2 CHANRELNAK 25
25
Amaziah Pennak
(2Sia 14.1-22)
1Amaziah cu pennak hram a thawk tikah kum kul le kum nga a si i Jerusalem in kum kul le kum kua a pen. A nu min cu Jeho-addan a si, amah cu Jerusalem khuami a si. 2Bawipa mithmuh ah a dikmi kha a tuah, asinain, soisel awk um lo lung he a si lo. 3Siangpahrang lianhngannak kha a kut chungah fek tein a um cangka, siangpahrang a pa a rak thattu a sinum kha a thah hna. 4Sihmanhsehlaw Moses cauk chung i phungbia ah aa ṭialmi chung i, “Pale hna cu fale can ah thah an si lai lo i fale hna zong pale can ah thah an si lai lo, sihmanhsehlaw mahle sualnak ruang cio ah ahohmanh thah an si lai,” tiin Bawipa nawl pekmi ning khan, an fale cu a that hna lo. #Deu 24.16
5Cun Amaziah nih Judah rammi kha a pumh hna i Judah le Benjamin dihlak ca i a thong pawl haotu hna le a za pawl haotu hna tangah khan an pale chungkhar ning cio ah a chiah hna. Kum kul le a cunglei mi kha a pumh hna i annih cu thim khunmi sing thum, raldoh awk ca i aa tlakmi, fei le phaw a tlai kho an si kha a hmuh. 6Cun ngun talen sing khat in Israel ram i a ṭhawng i ral a ṭhami sing khat zong a roih hna. 7Sihmanhsehlaw Pathian mi pakhat a sinah a ra i, “Maw siangpahrang, Israel ralkapbu cu na sinah kalter hna hlah, zeicahtiah Israel mi, hi Efraim mi vialte hna sinah hin Bawipa a um lo. 8Sihmanhsehlaw nang nih hi lam hin raldohnak ah ka ṭhawng lai tiin na ruah ahcun, ral hmaiah khan Pathian nih nang cu an hlonh ko lai; zeitintiah Pathian nih cun bawmh khawhnak le hlonh khawhnak ṭhawnnak a ngei,” tiah a ti. 9Cun Amaziah nih Pathian mi cu a thawh i, “Sihmanhsehlaw Israel ralkapbu ka pek cangmi talen za khat tluk cu zeitindah ka tuah kun lai?” tiah a ti. Pathian mi nih cun a leh i, “Mah hi nak hin tam deuh pei Bawipa nih cun an pek khawh cu,” tiah a ti. 10Cun Efraim in a sinah a rami ralkapbu kha, an inn i tlun ṭhan awkah Amaziah nih a phuah hna. Cucaah Judah cungah khan an thin a hung ngaingai i thin lin in inn ah khan an tlung. 11Sihmanhsehlaw Amaziah cu ralṭha in a um i a mi hna cu a hrui hna i Cite Nelrawn ah khan an kal i Seir mi sang khat an thah hna. 12Judah mi nih a dang sang khat kha a nung in an tlaih hna i lungpang cungah an kaipi hna i lungpang cung cun an nam hna i an dihlak in an i som dih. 13Sihmanhsehlaw Amaziah nih a sinah raltuknak hmun ah kalter loin a kirtermi ralkapbu chung mi hna nih khan Judah ram khua cu Samaria in Beth-horon tiang an chim hna i cu khuami cu thong thum an thah hna i hranchaw tampi an lak.
14Edom mi a thah hnanak khan a rat hnuah, Seir mi hna pathian kha a rak i phorh hna i a pathian ah aa chiah hna i a biak hna i an sinah pekchanhnak kha a tuah. 15Cucaah Amaziah cungah Bawipa cu a thin a hung i profet pakhat a hei thlah i amah nih cun, “Zeicadah anmah an mi hmanh na kut chungin a chuahter kho lotu pathian, miphun dang hna pathian cu na fuhpanh hna?” tiah a ti. 16Sihmanhsehlaw bia a chim lioah cun siangpahrang nih khan a thawh i, “Nangmah cu siangpahrang fimchimtu ah maw kan in ser? Ngol ko! Zeicahdah thah na si lai?” tiah a ti. Cucaah profet nih cun a ngol, sihmanhsehlaw, “Mah hihi na tuah i kan chimhmi na ngaih lo caah, Pathian nih nangmah hrawk awk cu a ruah cang tiah ka hngalh,” tiah a ti.
17Cun Judah siangpahrang Amaziah nih cun khuakhannak a tuah i Israel siangpahrang Jehu fapa Jehoahaz fapa Jehoash sinah khan mi a thlah hna i, “Ra law, hmaitonh in kan i zoh tuah lai,” tiah a ti. 18Cun Israel siangpahrang Jehoash nih Judah siangpahrang Amaziah cu bia a hei cah i, “Lebanon tlang i hling pakhat nih Lebanon tlang i sidar thing pakhat sinah bia a cah i, ‘Na fanu cu ka fapa nupi caah ka pe,’ tiah a ti; cun Lebanon tlang i ramlak sahrang pakhat aa chawk i hling cu a naan dih. 19Nang nih na thawh i, ‘Zohhmanh, Edom ka tei diam’, na ti i tluangkhawnnak in na lung cu aa porhlaw. Sihmanhsehlaw atu cu inn ah khan um ko; zeicahdah harnak kha thawhter i nangmah le, nangmah sinah Judah cu tlukter na duh?” tiah a ti.
20Sihmanhsehlaw Amaziah nih a ngai duh lo; zeicahdah a si ti ahcun, anih nih Edom pathian hna kha a kawl hna caah a ral hna kut chung i pek ding kha Pathian nih a tuahmi a si. 21Cucaah Israel siangpahrang Jehoash cu a hung kal i Judah siangpahrang Amaziah he cun Judah ram ta a simi Beth-shemesh khua ah khan hmaitonh in an um. 22Cun Judah cu Israel nih khan a tei i anmahle an inn cio ah khan an zam dih. 23Cun Israel siangpahrang Jehoash nih Ahaziah fapa Joash fapa Amaziah, Judah siangpahrang cu Beth-shemesh ah a tlaih i Jerusalem ah a kalpi i Jerusalem khua kulhnak vampang cu dong za li, Efraim Kutka in Kil Kutka tiang a chimh. 24Cun sui le ngun vialte, Pathian inn chungah a ummi umkheng vialte kha a lak hna i Obededom kha a tlaih chih; siangpahrang inn i chawhlawn hna le hreng i a tang dingmi hna zong kha a tlaih hna i Samaria ah a tlung ṭhan.
25Judah siangpahrang Joash fapa Amaziah cu Israel siangpahrang Jehoahaz fapa Jehoash thih hnuah kum hleinga a nung. 26Amaziah tuahsernak a tang rihmi hna cu a hramthawk in a donghnak tiang, Judah le Israel Siangpahrang hna Cauk ah an i ṭial lo mei? 27Bawipa sinin aa mer ri thawk khan Jerusalem ah amah rawinak kha an tuah i Lakhish ah a zam. Sihmanhsehlaw Lakhish ah cun mi an hei dawiter hna i khika ah khan an thah. 28Cun rang cungin an ratpi i David khua chungah, a pupa hna sinah khan an vui.
Currently Selected:
2 CHANRELNAK 25: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006