kut chungah cun a pek hna i annih nih Bawipa tlang cungah an thlai hna i an pasarih cun hmunkhatte ah an thi. Annih cu barli ṭuan domhka te ah khin an thah hna.
10Cun Aiah fanu Rizpah nih buri puan a lak hna i rawl ṭuan domh ka in ruahpi nih van in a run surh hna tiang lung cungah khan aa zarh hna i an cungah cun van i a zuangmi va si hna seh, zan ah a vakmi ramlak saram si hna seh, a ratter hna lo. 11Cun David kha Aiah fanu Rizpah, Saul nupichun nih, a tuahmi kha an chimh. Cu tikah 12David cu a kal i Filistin mi nih Saul kha Gilboa tlang i an thah ni ah, Filistin mi nih an thlai hnanak hmun Bethshan khua i zapi pumhnak tual khan a va firtu Jabesh-gilead mi hna sin khan Saul ruh le a fapa Jonathan ruh kha an lak hna i #1Sam 31.8-13 13cuka cun Saul ruh le a fapa Jonathan ruh kha an hunpi hna i, an thlaimi hna an ruh kha an pumh hna. 14Cun Saul ruh le a fapa Jonathan ruh kha Benjamin ram Zela khua i a ummi a pa Kish thlan ah khan an vui hna; cun siangpahrang nawl pekmi vialte kha an tuah. Cu hnuah cun ram ca i an halnak kha Pathian nih a cohlanpiak hna.
Abishai Nih David Cu Miṭhawngpa Sinin A Chanh
15Filistin mi nih Israel mi kha an tuk hoi hna i David zong a sinum hna sinah khan a vung kal ve. Filistin mi cu an tuk hna i David cu a ba ngaingai. 16Cun mi ngan tefa a simi Ishbibenob, a fei dar shekel za thum a rit i vainam thar aa beimi nih khan David cu thah a timh. 17Sihmanhsehlaw Zeruiah fapa Abishai nih khan amah cu a ra zuanhnawh i Filistin mi kha a tuk i a thah. Khi tikah David cu a mi hna nih khan, “Raltuknak hmun ah kan sinah na kal ti lai lo, Israel mei inn kha na hmih sual hnga,” tiin amah cu chiat an serter. #1Sia 11.36; Slm 132.17
David Nih Miṭhawng A Thah Hna
(1Cha 20.4-8)
18Mah hnuah hin Gob ah Filistin mi he i dohnak a um ṭhan hoi; cun Hushath mi Sibbekai nih mingan hna tefa a simi Saf kha a thah. 19Cun Filistin mi he Gob ah i dohnak a um ṭhan hoi; Bethlehem khuami Jaareoregim fapa Elhanan nih Git mi Goliath a fei hlung thiamtlang bantuk a simi cu a thah. 20Cun Gath ah i dohnak a um ṭhan hoi; cuka ah cun mipa pakhat a pum a ngan ngaingaimi, a kut ah kutdong paruk veve le a ke ah kedong paruk veve, a dihlak kul le pali a ngeimi a um i amah zong cu mingan hna tefa kha a si ve. 21Cun amah nih Israel mi kha a hauh hna tikah David u Shimei i fapa Jonathan nih khan a thah. 22Hi pali hna hi Gath khua i a ummi mingan hna hrinthlak kha an si; David kut le a sinum hna kut in an thi.
Currently Selected:
2 SAMUEL 21: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006