1 SIANGPAHRANG 22
22
Mikaiah Nih Ahab le Jehoshafat An Sungh Lai Kong A Chimchung
(2Cha 18.1-34)
1Kum thum chung cu Siria le Israel cu i do loin an um. 2Sihmanhsehlaw a kum thumnak ah khan, Judah siangpahrang Jehoshafat cu Israel siangpahrang sinah khan a rung. 3Cun Israel siangpahrang nih a sinum hna cu a thawh hna i, “Ramoth-gilead khi kanmah ta a si kannih nih dai tein kan um ko i Siria siangpahrang kut chungin kan chut lo ti kha nan hngal maw?” tiah a ti hna. 4Cun Jehoshafat cu a thawh i, “Ramoth-gilead i vaa tuk awkah na ka kalpi hnga maw?” tiah a ti. Cun Jehoshafat nih Israel siangpahrang cu a thawh i, “Kei le nang cu mi khat kan si ko, ka mi cu na mi an si ve ko i ka rang cu na rang an si ve ko,” tiah a ti.
5Cun Jehoshafat nih Israel siangpahrang cu, “Bawipa bia cu dothlat hmasa rih tuah hen,” tiah a ti. 6Cu tikah Israel siangpahrang nih profet kha hmunkhat ah a pumh hna, mi za li tluk an si, annih cu a thawh hna i, “Ramoth-gilead cu tuk awkah ka kal hnga maw, asiloah, kaa sum ko lai dah?” tiah a ti. Cun annih nih, “Hung kal ko, zeitintiah Bawipa nih siangpahrang kut chungah a pek lai,” an ti. 7Sihmanhsehlaw Jehoshafat nih, “Hika ah hin kan hal khawh ding Bawipa profet a dang pakhat tal an um ti lo maw?” tiah a ti. 8Cun Israel siangpahrang nih Jehoshafat cu, “Bawipa kan hal khawhnak ding mipa a dang pakhat a um rih, amah cu Imlah fapa Mikaiah a si; sihmanhsehlaw ka kong ah thil ṭha chim bal loin thil ṭhalo lawng kha a chim caah ka huat,” tiah a ti. Cun Jehoshafat nih cun, “Cuticun siangpahrang nih chim hlah seh,” tiah a ti. 9Cun Israel siangpahrang nih bawi pakhat kha a auh i, “Imlah fapa Mikaiah kha khulrang in ratpi tuah,” tiah a ti. 10Cun Israel siangpahrang le Judah siangpahrang Jehoshafat cu Samaria hauka luhnak i phuhri ah khan, an bawi ṭhutdan cungah an ṭhu i an puan in an i thuam; cun profet vialte hna cu an hmaiah an rak chim dulmal ko. 11Cun Khenaanah fapa Zedekiah nih thir ki aa ser hna i, “Hi bangin Bawipa nih, ‘Siria mi cu an rawk dih tiang, mah hi hin na suk hna lai,’ a ti,” tiah a ti. 12Cun cu bantuk ṭhiamṭhiam in profet vialte nih cun an chim i, “Ramoth-gilead ah cun hung kal law, hung tei ko; Bawipa nih siangpahrang na kut chungah an pek lai,” tiah an ti.
13Cun Mikaiah kawh awk i an thlahmi lamkaltu nih khan amah sinah cun, “Zohhmanh, profet hna cu lungnge tein a ṭha lei in siangpahrang sinah an bia a si; nangmah na bia zong annih lak i pakhat i a bia bantuk si ve seh law an duhning lei in chim ve ko,” tiah a ti. 14Sihmanhsehlaw Mikaiah nih, “Bawipa a nun bangin, Bawipa nih ka sin i a chimmi cu, mah cucu ka chim ko lai,” tiah a ti. 15Cun siangpahrang sinah a phak tikah, siangpahrang nih cun a rak thawh i, “Mikaiah, Ramoth-gilead cu hung tuk awkah kan kal lai maw, kan i sum lai dah?” tiah a ti. Cun anih nih a thawh i, “Hung kal u law hung tei hen u; Bawipa nih siangpahrang kut chungah a pek ko lai,” tiah a leh. 16Sihmanhsehlaw siangpahrang nih a thawh i, “Biatak dah ti lo cu Bawipa min in ka sin i zeihmanh na chim lo awkah voi zeizat dah bia kan kamter lai?” tiah a ti. 17Cun anih nih a thawh i, “Israel mi vialte cu khaltu a ngei lomi tuu bantukin tlang cung i an i ṭhek dih kha ka hmuh; cun Bawipa nih, ‘Hi hna hi bawi an ngei lo, anmah le an inn cio ah dai tein kir hna seh,’ a ti,” tiah a ti. #Nam 27.17; Mat 9.36; Mar 6.34 18Cun Israel siangpahrang nih Jehoshafat cu, “Keimah kongah cun ṭhatnak si loin chiatnak a chim lai, tiah kan ti ṭheo lo mei?” tiah a ti. 19Cun Mikaiah nih cun, “Cucaah Bawipa bia cu thei tuah: Bawipa cu a bawi ṭhutdan cungah a ṭhut i vancung ralkapbu vialte a orhlei le a kehlei ah a pawng i an dir kha ka hmuh; #Isa 6.1; Job 1.6 20cun Bawipa nih a thawh i, ‘Ahab cu Ramoth-gilead ah a hung kal i khika ah a thih naklai ahodah a lem lai?’ tiah a ti. Cun pakhat nih thil pakhat a chim i a dang pakhat nih thil dang pakhat a chim ve. 21Cun thlarau pakhat cu a hung chuak i Bawipa hmaiah cun a dir i, ‘Keimah nih ka lem lai,’ a ti. 22Cun Bawipa nih, ‘Zei in dah na lem lai?’ tiah a ti. Cun anih nih, ‘Ka va kal lai i a profet vialte hna kaa chungah nal thlarau ka va si lai,’ tiah a ti. Cun anih nih, ‘Na va lem hrimhrim lai i na lem khawh taktak lai; va kal law cu bangin va tuah,’ tiah a ti. 23Cucaah cun zohhmanh, Bawipa nih hi na profet vialte hna kaa chungah hin nal thlarau a chiah cang; Bawipa nih nangmah kongah ṭhat lonak a chim cang,” tiah a ti.
24Khi tikah Khenaanah fapa Zedekiah kha a pawngah a ra i Mikaiah kha a biang ah a bengh i, “Zeitik ah dah Bawipa thlarau cu nangmah sin i bia chim awkah ka sinin a chuah cu a si?” tiah a ti. 25Cun Mikaiah nih a thawh i, “Zohhmanh, khi ni ah, innchung chungchin dal i thuh awkah na kal tikah na hngalh te lai,” tiah a ti. 26Cun Israel siangpahrang nih cun, “Mikaiah kha tlai u law khua uktu Amon le siangpahrang fapa Joash sinah khan va kalpi u; 27cun siangpahrang nih hi bangin, ‘Hi pa hi thong ah rak thla u law rawl tlawmte le ti tlawmte lawng, daihnak in ka ra kir ṭhan hlantiang, rak pe u, a ti,’ tiah va chim hna u,” tiah a ti. 28Cun Mikaiah nih a thawh i, “Daihnak in na kir ṭhan a si ahcun, Bawipa nih ka sinah bia kha a chim lo a si lai,” tiah a ti. Cun amah nih cun, “Nannih mi vialte hna, kan chimmi cu thei tuah u,” tiah a ti.
29Cucaah Israel siangpahrang le Judah siangpahrang Jehoshafat cu Ramoth-gilead ah khan an hung kal. 30Cun Israel siangpahrang nih Jehoshafat cu a thawh i, “Ka mui kaa hleng lai i raldohnak chungah ka kal ve lai, sihmanhsehlaw nang cu na bawi puan kha i aih ko” tiah a ti. Cun Israel siangpahrang cu a mui aa hleng i raldohnak chungah khan a kal. 31Cun Siria siangpahrang nih cun a rangleng ralbawi sawm thum le pahnih hna cu, “Israel siangpahrang dah ti lo cu, ahohmanh a hme siseh, a ngan siseh, tu hna hlah u,” tiah nawl a pek hna. 32Cun rangleng ralbawi hna nih khan Jehoshafat kha an hmuh tikah, “Amah hi Israel siangpahrang a si hrimhrim ko,” tiah an ti. Cucaah amah tuk awkah khan an i mer i Jehoshafat cu a au. 33Cun rangleng bawi hna nih khan amah cu Israel siangpahrang a si lo ti an hmuh tikah, amah dawinak khan an kir ṭhan. 34Sihmanhsehlaw pakhatpa nih tinh setsaimi ngei loin a li cu a kuaih sawhsawh i Israel siangpahrang cu a thir ngaphaw angki le a ṭangphaw karlak ah a khen; cucaah a rangleng mawngtu cu, “I mer law hi i tuknak chung hin ka chuahpi tuah, zeicahtiah an ka hliam ai,” tiah a ti. 35Cun cu ni cu an i tuknak kha a fak ngaingai i siangpahrang cu zan lei i a thih tiang, Siria mi hna lei hoih in a rangleng chungah khan an doh chom; cun a hma thi cu rangleng tawne ah khan a luang. 36Cun ni a tlak hnik lioah khin, ralkapbu chungah cun, “Nanmah le nan khua cio, nanmah le nan ram cio ah tlung dih u luao,” tiin au thawng pakhat a hung um.
37Cuticun siangpahrang cu a thi i Samaria ah an ratpi i siangpahrang cu Samaria khua chungah an vui. 38Cun rangleng kha Samaria tili pawngah an ṭawl i, Bawipa nih a chimmi bia ning khan, uico nih a thi cu an liah i hlawhhlangnu hna a chungah an i kholh. 39Ahab tuahsernak a tang rihmi hna le, a tuahmi thil vialte hna le, vuiho inn a sakmi le, khua a sermi vialte hna cu, Israel Siangpahrang hna Chanrelnak Cauk chungah an i ṭial lo mei? 40Cu bangin Ahab cu a pupa hna sinah a it i a fapa Ahaziah cu amah hmun ah khan a hung bawi.
Jehoshafat Pennak
(2Cha 20.31—21.1)
41Israel siangpahrang Ahab a bawi kum linak ah Asa fapa Jehoshafat nih Judah cu pen hram a thawk. 42Jehoshafat cu pennak hram a thawk ah khan kum sawm thum le kum nga a ti i Jerusalem khua in kum kul le kum nga a uk. A nu min cu Shilhi fanu Azubah a si. 43A pa Asa lam vialte kha a zulh dih; Bawipa mithmuh i a dikmi tuah awkah a pialtak hin lo; asinain khuahrumbo hna kha a hrawk hna lo i mi nih khan khuahrumbo ah cun rai an thawi i zihmui an khangh ṭheo ko rih. 44Jehoshafat nih Israel siangpahrang he remnak zong a tuah.
45Jehoshafat tuahsernak a tang rihmi hna le a ṭhawnnak a langhtermi le zeitindah ral a doh ti tehna kha, Judah Siangpahrang hna Chanrelnak Cauk chungah an i ṭial lo mei? 46Cun a pa Asa chan lio i a rak tang rihmi hlawhhlang nu le hlawhhlang pa vialte kha a ram chungin a hloh hna.
47Edom ram ah cun siangpahrang an um lo; a ai awhtu cu siangpahrang a si ko. 48Jehoshafat nih Ofir i sui va phortu ah Tarshish sangphawlawng a ser hna; sihmanhsehlaw an kal lo; zeicahtiah, Eziongeber ah lawng cu an rawk dih. 49Cu tikah Ahab fapa Ahaziah nih khan Jehoshafat cu, “Lawng cun kan sinum hna hi na sinum hna he kal hna seh,” tiah a ti, sihmanhsehlaw Jehoshafat nih a duh lo. 50Cun Jehoshafat cu a pupa hna sinah a it i a pupa hna sinah cun a pu David khua chungah an vui; cun a fapa Jehoram cu amah hmun ah khan a hung bawi.
Ahaziah Pennak
51Judah siangpahrang Jehoshafat siangpahrang a si kum hleisarihnak ah Ahab fapa Ahaziah nih Israel cu Samaria khua in pen hram a thawk i Israel cu kum hnih a uk. 52Bawipa mithmuh ah thil ṭhalo kha a tuah i a pa lam le a nu lam kha a zul ve i Israel mi a sualtertu Jeroboam, Nebat fapa lam kha a zulh. 53Baal kha a rian a ṭuan i a biak i a pa nih a rak tuahmi vialte kha tuah in, Bawipa, Israel Pathian cu a thin a phawh.
Currently Selected:
1 SIANGPAHRANG 22: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006