2 SIANGPAHRANG 9
9
Jehu Chiti An Thuh
1Khi tikah profet Elisha nih profet fapa hna lakin pakhat kha a auh i, “Na taisawm i sawmh law hi chiti thawl hi i put, cun Ramoth-gilead ah va kal. 2Cun khika na phak tikah, Nimshi fapa Jehoshafat i fapa Jehu kha va kawl tuah; cun va lut law a hawile sin khan thawhter law chungchin dal chungah luhpi. 3Khi tikah chiti thawl kha i lak law a lu ah toih law, ‘Hi bangin Bawipa nih, Nangmah cu Israel mi siangpahrang ah chiti kan thuh, a ti,’ tiah va ti. Cun innka kha hung law, zam; bualcam hlah,” tiah a ti.
4Cucaah tlangval, profet cu, Ramoth-gilead ah cun a kal. 5Cun a phak tikah, zohhmanh, ralkapbu haotu hna cu an rak i pum; cun anih nih, “Maw ralbawipa, nangmah sinah biacahmi chim awk ka ngei,” tiah a ti. Cun Jehu nih, “Aho kanmah hi dah?” tiah a ti. Cun anih nih, “Nangmah sinah, maw ralbawipa,” tiah a ti. 6Cucaah a tho i inn chungah a lut; cun tlangval nih cun chiti kha a lu ah a toih i, “Hi bangin Bawipa, Israel Pathian nih, ‘Nangmah cu Bawipa mi, Israel mi hna cung i siangpahrang ah chiti kan thuh. #1Sia 19.16 7Cun ka sal profet hna thi le Bawipa sal vialte thi kha Jezebel cungah phu ka hlam naklai na bawipa Ahab i a innchungkhar cu na tuk hna lai. 8Zeitintiah Ahab innchungkhar cu a ningpi in a rawk lai; cun Ahab ta a simi pa paohpaoh cu, Israel ram chung i sal a si ah, a luatmi a si ah, ka hloh dih hna lai. 9Cun Ahab innchungkhar cu Nebat fapa Jeroboam innchungkhar bantuk ah khan le Ahijah fapa Baasha innchungkhar bantuk ah khan ka ser lai. 10Cun uico nih Jezebel cu Jezreel ram chungah an ei lai i ahohmanh nih an vui lai lo,’ a ti,” tiah a ti. Cun innka kha a hun i a zam. #1Sia 21.23
11Jehu cu a bawipa sinum hna sin i a hung chuah tikah khan, annih nih amah cu, “A ṭha dih maw? Zeicahdah hi mihrutpa hi na sinah khan a rat?” tiah an ti. Cun anih nih annih cu, “Nannih nih amah cu nan hngalh i a bia zong nan hngalh ko kha ta,” tiah a ti hna. 12Annih nih, “Mah, cucu ahmaan lo, kan chim ko,” tiah an ti. Cun anih nih, “Hitihin a ka ti ko hen cu, ‘Bawipa nih hi bangin a ti, Israel mi siangpahrang ah chiti kan thuh,’ ti in,” tiah a ti. 13Khi tikah an dihlak in khulrang in puan kha an i lak cio i hleihlak karao ah cun an phahpiak i muko kha an tum i, “Jehu cu siangpahrang a si,” tiin an thanh.
Jehu Nih Joram A Thah
14Cuticun Nimshi fapa Jehoshafat i fapa Jehu nih cun Joram cu a rawi. (Cu lioah cun Joram cu Israel mi vialte he Siria siangpahrang Hazael kha doh awkah Ramoth-gilead ah an um; 15sihmanhsehlaw Siangpahrang Joram cu, Siria siangpahrang Hazael he an i tuknak i Siria mi nih an hliamnak a hma kha damter awkah Jezreel ah khan a kir cang). Cun Jehu nih, “Mah hihi nan lung a si ahcun, ahohmanh hi thawng cu Jezreel khua i va chim awkah hi khua chung hin i zuk hlah u,” tiah a ti. 16Cun Jehu cu a rangleng kha aa cit i Jezreel ah a kal, zeicahtiah khika ah Joram cu a kuah ko. Cun Judah siangpahrang Ahaziah cu amah zoh awkah khan a rung.
17Jezreel khua innsang cung i a dirmi ralveng nih Jehu pawl an rat cu a hmuh thli hna i, “Mibu bu khat ka hmuh,” tiah a ti. Cun Joram nih, “Rangcung ralkap pakhat i lak law, anmah ton awkah hei thlah tuah, cun anih nih, ‘Daihnak a si maw?’ tiah va ti seh,” tiah a ti. 18Cucaah rangcung ralkap pakhat cu amah ton awkah khan a va kal i, “Siangpahrang nih, ‘Daihnak a si maw?’ a ti,” tiah a ti. Cun Jehu nih, “Daihnak kong ah naa thlaknak zeidah a um? I mer law ka hnu khan ka zul ko,” tiah a ti. Cun ralvengtu nih khan, “Lamkal nih khan a hei phak cang hna, sihmanhsehlaw a ra kir ṭhan lo,” tiah a ti. 19Cun rangcung ralkap pahnihnak a hei thlah ṭhan i an sin a phak tikah, “Siangpahrang nih, ‘Daihnak a si maw?’ a ti,” tiah a ti. Cun Jehu nih, “Daihnak kong ah naa thlaknak zeidah a um? I mer law ka hnu khan ka zul ko,” tiah a leh. 20Cun ralvengtu nih khan, “A va phak ko hna, sihmanhsehlaw a ra kir ṭhan lo. Cun a mawngh ning zong khi choi cukmak in a mawngh caah, Nimshi fapa Jehu mawngh ning a lo,” tiah a ti.
21Joram nih, “I tim u,” tiah a ti. Cun a rangleng kha an timh. Cun Israel siangpahrang Joram le Judah siangpahrang Ahaziah kha an rangleng veve in an i thawh i Jehu ton awkah khan an kal i Jezreel khuami Naboth dum ah khan an ton. 22Cun Joram nih Jehu kha a hmuh tikah, “Daihnak a si maw, Jehu?” tiah a ti. Anih nih, “Na nu Jezebel hlawhhlannak le eih hmannak liangluang hi an um rih chungah hin, zei daihnak cu dah a um kho lai?” tiah a ti. 23Cun Joram nih a chak a mer i a zam, Ahaziah cu, “Maw Ahaziah, rawinak a um hih,” tiah a ti. 24Cun Jehu nih a li cu a tha a dihumnak in a kuaih i Joram cu a liang le a liang karlak ah a kah i cucaah thal nih cun a lung kha a khen i a rangleng chungah cun a tlu rup ko. 25Jehu nih a bawmtu ralbawi Bidkar cu, “Hei hlawm law Jezreel khuami Naboth vawlei ah khan hei hlonh; zeitintiah, nangmah le keimah cu a pa Ahab hnulei i artlang in kan i cit lioah khan Bawipa nih hi bia a rak chim kha na cinken ko lai: 26‘Nizan ah Naboth thisen le a fapa hna thisen ka hmuh hrimhrim bantuk khan, nangmah cu hi hmun ah hin teirul kan cham lai,’ ti in Bawipa nih a ti kha. Cucaah hlawm law kha hmun vawlei ah khan hlonh tuah, Bawipa bia bang khan,” tiah a ti. #1Sia 21.19
Jehu Nih Ahaziah A Thah
(2Cha 22.7-9)
27Mah hihi Judah siangpahrang Ahaziah nih a hmuh tikah Beth-haggan lei ah a zam. Cun Jehu nih a dawi i, “Amah zong khi kap u,” tiah a ti i Ibleam pawng Gur i hung kainak cho ah khan a rangleng chungah an kah. Cun Megiddo ah a zam i khika ah a thi. #2Cha 22.7-9 28A sinum hna nih khan rangleng in Jerusalem ah an kalpi i David khua chungah a pupa hna sinah a thlan ah an vui.
29Ahab fapa Joram a bawi kum hleikhatnak ah Ahaziah nih Judah ram pen hram aa thawk cu a si.
Jezebel Thihnak
30Jehu cu Jezreel i a rat kha Jezebel nih a theih; cun a mit kha zeilo aa thuh i a lu kha aa ṭamh i thlalangawng in khua a hei cuan. 31Cun Jehu cu kutka i a luh ah khin, “Nang Zimri, a bawipa a nawngtupa, daihnak in a si maw?” tiah a ti. 32Cun thlalangawng lei cu a hun zoh i, “Ahodah keimah leiah a ṭang, ahodah?” tiah a ti. Tilditmi pahnih pathum nih khin an vun zoh. 33“Run hlonh u, amah kha,” tiah a ti. Cucaah an vun hlonh i a thi nih cun vampang le rang hna kha a peh hna i annih nih an nan len. 34Cun a lut i a ei a ding i, “Hi chiatserhmi nu hi zohhmanh u, amah cu siangpahrang fanu a si caah va vui u,” tiah a ti. 35Sihmanhsehlaw vui awk i an va kal tikah, a luruh le a ke hna le a zapei hna dah ti lo cu a zeihmanh an hmu ti lo. 36Cun an ra kir i amah kha an chimh tikah, “Mah hihi Bawipa nih a sal Elijah, Tishbemi sinin a chimmi a bia kha a si, ‘Jezreel ram chungah uico nih Jezebel cu a sa an ei lai; #1Sia 21.23 37cun Jezebel cu Jezreel ram chung lo ah khan ek bantuk a si lai caah, hihi Jezebel a si, tiah ahohmanh nih an ti kho lai lo,’ ti in,” tiah a ti.
Currently Selected:
2 SIANGPAHRANG 9: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006