1 SIANGPAHRANG 8
8
Biakam Kuang Biakinn Chungah A Luhpi
(2Cha 5.2—6.2)
1Cun Solomon nih Israel mi upa vialte hna le an phun cio i lu a simi vialte hna, Israel mi chungkhar hna haotu vialte hna kha, David khua Zion in Bawipa biakamnak kuang cu hunpi awkah, Jerusalem khua ah Siangpahrang Solomon hmaiah a pumh hna. #2Sam 6.12-16; 1Cha 15.25-29 2Cun thla sarihnak thla a simi Ethanim thla chung puai ah khan Israel mi vialte cu Siangpahrang Solomon sinah an i pum. #Lev 23.24 3Cun Israel mi upa vialte cu an ra i tlangbawi hna nih khan kuang cu an thawhpi. 4Cun Bawipa kuang kha le, tonnak thlam kha le thlam chung i a ummi umkheng thiang vialte kha an hunpi, tlangbawi hna le Levi mi hna nih an hunpi hna. 5Cun Solomon Siangpahrang le Israel mi bu vialte, a hmai i aa pummi hna nih cun amah he kuang hmaiah khan tuu le cawtum tam tuk hringhran an thawi hna caah zeizat an si kha hngalh cawk le rel cawk an si lo. 6Cun tlangbawi hna nih khan Bawipa biakamnak kuang cu amah hmun ah inn chung chungchin hmunthiang, hmunthiang bik, cherubim hna thla toiah khan an chiah. 7Zeitintiah cherubim hna nih khan kuang umnak hmun cungah khan an thla an samh hna i cucaah kuang le a laang hna kha cherubim hna nih cun an huh hna. 8Cun laang cu an sau hringhran caah hmunthiang in chungchin hmunthiang hmaiah khan an par cu an lang; sihmanhsehlaw a leng cun hmuh khawh an si lo; cuka ah cun nihin tiang hin an um ko. 9Israel mi nih Izipt ram in an chuah tikah Bawipa nih annih he biakamnak a tuahnak Horeb tlang i Moses nih a khumhmi lung tlap pahnih hna dah ti lo kha cu, kuang chungah zeihmanh a um lo. #Deu 10.5 10Cun tlangbawi kha hmunthiang chungin an chuah tikah Bawipa inn cu minmei a khat. #Exo 40.34-35 11cucaah minmei ruangah khan rianṭuan awkah tlangbawi hna cu an dir kho lo; zeitintiah Bawipa sunparnak cu Bawipa inn kha a khat.
Biakinn Pathian Sin Pekchanhnak
(2Cha 6.1—7.10)
12Cun Solomon nih a thawh i,
“Bawipa nangmah nih ni khi van ah khin na chiah,
Sihmanhsehlaw a chahmi muihnak
chungah ka um lai, na ti. #Slm 18.11; 97.2
13A sunglawimi inn, nangmah
kan sakpiak cang,
Zungzal in na umnak ding caah,” tiah a ti.
14Cun siangpahrang cu a hnulei aa mer i Israel mi aa pummi vialte cu an dir lioah Israel mi aa pummi vialte cu thluachuah a pek hna. 15Cun aa thawh i, “Ka pa David sinah, ‘Ka mi Israel mi hna cu Izipt ram in ka chuahpi hna ni thawk in, Israel mi hna phun chung i khua zeihmanh kha, ka min umnak ding i inn saknak caah, ka thim lo; 16sihmanhsehlaw David cu ka mi hna cung i um awkah ka thim,’ tiin a kaa in a chimmi a biakamnak kha a kut in a tlintertu Bawipa, Israel Pathian cu thangṭhat si ko seh. #2Sam 7.4-11; 1Cha 17.3-10 17Bawipa, Israel Pathian min ca i inn rak sak kha ka pa David lung chungah a rak um ko. #2Sam 7.1-3; 1Cha 17.1-2 18Sihmanhsehlaw Bawipa nih ka pa David cu a thawh i, ‘Ka min ca i inn sak awk kha na lung chung i a um caah, mah cucu na lung chung i na umter cu a ṭha; 19asinain, nangmah nih cun inn cu na sa lai lo, sihmanhsehlaw nangmah nih na hrin laimi na fapa nih ka min ca inn cu a run sak te lai,’ a ti. #2Sam 7.12-13; 1Cha 17.11-12 20Atu cu Bawipa nih a biakamnak a sermi kha a hun tlinter cang; zeitintiah ka pa David hmun ah khan ka kai cang i Bawipa biakam bang khan Israel mi bawi ṭhutdan cungah ka ṭhu i Bawipa, Israel Pathian min caah khan inn cu ka sak cang. 21Cun Izipt ram in a chuahpi hna tikah kan pupa hna he Bawipa nih a rak sermi biakamnak a umnak kuang caah khan, khika ah hmun pakhat ka tuah,” tiah a ti.
22Cun Solomon cu Bawipa biakṭheng hmaiah khan Israel mi aa pummi vialte hna hmuh ah cun a dir i van leiah a kut a phar hna i, 23“Maw Bawipa Israel Pathian, cunglei van ah siseh, tanglei vawlei ah siseh, nangmah bantuk Pathian zeihmanh an um lo, nang nih cun na hmai i an lungthin dihlak in a kalmi na salle hna cungah cun na biakamnak kha na zulh i a fekmi na dawtnak kha na langhter; 24na sal David, ka pa sinah na rak chimmi cu na zulh; asi, a sinah na kaa in na rak chim i mah cucu nihin ni ah hin na kut in na tlinter. 25Cucaah maw Bawipa, Israel Pathian, na salpa David ka pa sin i, ‘Na fapale hna nih hin, nangmah nih ka hmaiah na rak kal bantuk khan ka hmai i kal awkah an lam kha an i ralrin ahcun, Israel mi bawi ṭhutdan cung i ka hmaiah a ṭhu dingmi na ṭhing lai lo,’ tiin bia na rak kammi kha tlinter ko. #1Sia 2.4 26Cun maw Israel Pathian, na salpa David ka pa sin i na rak chimmi bia kha fehter ko.
27“Sihmanhsehlaw Pathian cu vawlei cungah cun khua a sa taktak hnga maw? Zohhmanh, van le a sang bik van nih hin an in tlum lo, zeitindah hi keimah sakmi inn chinchin nih cun an tlum hnga! #2Cha 2.6 28Sihmanhsehlaw na salpa nih thla ka camnak le kan nawlnak cu ka ngaihpiak ko sawh, maw Bawipa, ka Pathian, nangmah hmaiah nihin ah na salpa nih ka aunak le thla ka cammi cu ka theihpiak ko sawh; 29zeitintiah nangmah nih, ‘Khika ah ka min a um lai,’ tiin na rak timi, hi inn leiah hin chunzan in na mit na au nakhnga le hi inn lei hoih in na salpa nih thla ka cammi hi na theih nakhnga. #Deu 12.11 30Cun na salpa le na mi Israel mi hna nih hi hmun lei hoih in thla kan cam tikah, kan in nawlnak cu kan theihpiak ko; asi, na umnak hmun van khin run thei ko law, cun na theih tikah kan ngaithiam ko.
31“Mi pakhatkhat nih a innpa cungah a sual i chiat serter a si i a chiatsernak cu hi inn chung na biakṭheng hmaiah hin chimter a si ahcun, 32khi tikah nang nih van in run thei law, run ṭuan law, na salle cu bia run khiak ko hna, a mawhtu cu amah lu lila ah a ziaza kha tlunter in sual run phaw law, a dingmi cu a dinnak ning khan pek awkah thiam run coter ko.
33“Na mi Israel mi hna nih nangmah cung i an sual caah an ral hna hmaiah an sungh tikah, nangmah leiah khan an i mer ṭhan i na min kha an upat i nangmah kha hi inn chungah an in nawl i na sinah thla an cam ahcun, 34van ah khin rak theihpiak hna law na mi Israel mi sualnak cu ngaithiam ko, cun an pupa hna sinah na rak pekmi ram ah khan kirpi ṭhan ko hna.
35“Cun nangmah cung i an sual ruangah van cu a pih i ruah a sur lo tikah, hi hmun lei hoih in thla an cam i na min kha an upat i nangmah nih na hrem hna tikah, an sualnak kha an mertak ahcun, 36nangmah nih an kal nakhnga ding lam ṭha kha na cawnpiak hna tikah, van ah khin rak thei law na mi Israel mi na sal hna an sualnak kha rak ngaithiam ko hna; cun na mi hna sinah ro caah na pekmi na ram cungah cun ruah cu surter ko.
37“Ram chungah hin mangṭam a tlun ah siseh, rai a tlun ah siseh, rocarnak le theikung rai a tlun ah siseh, khaubawk le lunghmul an tlun ah siseh, an ral hna nih khan an khua pakhatkhat i an hren hna ah siseh, zei bantuk rai hmanh si ai kun, zei bantuk zawtnak khum si ai kun, 38Israel mi nih an dihlak in siseh, ahopaoh nih siseh, zei bantuk thlacamnak zong si ko seh, zei bantuk nawlnak zong si ko seh, an tuah i an lung chung cio in hremnak an inmi kha an hngalh i hi inn leiah hin an kut an zau hna ahcun, 39khi tikah nang nih na umnak van khin rak theihpiak hna law ngaithiam hna law, tuah law an zulhmi lam vialte ning cio ah an lungthin nangmah nih na hngalh ko mi hna cu pe ko hna (zeitintiah nangmah, nangmah lawnglawng nih minung fa vialte hna an lung cu na hngalh); 40zeitintiah kan pupa na rak pekmi hna ram ah hin an khuasak chung vialte nangmah kha an in ṭihzah nakhnga.
41“Cu bantukin, na mi Israel mi a si lomi ramdangmi nih na min ruangah lam hlatpi ram in a rat i. 42(zeitintiah na min lianngan le a ṭhawngmi na kut le na samhmi na ban cu an theih ṭheo ding si kaw), hi inn lei hoih in thla a cam tikah, 43na umnak van ah khin rak theihpiak law, ramdangmi nih an in auhnak vialte ningin tuahpiak ko hna; zeitintiah vawleicung mi vialte nih na mi Israel mi bangin, na min kha an theih i nangmah kha an in ṭih i hi inn ka sakmi hi nangmah min in kawh a si kha an hngalh nakhnga.
44“Cun na mi hna cu an ral doh awkah an kal ahcun, zei lam zongin na kalter hna a si ah, nangmah nih na thimmi khua hi le nangmah min caah ka sakmi inn lei hoih hin Bawipa sinah thla an cam ahcun, 45khi tikah van ah khin an thlacamnak le an in nawlnak cu rak theihpiak hna law, annih cu an rian ah cun ṭanpi ko hna.
46“Annih nih na cungah an sual ahcun — zeitintiah a sual lomi minung an um lo — cun an cungah na thin a hun i ral kut chungah annih cu na chanh hna i an ral hna nih an ram ah a hlatpi ah siseh, a naite ah siseh, sal ah an kalpi hna i, 47sihmanhsehlaw sal ah an kalpi hnanak ram ah cun, an lung a hung pem i an i ngaihchih i a tlaitu hna ram ah cun na sinah, ‘Kan sual cang, ding lopi le ṭhalo piin thil kan tuah cang,’ tiin nawlnak an tuah ahcun, 48sal ah a kalpitu hna an ral hna ram ah khan an ruahnak dihlak le an lungthin dihlak in an i ngaihchih i, an pupa hna sinah na rak pekmi an ram le nangmah nih na thimmi khua le na min caah ka sakmi inn lei holh in nangmah sinah thla an cam ahcun, 49khi tikah, nangmah nih na umnak van ah khin an thlacamnak le an in nawlnak cu rak theihpiak hna law, an rian ah cun ṭanpi ko hna, 50nangmah cungah a sualmi cu ngaithiam hna law nangmah cungah an palhnak vialte cu ngaithiam ko hna; cun sal ah a kalpitu hna nih khan an cungah zaangfahnak an ngeih nakhnga an hmuh hngan ah cun annih cu zaangfahnak pe ko hna, 51(zeitintiah annih cu thir somei, Izipt ram, chungin na chuahpimi hna na mi le na ro an si). 52Na salpa nih kan nawlnak le na mi Israel mi nih an in nawlnak ah hin na mit chia hram ko, an in auh tik paoh ah na hna chit ko hna. 53Zeitintiah maw Bawipa, Pathian, nangmah nih kan pupa hna Izipt ram chungin na chuahpi hna tikah na sal Moses sinin na rak thanh cang bantuk khan, na ro si awkah vawleicung mi vialte hna lakin na rak thleidan cang hna,” tiah a ti.
54Solomon nih Bawipa sinah hi thlacamnak le nawlnak vialte a cam dih tikah, van leiah zaa chan in a khuk aa bilnak Bawipa biakṭheng hmai khan a tho i, 55a dir i Israel mi aa pummi vialte kha aw thang piin thluachuah a pek hna i, 56“A biakam vialte ningin a mi Israel mi dinhnak a petu Bawipa cu thangṭhat si ko seh; a sal Moses sinin a chimmi a biakam ṭha vialte cu bia pakhat hmanh a pelhmi a um lo. #Deu 12.10; Jos 21.44-45 57Bawipa kan Pathian cu, kan pupa hna sinah a um bang khan kannih sinah um seh, kan kaltak in a hlawt zong kan hlaw hlah seh; 58zeitintiah amah nih kan pupa nawl a rak pekmi hna a nawlbia hna le a phungbia hna le a phunglam hna cu kan zulh hna nakhnga, amah leiah kan lung kha a sor tlukter ko seh. 59Bawipa hmaiah nawlnak ka tuahnak ka bia hna hi Bawipa kan Pathian pawngah chun zan in um seh law, a sal ka rian hi ni khat hnu ni khat a herhnak bangin ka ṭanpi ko seh; 60zeitintiah vawleicung mi vialte nih Bawipa cu Pathian a si i a dang ahohmanh an um lo, ti kha an hngalh nakhnga. 61Cucaah a nawlbia le a phungbia kha zul in, nihin i nan tuah bangin, Bawipa kan Pathian sinah nan lungthin cu a dih umnak in fehter ko u,” tiah a ti.
62Cun siangpahrang le a sinah a ummi Israel mi vialte nih Bawipa hmaiah raithawinak an pekchanh. 63Bawipa sin i pekchanhmi daihnak thawinak hna caah Solomon nih cawtum sang hnih thong hnih le, tuu sing khat sang hnih a pekchanh hna. Cuticun siangpahrang le Israel mi vialte nih Bawipa inn cu an pekchanh. 64Cu ni ṭhiamṭhiam ah cun siangpahrang nih Bawipa inn hmai i a ummi tual a laifang kha a thianter; zeicahtiah Bawipa hmai i a ummi dar biakṭheng kha, khangh thawinak le changvut thawinak le daihnak thawinak i a thau hna tlum awk caah a hme tuk i cucaah khika ah khan khangh thawinak le changvut thawinak le daihnak thawinak i a thau hna kha a pekchanh hna.
65Cuticun cu tan ah cun Solomon le Israel mi vialte, mi tampi aa pummi bu, Hamath khua luhnak in Izipt tivate tiang, cu mi hna nih cun Bawipa an Pathian hmaiah ni sarih chung puai an tuah. 66A ni riat ni ah cun mi cu a kalter hna; annih nih siangpahrang kha thluachuah an pek i Bawipa nih a sal David le a mi Israel mi cung i ṭhatnak a langhtermi ruangah lunglawm le thanuam in an inn cio ah an tlung.
Currently Selected:
1 SIANGPAHRANG 8: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006