1 SIANGPAHRANG 2
2
David Nih Solomon Ro A Vuih
1David kha a thih caan nih a naih tikah a fapa Solomon cu ro a vuih i, 2“Vawlei cung vialte phung bangin ka kal dengmang ve cang. Ṭhawng law patling na si kha langhter tuah, 3cun zei na tuahmi paoh ah le khuazeilei paoh i naa mernak ah na hlawhtlin nakhnga, Moses phungbia chungah aa ṭial bangin Bawipa na Pathian bia beuhmi kha na zulh hna lai i amah lam kha na zulh hna lai i a nawlbia hna le a phungbia hna le a phunglam hna le a hngalhternak bia hna kha na ulh hna lai; 4Bawipa nih ka sinah keimah kong i, ‘Na fapa hna nih an kalning kha an i ralrin i keimah hmaiah zumhawktlak tein an lung dihlak le an nunnak dihlak in an kal ahcun, Israel mi bawi ṭhutdan cungah a ṭhu dingmi na ṭhing lai lo,’ tiin a chimmi bia kha a fehter lai.
5“Cuhleiah Zeruiah fapa Joab nih zeidah ka cungah a tuah kha na hngalh fawn: amah nih Israel mi ralkapbu haotu pahnih, Ner fapa Abner le Jether fapa Amasa a nawnmi hna cung i a tuahmi kha; ral lio i rak chuahmi thisen kha daihnak caan ah phu lei a cham hna i ka tai i taisawm le ka ke i kedan ah a sual lomi thisen kha a neh hna. #2Sam 3.27; 20.10 6Cucaah na fimnak bantukin tuah ko, sihmanhsehlaw dai tein a lu par cu Sheol ah run kalter hlah. 7Sihmanhsehlaw Gilead mi Barzillai fapa hna kha cu zumhawktlak tein na ti hna lai i na cabuai i rawl a eimi lakah na umter hna lai; zeitintiah na unau Absalom sinin ka rak zam lioah khan annih nih cu bantuk zumhawktlak sinak he an rak ka don. #2Sam 17.27-29 8Cun na sinah Benjamin mi Bahurim khuami Gera fapa Shimei zong kha a um, Mahanaim i ka hung kal ni ah khan amah nih a fakmi chiat a ka serh; sihmanhsehlaw keimah ton awkah Jordan i a run tikah, a sinah Bawipa min chalh in chiat ka ser i, ‘Vainam in kan that lai lo,’ tiah ka ti. #2Sam 16.5-13; 19.16-23 9Cucaah amah cu sual koplo ah rel hlah, zeitintiah nangmah cu a fim mi na si; nangmah nih zeidah a cung i na tuah awk a si kha na hngalh i thlan ah a lu par cu thisen he na kalpi lai,” tiah a ti.
David Thihnak
10Cun David cu a pupa hna sinah a it i David khua ah khan an vui. 11David nih Israel a uk chung cu kum sawm li a si; Hebron in kum sarih a uk i Jerusalem in kum sawm thum le kum thum a uk. #2Sam 5.4-5; 1Cha 3.4 12Cucaah Solomon cu a pa David bawi ṭhutdan ah a ṭhu i a pennak cu fek tein a hmunhter. #1Cha 29.23
Solomon Nih A Pennak A Fehter
13Cun Haggith fapa Adonijah kha Solomon nu Bathsheba sinah a ra. Cun anih nih a rak thawh i, “Daihnak in na ra maw?” tiah a rak ti. Amah nih, “Daihnak in ka ra,” tiah a ti. 14Cun amah nih cun a thawh i, “Na sinah chim awk zei maw ka ngei,” tiah a ti. Cun anih nih, “Chim ko,” tiah a ti. 15Cun amah nih cun, “Pennak hi keimah ta a rak si i Israel mi vialte nih amah nih a kan pen lai tiin an rak ka ruah dih ko, ti kha na hngalh; sihmanhsehlaw pennak cu a lu taw aa let i ka unaupa caah a cang, zeitintiah Bawipa nih a pekmi a si. 16Cun atu cu nangmah sinin hal kan duhmi pakhat a um i cucu ka al hlah,” tiah a ti. Cun anih nih, “Chim ko,” tiah a ti. 17Cun amah nih cun, “Solomon Siangpahrang cu ka nawlpiak ko sawh — nangmah cu an al lai lo — Shunam mi Abishag hi nupi ah a ka pek nakhnga,” tiah a ti. #1Sia 1.3-4 18Bathsheba nih, “A ṭha ko, siangpahrang cu ka rak in chawnhpiak lai,” tiah a ti.
19Cucaah Bathsheba cu Solomon Siangpahrang sinah, Adonijah airawl in bia va chim awkah a kal. Cun siangpahrang cu amah ton awkah khan a tho i a hmaiah cun a kun; cun a bawi ṭhutdan cungah khan a ṭhu i siangpahrang bawipa nu caah cun ṭhutdan a rak putter hna i a orhlei kamah khan a ṭhu. 20Cun anih nih, “Hal awk hmete pakhat kan ngei, ka al hlah,” tiah a ti. Cun siangpahrang nih amah cu, “Hal na ka duhmi cu chim tuah, ka nu, zeitintiah kan al lai lo,” tiah a ti. 21Anih nih, “Shunam mi Abishag cu nupi caah na unau Adonijah sinah pek si ko seh,” tiah a ti. 22Solomon Siangpahrang nih a nu cu a leh i, “A si ah, zeicahdah Shunam mi Abishag cu Adonijah caah na ka hal? Amah caah pennak zong hi halpiak ngat? Zeitintiah amah cu ka u pei a si i amah leiah tlangbawi Abiathar le Zeruiah fapa Joab kha an ṭan cu,” tiah a ti. 23Cun Solomon Siangpahrang nih Bawipa min chalh in chiat a ser i, “Mah hi bia nih hin Adonijah cu a nunnak a hloh lo a si ahcun, hi bantukin le hi nak tam deuh zongin Pathian nih keimah cungah tuah ko seh! 24Cucaah keimah kha a ka fehter i, ka pa David bawi ṭhutdan cungah a ka chia i bia a ka kam bangin innchungkhar a ka serpiaktu Bawipa nih a nun bangin, Adonijah cu nihin ah thah a si lai,” tiah a ti. 25Cucaah Solomon Siangpahrang nih Jehoiada fapa Benaiah kha a hei thlah; cun amah nih cun a tuk i a thi.
26Cun tlangbawi Abiathar kha siangpahrang nih cun a thawh i, “Anathoth khua ah nangmah inn le lo ah va kal; zeitintiah thih awk na tlak. Sihmanhsehlaw Bawipa Pathian kuang kha ka pa David hmaiah na rak pu i ka pa nih harnak a inmi vialte kha na rak inpi caah, atu ah cun kan that lai lo,” tiah a ti. #1Sam 22.20-23; 2Sam 15.24 27Cucaah Solomon nih Abiathar cu Bawipa tlangbawi sinak khan a chuah i cuticun Shiloh khua chung i Eli chungkhar hna kong Bawipa nih a rak chimmi bia kha a tlinter. #1Sam 2.27-36
28Cu thawng cu Joab sin a phak tikah — zeitintiah Joab nih khan Absalom cu a rak bawm lo nain, Adonijah kha cu a rak bawmh — Joab cu Bawipa thlam ah khan a va tli i biakṭheng ki kha a vaa tlaih hna. 29Cun Solomon Siangpahrang kha, “Joab cu Bawipa thlam ah a zam i zohhmanh, biakṭheng pawngah a um ko,” tiah an chimh tikah, Solomon nih Jehoiada fapa Benaiah kha a hei thlah i, “Va kal law, tlu lakin va tu,” tiah a ti. 30Cucaah Benaiah cu Bawipa thlam ah khan a ra i amah kha, “Siangpahrang nawl a si, ‘Ra chuak tuah,” tiah a ti. Sihmanhsehlaw anih nih, “Si hlah, hika ah hin thi ko ning,” tiah a ti. Cu tikah Benaiah nih siangpahrang sinah cun bia a hei kalpi ṭhan i, “Cu bantukin Joab nih a chim i cu bantukin ka leh,” tiah a ti. 31Siangpahrang nih khan amah cu a leh i, “Amah nih a chim bantuk khan tuah ko, va tu law phum colh law, cuticun keimah cung le ka pa innchungkhar cungin, Joab nih zei ruang lo i a rak chuahmi thisen mawhnak cu ṭhial tuah. 32Ka pa David hngalh loin amah nakin a ṭha deuhmi le a ding deuhmi pahnih, Ner fapa Abner, Israel mi ralkapbu haotu le Jether fapa Amasa, Judah mi ralkapbu haotu kha vainam in a tuk hna i a thah hna caah thisen chuah in a tuahmi thil hna cu Bawipa nih amah lu cung lila ah a kirter ṭhan lai. 33Cuticun Joab lu cung le a tefa hna lu cungah zungzal in an thisen cu a kir ṭhan lai; sihmanhsehlaw David cung le a tefa hna cung le a innchungkhar cung le a bawi ṭhutdan cungah cun Bawipa sinin a rami daihnak cu zungzal in a um thluangthluan lai,” tiah a ti. 34Cun Jehoiada fapa Benaiah cu a hung kal i a tuk i a thah i ramlak ah amah a inn ah khan an vui. 35Siangpahrang nih Jehoiada fapa Benaiah cu Joab hmun ah khan ralkapbu cungah a chiah i siangpahrang nih tlangbawi Zadok cu Abiathar hmun ah khan a chiah.
36Cun siangpahrang nih Shimei kha a auhter hna i amah cu, “Jerusalem ah inn i sak law cuka ah cun um; cun cuka cun khuazei hmanh ah kal hlah. 37Zeitintiah na chuah i Kidron tivarek na tan ni ah, ka thi hrimhrim lai, ti kha vaa hngalh; na thisen cu nangmah lu cung lila ah a tla lai,” tiah a ti. 38Cun Shimei nih siangpahrang sinah cun, “Na chimmi cu a ṭha; siangpahrang ka bawipa nih a chim bangin, cu bantukin na salpa nih ka tuah lai,” tiah a ti. Cucaah Shimei cu Jerusalem ah saupi a um.
39Sihmanhsehlaw kum thum a donghnak ah khin Shimei sal pahnih hna cu Gath siangpahrang Maakah fapa Akhish sinah an zam. Cun Shimei cu, “Zohhmanh, na sal hna kha Gath ah an um,” tiah an chimh tikah, 40Shimei cu a tho i laa pakhat kha a danh i a sal hna kawl awkah Gath ah cun, Akhish sinah cun, a va kal; Shimei cu a va kal i Gath cun a salle cu a ratpi hna. 41Cun Solomon cu Shimei kha Jerusalem in Gath ah a va kal i a ra kir ṭhan tiah an chimh tikah, 42siangpahrang nih cun Shimei kha mi a va auhter hna i a sinah, “Bawipa min chalh in chiat kan serter i fel tein kan chimhhrin i, ‘Khuazei hmanh ah na kal ahcun, na kal ni hrimhrim ah na thi lai ti kha fiang tein hngal tiah ka ti. Cun nang nih ka sinah, ‘Na chimmi cu a ṭha, ka ngaih lai,’ na ti. 43A si kun ahcun, zeicahdah Bawipa sin i chiat na sermi le keimah nih nawl kan pekmi nawlbia cu na zulh kun lo?” tiah a ti. 44Cun siangpahrang nih cun Shimei cu, “Nangmah nih ka pa David cungah ṭhat lonak na tuahmi vialte kha na lung chungin na hngalh ko; cucaah na ṭhat lonak cu Bawipa nih nangmah lu cung lila ah a kirter lai. 45Sihmanhsehlaw Solomon Siangpahrang cu thluachuah a hmu lai i Bawipa hmaiah zungzal in David bawi ṭhutdan cu fehter a si lai,” tiah a ti fawn rih. 46Cun siangpahrang nih Jehoiada fapa Benaiah cu nawl a pek i a va kal i a tuk i a thi.
Cucaah pennak cu Solomon kut chungah fehter a si.
Currently Selected:
1 SIANGPAHRANG 2: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006