1 SIANGPAHRANG 7
7
Solomon Nih Inn Dang A Sak Hna
1Solomon nih amah inn cu kum hleithum chung a rianh i a inn cu a dihlak in a lim dih.
2Lebanon Tupi Inn timi kha a sak; a sau cu dong za khat a si, a vang cu dong sawm nga a si, a san cu dong sawm thum a si; cu inn cu sidar thing tung, tlar thum cung i chuanmi sidar thing kaan hna cungah khan sak a si. 3Cun mah cucu, tlar khat ah tung hleinga cio ah, tung sawm li le tung nga cung i a ummi dal hna cungah cun sidar thing in khuh a si. 4Cun tlar thum in thlalangawng an um i, pakhat zawn ah pakhat cio ah dot thum in an um. 5Innka vialte le thlalangawng vialte cu tungvangpalh an si dih i thlalangawng cu tlar thum in an um i pakhat le pakhat kha an i zawn cio.
6Cun Tungpi Khaan timi khaan kha a ser; a sau cu dong sawm nga, a vang cu dong sawm thum a si; cun a hmaiah cun ṭumbut a ser, tungpi hna le an hmai i saptonh kha a ser fawn hna.
7Cun Bawi Ṭhutdan Khaan timi kha a ser, biaceihnak caah a si i Biaceihnak Khaan ti zong a si ve; mah cucu zelṭuang in inntling tiang sidar thing in sak a si.
8Cun a umnak ding ca i amah inn, cu khaan hnulei i a ummi cu, cu bantuk ṭhiamṭhiam in sakmi a si. Cun hi khaan bantuk hin a ṭhit mi Faro fanu caah khan inn pakhat a sak. #1Sia 3.1
9Hi vialte cu a man a harmi lung in ser an si; lung cu tahning tein remhmi, a lenglei he a chunglei he hluah in ahmi, a hram in a par tiang; cun Bawipa inntual in tual ngan tiang an si. 10Cun a hram lung cu lung man tam an si, lung ngan pipi, dong riat hna, dong hra hna an si. 11Cun cunglei ah cun lung man fak, tahning tein remhmi le sidar thing an si. 12Tual ngan cu remhmi lung chonh thum le sidar thing thluan thap khat in kulh a si, Bawipa inn chung i chungchin tual le cu inn innleng bantuk khan.
Solomon Nih Tair Mi Hiram A Hman
(2Cha 2.13-14; 3.15-17)
13Cun Solomon Siangpahrang nih Tair in Hiram kha a hei cah i an ratpi. 14Amah cu Naftali phun chung i nuhmei pakhat i a fapa a si i a pa cu Tair mi a si, amah cu dar lei i zungthiam a si; amah cu dar leiah cun fimnak le hngalhthiamnak le zung thiamnak in a khatmi a si. Siangpahrang Solomon sinah khan a ra i a rian vialte kha a ṭuanpiak.
15Dar tungpi pahnih a thlet hna. Tungpi pakhat cu a san dong hleiriat a si i a sum cu dong hleihnih a si, a chung a kua i a chah cu zapar a si; tungpi pahnihnak cu cu bantuk ṭhiamṭhiam a si. 16Tungpi dong i chiah awkah dar in thletmi luchin pahnih a ser hna; luchin pakhat cu a sanlei dong nga a si, luchin dang pakhat cu a sanlei dong nga a si ve. 17Cun sur bantukin ṭial cikcek tein sermi le thir cikcin bantukin ngerh cincianmi pahnih, tungpi dong i a ummi luchin caah cun a ser hna; luchin pakhat caah sur khat a dang luchin pakhat caah sur khat ve. 18Cu bantuk ṭhiamṭhiam in, tungpi cung i a ummi luchin khuhtu sur pakhat cungah khan, a velchum in taleti tlang hnih in a ser hna; a dang luchin ca zongah khan cu bantukin a tuah ve. 19Innleng i a ummi tungpi hna an dong a khuhtu luchin cu dong li an si i lili pangpar mui in ser an si. 20Luchin cu tungpi pahnih hna dong ah khan le sur bantukin sermi pawng i a pummi a fonghlei cungah khan an um; taleti cu za hnih an si, tlang hnih in a velchum in an um; cun tungpi dang pakhat zong kha cu bantuk ṭhiamṭhiam a si. 21Tungpi cu biaknak inn innleng ah khan a bunh hna; thlanglei kamah khan tungpi cu a bunh i a min ah Jakhin a sak; cun chaklei kamah tungpi kha a bunh i a min ah Boaz a sak. 22Cun tungpi dong cu lili pangpar mui in a ṭelh hna. Cuticun tungpi rian cu a lim hna.
Biaknak Inn Thilthuam
(2Cha 4.1—5.1)
23Cun hmaihum pakhat a ser, a bial i khattelei tlang in khattelei tlang cu dong hra a si, a san cu dong nga a si i a velchum in tah tikah dong sawm thum a si. 24Cun a tlang toiah cun um ruang an um, a dong sawm thum ning khan, cun a hmaihum kha an vel; um ruang cu tlang hnih an si i an thlet tikah khan an rak thlet chih hna. 25Cun mah cucu cawtum hleihnih cungah a dir, pathum cu chaklei an zoh, pathum cu nitlaklei an zoh, pathum cu thlanglei an zoh, pathum cu nichuahlei an zoh; hmaihum cu an cungah khin a si i an hnulei an i chit cio. 26A chahlei cu kut zabok a si; a tlang cu hraitlang bantukin ser a si i lili pangpar bantuk a si; bath#7.26 bath khat cu pawng 80 tluk a si. thong hnih a tlum.
27Cun dar in sermi a hunnak pahra zong a ser fawn hna; a hunnak hna cu dong li cio an sau, dong li cio an kau i dong thum cio an sang. 28Mah hihi hunnak an ser hna ning cu a si; tlang an ngei i cu tlang hna cu tung karah an um; 29cun tung karlak i a ummi tlang hna ah cun chiandeih hna le cawtum hna le cherubim an cuang; cun a tung hna zongah cun, chiandeih hna le cawtum hna cung le toiah khan, ṭamh cikcekmi kual tete an um. 30Cu hleiah hunnak hna nih khan dar cangpa kual pali le dar hlung kha an ngei cio. Cun a kil pali ah khan dohtu baan an um cio: hmaihum toiah cun, dohtu baan hna cu an pang cio ah khan ṭamhmi kual tete kha an thlet chih hna. 31Dohnak baan karlak i a ka cu dong khat a kau i a ka cu a hram bantukin a pum i dong khat le a cheu a tla i a ka tlang ah cun kuakcik in an tuk fawn, cun a tlang hna cu an pum lo, tung vang palh an si. 32Cun cangpa kual pali hna cu a tlang toiah cun an um hna i cangpa kual hlung hna cu hunnak he khan an i tlai dih, cun cangpa kual cu dong khat le a cheu cio an sang. 33Cangpa kual an serning hna cu rangleng ke kual an serning bantuk a si ko: cangpa kual hlung hna, cangpa kual tlang hna, cangpa kual karhtu fung tete hna le a lai bo hna cu an dihlak in a thlet in thletmi an si. 34Hunnak kil pali ah cun dohtu baan pali an um i dohtu baan hna cu hunnak he cun an i tlai dih. 35Hunnak dong ah cun a pummi a ka a um i dong cheu a sang; a tung hna le a tlang hna cu hunnak cungah khan an dir i a tlang hna he cun an i tlai dih. 36Cun a milmi a tung hna le a tlang hna cungah khan cherubim le chiandeih hna le tumkung hna an suai hna, a lawnnak hmun ning cio khan; cun a velchum in kual tete in a kulh dih hna. 37Hi bantukin hunnak pahra kha a ser hna: an dihlak te hin thlet khatmi, tah khatmi le muisam khat an si.
38Cun i ṭawlnak dar um pahra a ser hna; i ṭawlnak um pakhat nih bath sawm li cio an tlum, i ṭawlnak um pakhat cu dong li cio an si i hunnak pahra hna nih khan pakhat cio in an co hna. #Exo 30.17-21 39Cun hunnak hna cu, panga, inn a thlanglei kamah, cun panga, inn a chaklei kamah a hun hna; cun hmaihum cu inn a nichuah thlanglei kil ah khan a hun.
40Hiram nih um hna le cawhlek hna le khengkuar hna zong kha a ser hna. Cuticun Hiram nih Bawipa inn ca i Siangpahrang Solomon a tuahpiakmi rian vialte kha a lim dih: 41tungpi pahnih, tungpi dong i a ummi luchin kheng pahnih le tungpi dong i a ummi luchin pahnih hna kheng khuhnak ca i sur bantukin sermi pahnih; 42cun tungpi cung i a ummi luchin kheng pahnih hna a khuhtu ding ca i sur pahnih hna caah khan taleti za li, sur pakhat caah rual hnih cio; 43hunnak pahra le hunnak cung i i ṭawlnak um pahra; 44hmaihum pakhat le hmaihum tang i cawtum hleihnih.
45Cun um hna le cawhlek hna le khengkuar hna, hi umkheng Bawipa inn chung i a ummi vialte, Hiram nih Siangpahrang Solomon a serpiakmi hi dar tleu in sermi an si. 46Jordan nelrawn, Sukkoth le Zarethan karlak i tlak hmun ah khan siangpahrang nih a thlet hna. 47Cun cu umkheng vialte cu an tam tuk caah Solomon nih thlai loin a chiah ko hna; dar cu a khing zeizat dah a si hnga ti hngalh khawh ding a si lo.
48Cuticun Solomon nih Bawipa inn chung i a ummi umkheng vialte cu a ser hna: sui biakṭheng, Hun camcinmi changreu ca i sui cabuai, #Exo 25.23-30; 30.1-3 49sui thiang in sermi mei vannak tung, chungchin hmunthiang hmai i chaklei kamah panga, thlanglei kamah panga a ummi hna kha; pangpar hna, mei inn hna, cengceh hna, sui in sermi hna kha; #Exo 25.31-40 50hrai hna, mei hmihnak hna, kheng kuar hna, zihmui ca kheng tete hna, mei zawhnak hna, sui thiang in sermi hna kha; cun innchung chungchin thiang bik hmun innka ca i sui kapza hna le biakinn ṭuangpi innka hna i sui kapza hna.
51Cuticun Siangpahrang Solomon nih Bawipa inn ca i a ṭuanmi rian vialte cu a lim. Cun a pa David nih a rak pekchanhmi thil: ngun, sui le umkheng hna kha a luhpi hna i Bawipa inn rokuang chungah khan a ken hna. #2Sam 8.11; 1Cha 18.11
Currently Selected:
1 SIANGPAHRANG 7: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006