2 CHANRELNAK 8
8
Solomon Nih Rian Dang A Ṭuanmi
(1Sia 9.10-28)
1Solomon nih Bawipa inn le amah inn a sak chung kum kul a donghnak ah khan, 2Huram nih a pekmi khua hna kha a ser ṭhan hna i an chungah Israel mi kha a umter hna.
3Cun Solomon cu Hamath-zobah ah a va kal i a va lak. 4Ramlak i Tadmor kha le Hamath i thil khonnak khua a sermi vialte kha a ser hna. 5Kulhmi khua, hau le kutka le a hrenhnak a ngeimi Beth-horon Cungnung le Beth-horon Tangnung le 6Baalath le Solomon nih a ngeihmi thil khonnak khua vialte le a rangleng hna ca khua vialte le a rangcung ralkap hna ca khua hna le Solomon nih Jerusalem ah siseh, Lebanon ah siseh, a penmi ram chung paohpaoh ah siseh, sak a duhmi paohpaoh kha a sak fawn hna. 7Hit mi hna le Amor mi hna le Periz mi hna le Hiv mi hna le Jebus mi hna chungin a tangmi vialte, Israel mi a si lomi hna kha, 8kha hna an tefa, kha ram chung i a tangmi hna, Israel mi nih an hrawh lomi hna kha — hi hna hi Solomon nih hnekmi rian ṭuantu bu ah a ser hna i nihin tiang hin an si ko. 9Sihmanhsehlaw Israel mi chung cun Solomon nih a rian ṭuantu caah sal a ser hna lo, annih cu ralkap le a bawi hna le a rangleng haotu hna le a rangcung ralkap an si. 10Cun hi hna hi Siangpahrang Solomon bawi upa bik pawl an si, za hnih le sawm nga an si i, mi cung i nawl ngeitu an si.
11Solomon nih Faro fanu cu David khua khan, amah ca i a sakmi inn ah a hunpi i, “Bawipa biakamnak kuang a phanhnak hmun cu hmunthiang an si caah ka nupi cu Israel mi siangpahrang David inn chungah khan a um hnga lo,” tiah a ti.
12Cun innleng hmai i a sakmi Bawipa biakṭheng cungah khan Solomon nih Bawipa sinah khangh thawinak kha a pekchanh hna, 13mah cucu Moses nih sabbath hna ca le thla thar hna ca le kum khat voi khat tuahmi puai — thilnu telh lo changreu puai, zarh hna puai le deu puai hna ca i nawl a chiah bangkhan, a ni cio rian nih a hlamning khan an pekchanh hna. #Exo 23.14-17; 34.22-23; Nam 28.9; 29.39; Deu 16.16 14A pa David nih a rak chiahmi phunglam ning khan, tlangbawi hna cu an rian cio caah khan a bubu in a thiah hna i ni fate rian nih a hlam cio ning khan Levi mi hna cu tlangbawi hna hmai i thangṭhatnak rian le rianṭuannak an tuah awk a simi ah khan a thiah fawn hna, cun kutka cawngtu pawl zong kha kutka hna caah khan an bubu in a thiah hna; zeitintiah cuticun Pathian mi David nawl pekning cu a si. 15Siangpahrang nih tlangbawi hna le Levi mi hna, zei thil paoh kong le chawhlawn khonnak kong ah nawl a pekmi hna cu annih nih an pialtak lo.
16 Bawipa inn a hram an dirh ri in an lim tiang, Solomon rian vialte cu, cuticun lim a si. Cucaah Bawipa inn cu an lim.
17Cun Solomon cu Edom ram chung, rili kam i a ummi Ezion-geber le Eloth ah a kal. 18Cun Huram nih, rili i a kal tawnmi a sinum hna le lawng hna kha a sinum hna in a hei kuat, cun annih cu Solomon sinum hna he khan Ofir ah an kal i cuka cun sui talen za li le sawm nga an rak phorh i Siangpahrang Solomon sinah khan an ratpi.
Currently Selected:
2 CHANRELNAK 8: HCL06
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006