2 SAMUEL 18
18
Absalom Thihnak
1Cun David nih a sin i a ummi kha a pumh hna i an cungah a thong pawl haotu le a za pawl haotu kha a chiah hna. 2Cun David nih ralkapbu cu a thlah hna, cheu thum cheu khat cu Joab nih a hrui hna, cun cheu thum cheu khat nolh cu Zeruiah fapa Joab unau Abishai nih khan a hrui hna i a dang cheu thum cheu khat cu Git mi Ittai nih khan a hrui hna. Cun siangpahrang nih mi cu a thawh hna i, “Keimah hrimhrim zong nan sinah ka kal ve lai,” tiah a ti. 3Sihmanhsehlaw mi nih cun an thawh i, “Na kal hnga lo, zeicahtiah kannih cu kan zam a si zongah an zei a poi lai lo. Hnarcheu kan thih zongah an zei a poi hlei lai lo. Sihmanhsehlaw nang cu kanmah thong hra tluk na si; cucaah khua chungin bawmhnak na kan pek ahcun a ṭha deuh lai,” tiah an ti. 4Siangpahrang nih annih cu a thawh hna i, “Nannih nih a ṭha bik nan timi paoh cu ka tuah lai,” tiah a ti. Cucaah siangpahrang cu hauka kamah khan a dir i ralkapbu hna cu a zaza le a thongthong in an lan duahmah. 5Cun siangpahrang nih Joab le Abishai le Ittai cu, “Keimah ruangah tlangvalpa Absalom cu nem tein va ti u,” tiin nawl a pek hna. Cun siangpahrang nih Absalom kong i nawl a pekmi hna kha, ralbawi vialte nih an rak theih ve.
6Cucaah David ralkapbu cu Israel mi he i doh awkah khan ram chungah cun an va lut; an i dohnak hmun cu Efraim tupi chungah a si. 7Israel mi cu David sinum hna nih khan an tei hna i cu ni i an i thahnak cu a ngan ko, mi sang hnih an thi. 8Raldohnak nih cun ram cu a pumpuluk in a huh dih i vainam nakin cu ni ah cun tupi nih khan tam deuh a thah hna.
9Cun Absalom nih David sinum kha a ton dut sual hna ai. Absalom cu a laa kha aa cit i laa cu a nge a tam ngaimi kuhthing toi in a kal i kuhthing ah cun a lu cu fek ṭhup in a taap i van le vawlei karah aa thlai i a laa cu a lan. 10Cun mipa pakhat nih a hmuh i Joab kha a chimh i, “Zohhmanh, Absalom cu kuhthing kung ah aa thlai ko,” tiah a ti. 11Cun Joab nih a chimtupa cu, “Zei ee, na hmuh tak maw! A si kun ahcun zeicahdah vawlei ah tla lakin khika ah cun na tuk lo? Ngun phar hra le taisawm pakhat ka hei in pek hnga dah kaw,” tiah a ti. 12Sihmanhsehlaw mipa nih cun Joab kha a thawh i, “Tangka thong khat hmanh ka kut ah humh si ning law, siangpahrang fapa cungah cun ka kut ka samh bal hnga lo; zeitintiah ka theih hngan ah pei siangpahrang nih nangmah le Abishai le Ittai kha, ‘Tlangvalpa Absalom cu keimah ruangah va huppheng tuah u,’ an ti hna kha. 13Cun cuhleiah, hrokhrawl in amah kha rak that ko ning law, (siangpahrang sin cun zeihmanh aa thupmi a um ṭung lo i), khi tikah nang cu aa tel lo te bangin na um ṭung hnga,” tiah a ti. 14Joab nih, “Nangmah he hi bantukin caan cu pakpalawng ah ka hmang lai lo,” tiah a ti. Cun a kut in cantiang pathum aa put i kuhthing kung i a nung in a rak um komi Absalom lung ah khan a hei hlinh hna. 15Cun Joab ralthuam putu tlangval pahra nih khan Absalom cu an kulh i an tuk i an thah.
16Khi tikah Joab nih muko kha a tum i Israel mi a dawitu hna ralkap kha an ra kir; zeicahtiah Joab nih a thlauh hna. 17Cun Absalom kha an lak i tupi chung i khor nganpi pakhat ah an thlak i a cungah cun lungpumh nganpi pakhat an pumh; cun Israel mi vialte cu anmah le an inn cio ah khan an zam dih. 18Cun Absalom nih khan a nun lioah Siangpahrang Nelrawn ah khan lungphun pakhat a rak i ser i, “Ka min hngalh camcin a si nakhnga caah fapa ka ngei lo,” a ti i cucaah cu lungphun cu amah min a rak i sak i nihin ni tiang hin mah cucu Absalom Lungphun, tiah ti a si.
19Cun Zadok fapa Ahimaaz nih khan, “Va tli ning law, Bawipa nih na ral hna ṭhawnnak chungin an chuah cang, tiin siangpahrang cu thawng ka va thanh lai,” tiah a ti. 20Cun Joab nih amah cu a thawh i, “Nihin ah cun thawng cu na va thanh hnga lo; ni dang ah na va thanh te ko lai, nihin ah cun thawng zeihmanh na thanh lai lo, zeicahtiah siangpahrang fapa pei a thi cu,” tiah a ti. 21Cun Joab nih Kush mi kha, “Va kal law siangpahrang cu na hmuhmi hi va chim,” tiah a ti. Kush mi cu Joab hmaiah cun a kun i a tli. 22Cun Zadok fapa Ahimaaz nih khan Joab cu, “Zeihmanh si ai kun, Kush mi hnu khin va tli ve ko ning,” tiah a ti. Cun Joab nih a thawh i, “Zeicah hen na tlik lai, ka fapa? Cu thawng na va thanhmi caah cun laksawng zeihmanh na hmuh ṭung lai lo,” tiah a ti. 23Anih nih, “Zeihmanh si ai kun, ka tli ko lai,” tiah a ti. Cucaah, “Tli,” tiah amah cu a ti. Cun Ahimaaz cu Nelrawn lei lam khan a tli i Kush mi kha a chawhkanh.
24Cun David cu chunglei kutka le lenglei kutka hna karlak ah khan a ṭhu i vampang pawng i a ummi kutka inncung ah khan ralvengtu kha a hung kai i khua a hei cuanh i a hei zoh tikah, mipa pakhat amah lawng in a ra tlik kha a hmuh. 25Cun ralvengtu cu a au i siangpahrang kha a hei chimh. Cun siangpahrang nih, “Amah lawngte a si ahcun, a kaa chungah thawngpang a um a si,” tiah a ti. Cun khulrang in a ra i a ra nai deuh. 26Cun ralvengtu nih khan a dang pakhat a ra tlimi kha a hmuh; cun ralveng nih khan kutka ah cun a hei auh i, “Zohhmanh, a dang pakhat, amah lawng tein a tlimi a um!” tiah a ti. Siangpahrang nih, “Amah zong nih thawngpang a rak phorh ve,” tiah a ti. 27Cun ralvengtu nih cun, “A hmasa bik a tlikning khi Zadok fapa Ahimaaz tlikning he aa lo tiah ka ruah,” tiah a ti. Cun siangpahrang nih, “Amah cu miṭha a si i thawngpang ṭha he a ra lai,” tiah a ti.
28Cun Ahimaaz nih siangpahrang cu a hei auh i, “A ṭha dih ko,” tiah a ti. Cun siangpahrang hmaiah cun vawlei lei hoih in a lu a khun i, “Siangpahrang ka bawipa doh awkah a thomi vialte a sunghtertu hna Bawipa na Pathian cu thangṭhat si ko seh,” tiah a ti. 29Cun siangpahrang nih cun, “Tlangval Absalom cu a dam maw?” tiah a ti. Ahimaaz nih, “Joab nih na sal hi a ka thlah lioah cun thil aa tuai ur ko kha ka hmuh i sihmanhsehlaw zei a si cu ka hngal lo,” tiah a ti. 30Cun siangpahrang nih, “Ka sirah hin rak dir rih tuah,” tiah a ti. Cun a sirah cun a dir.
31Cun zohhmanh, Kush mi kha a ra phan i Kush mi nih cun, “Siangpahrang ka bawipa caah thawng ṭha! Zeitintiah nihin ah Bawipa nih nangmah doh awkah a thomi vialte hna ṭhawnnak chung khan nangmah cu an luatter cang,” tiah a ti. 32Siangpahrang nih Kush mipa cu, “Tlangval Absalom cu a dam maw?” tiah a ti. Cun Kush mipa nih khan, “Siangpahrang ka bawipa i a ral hna le ṭhat lonak tuah awk i nangmah an thawhhnawhtu vialte hna cu, kha tlangvalpa bantuk kha si ko hna seh,” tiah a ti. 33Cun siangpahrang cu a lung a suk i kutka cung dal ah khan a hung kal i a ṭap; cun a kal pah cun, “Maw ka fapa Absalom, ka fapa, ka fapa Absalom! Nangmah can ah khan keimah hi va thi deuh ning law mu, maw Absalom ka fapa, ka fapa,” tiah a ti.
Currently Selected:
2 SAMUEL 18: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006