1 SIANGPAHRANG 21
21
Ahab le Naboth Mitsur Dum Kong
1Jezreel mi Naboth nih Jezreel khua ah, Samaria siangpahrang Ahab inn pawngah mitsur dum pakhat a ngei. 2Cun Ahab nih Naboth cu a thawh i, “Na mitsur dum cu ka inn pawngah a um caah an hringso dum ah ka hman nakhnga, ka pe tuah; cun a can ah mitsur dum ṭha deuh kan pek lai; cucu a si lo le, nangmah nih a ṭha na ti ahcun, a man cu tangka in kan pek ko lai,” tiah a ti. 3Sihmanhsehlaw Naboth nih Ahab cu, “Ka pupa hna ro na sin i kan pek hnga cu Bawipa nih ka kham ko seh,” tiah a ti. 4Cun Naboth nih Ahab cu, “Ka pupa hna ro cu kan pe lai lo,” tiah a sin i a timi bia ruangah khan, Ahab cu thinhung le hmaichia in a inn chungah a lut. Cun a ihkhun ah a it i khattelei kha a hoi i rawl ei kha a duh lo.
5Sihmanhsehlaw a nupi Jezebel kha a sinah a ra i, “Zeicahdah cuticun na thlarau cu a thin a hun i rawl na ei duh lo?” tiah a ti. 6Cun anih nih, “Jezreel mi Naboth kha, ‘Na mitsur dum kha phaisa in kan cawk ko lai, cun cu ti a si lo le, na duh ahcun a ai ah mitsur dum dang kaan pek lai,’ ka ti i anih nih, ‘Ka mitsur dum cu kan pe lai lo,’ tiah a ka leh caah a si,” tiah a ti. 7Cun a nupi Jezebel nih a thawh i, “Israel hi atu ah nangmah nih na uk maw? Tho law rawl ei law na lung kha lawmhter tuah; Jezreel mi Naboth mitsur dum cu keimah nih kan pek lai,” tiah a ti.
8Cucaah Ahab min in ca a ṭial i a min khenhnak in a khenh hna i cu ca cu Naboth he a khua i a um ṭimi upa hna le bawi hna sinah khan a kuat. 9Cun ca chungah cun, “Rawl ulhnak thanh u law, Naboth kha mizapi lakah sang ngai ah hlorh u; 10cun mi ṭhiṭhalo pahnih in amah hmaiah cun chia hna u law, ‘Nangmah nih Pathian le siangpahrang chiat na serh hna,’ tiin bia puh hna seh. Cun chuahpi u law thi lakin lung in chep u,” tiah a ṭial. 11Cun a khuami, upa hna le bawi hna a khua chung i a ummi hna nih cun, Jezebel nih bia a cah hna bang khan an tuah. Anih nih a kuatmi hna ca chungah aa ṭial bangin, 12rawl ulhnak kha an thanh i Naboth kha mizapi lakah sang ngai ah an hlorh. 13Cun mi ṭhiṭhalo pahnih hna kha an ra i a hmaiah khan an ṭhu; cun mi ṭhiṭhalo hna nih khan mi zapi hmaiah cun Naboth cu bia an puh i, “Naboth nih Pathian le siangpahrang kha chiat a serh hna,” an ti. Cucaah khua lengah an chuahpi i thi lakin lung in an cheh. 14Cu tikah Jezebel sinah khan mi an hei thlah i, Naboth cu lung in cheh a si cang; a thi cang,” tiah an ti.
15Jezebel nih Naboth cu lung in cheh a si cang i a thi cang ti kha a theih cangka, Jezebel nih Ahab cu a thawh i, “Tho tuah, Jezreel mi Naboth nih phaisa in zuarh an sianh lomi mitsur dum kha i lak tuah; zeitintiah Naboth cu a nung ti lo, a thi cang,” tiah a ti. 16Cun Ahab nih Naboth kha a thi cang ti a theih cangka, Jezreel mi Naboth mitsur dum cu vung kal i vung i lak awkah a tho.
17Cu tikah Bawipa bia cu Tishbemi Elijah sinah khan a ra i, 18“Tho law, Samaria khua i a ummi Ahab, Israel siangpahrang kha ton awkah vung kal tuah; zohhmanh, amah nih co awkah a kalhnawhmi Naboth mitsur dum chungah a um ko. 19Cun amah cu na thawh lai i, ‘Hi bangin Bawipa nih, “Na thah cang i a ro zong na co cang maw?” a ti,” na ti lai. Cun nangmah nih amah cu na thawh lai i, ‘Bawipa nih hi bangin: “Uico nih Naboth thi an liahnak hmun ah khan uico nih nangmah na thi an liah lai,” a ti,’ tiah na chimh lai,” tiah a ti. #1Sia 22.38
20Ahab nih Elijah cu, “Na ka hmuh cang mu, maw ka ralpa,” tiah a ti. Cun anih nih, “Bawipa mithmuh i thil ṭhalo tuah awkah khan nangmah le nangmah cu naa zuar cang caah, kan hmuh cang. 21Zohhmanh, nangmah cungah ṭhat lonak ka tlunter lai; kan hloh cikcek lai i Israel mi chungah Ahab ta a simi pa paohpaoh cu, a luatmi siseh, a luat lomi siseh, ka hrawh dih hna lai; 22cun ka thin na ka phawh ruang le Israel mi na sualter hna caah hin, na innchungkhar cu Nebat fapa Jeroboam innchungkhar bantuk le Ahijah fapa Baasha innchungkhar bantuk ah ka ser lai. 23Cun Jezebel kongah hin Bawipa nih, ‘Jezreel khua kulh chungah hin Jezebel cu uico nih an ei lai,’ a ti fawn. #2Sia 9.36 24Ahab ta a simi paoh cu, khua chung i an thih a si ah, uico nih a ei hna lai; ramlak i an thih a si ah, van i a zuangmi va nih an ei hna lai,” tiah a ti.
25(Bawipa mithmuh i thil ṭha lo tuah awkah aa pemi Ahab bantuk ahohmanh an um lo — cu vialte cu a nupi Jezebel nih a forh ruangah a si. 26Israel mi nih ram kha an hun nam tikah an hmai in Bawipa nih ram chungin a dawimi hna Amor mi nih an biakmi siasal biaknak thil fihnung bik kha Ahab nih a tuah).
27Cun mah bia cu Ahab nih a theih tikah, a puan kha a thleh hna i a tak cungah puanchia aa hruk i rawl a ul i lungpur ngaiin aa chawk. 28Cun Bawipa bia cu Tishbemi Elijah sinah khan a ra i, 29“Zeitindah Ahab nih ka hmaiah lungṭhum ngaiin a um kha na hmu ko lo maw? Ka hmaiah a lung a ṭhumh caah ṭhat lonak kha amah chan ah hin cun ka tlunter lai lo; sihmanhsehlaw a fapa chan ah a innchungkhar cungah hin ṭhat lonak kha ka tlunter lai,” tiah a ti.
Currently Selected:
1 SIANGPAHRANG 21: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006