1 PETER 5
5
Pathian Tuurun
1Khrihfa upa hna, kei zong Khrihfa upa ka si ve bantukin kan nawl hna. Khrih nih temhnak a inmi tehte pakhat ka si ve i a lang laimi sunparnak zongah kaa tel ve lai. 2Pathian nih an pekmi hna tuurun a khaltu kha si u law Pathian nih zohkhenh hna seh ti an duh hna bantukin lungtho lo si loin lungtho tein zohkhenh hna u. Ṭuan man hmuh ding men ah si loin ṭuan nan duh taktak ruang tu ah nan rian kha ṭuan u. #Jhn 21.15-17 3Nanmah zohkhenh awkah chiahmi hna kha a uk in uk hna hlah u, sihmanhsehlaw an i zohchun ding tu si i zuam u, tiah kan nawl hna. 4Cucaah Tuukhal Bawi Bik kha a rat tikah a ziam kho lomi sunparnak bawi luchin cu nan hmuh lai.
5Cu bantuk ṭhiamṭhiam in, nannih a no deuh pawl zong nih upa deuh pawl kha an nawl nan zulh hna lai. Nan dihlak in toidornak puan kha i aih u law pakhat le pakhat i bawm u, zeicahtiah Cathiang nih “Pathian nih milungpuam cu a doh hna i mitoidor cu a vel kha a pek hna,” a ti. #Phut 3.34 6Cucaah cun a ṭhawngmi Pathian kut toiah toidor tein khuasa u law amah nih a caan a rem a ti tikah an hlorh te hna lai. #Mat 23.12; Luk 14.11; 18.14 7Amah nih an zohkhenh hna caah nan lungretheihnak vialte kha amah cungah chia dih ko u.
8Fimhring tein um u, ralring tein um u! Nan ral Khuachia cu, seh awk kawl ah, chiandeih bangin a vak cuahmah ko. 9Nan zumhnak ah khan fek tein um u law amah cu rak doh u, zeicahtiah vawleicung khuazakip i a ummi zumhnak lei in nan unau a simi hna kha, cu bantuk temhnak cu an ing ve ti kha nan hngalh. 10Sihmanhsehlaw caan tlawmpal nan in hnuah cun, velngeihnak in a khatmi Pathian, Khrih he nan i pehtlaihnak thawngin zungzal a hmunmi a sunparnak i hrawm dingin aan kotu hna nih cun tlinnak an pek hna lai i fehnak le thazang le a fekmi hram bunhnak an pek hna lai. 11Lianhngannak cu zungzal in amah ta si ko seh! Amen.
Donghnak Bia
12Hi ca hi Silas nih a ka bawmhnak thawngin nannih kha kan kuat hna. Amah cu zumhawktlak a si tiah ka ruahmi kan unau a si. Hihi Pathian vel ahmaanmi taktak a si ti kha tehte khan ka duh i a chungah fek tein dir u, tiah forh kan duh hna. #Lam 15.22,40
13Babilon i a ummi Khrihfabu nih nan kut an in tlaih hna. Hi Khrihfabu zong cu Pathian thimmi a si ve. Cun ka fapa Marka zong nih biakchawnhnak an kuat ve hna. #Lam 12.12,25; 13.13; 15.37-39; Kol 4.10; File 24 14Pakhat le pakhat Khrihfa dawt kuttlaihnak in i biachawn u.
Khrih ta a simi nan dihlak sinah daihnak um ko seh.
Currently Selected:
1 PETER 5: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006