1 SIANGPAHRANG 18
18
Elijah Kha Ahab Sinah A Ra Kir
1Caan saupi hnuah, a kum thumnak ah khin Bawipa bia cu Elijah sinah a ra i, “Va kal law Ahab sinah vaa langh tuah; cun vawlei cungah ruah ka surter lai,” tiah a ti. 2Cucaah Ahab sin i vaa langh awkah cun Elijah cu a kal. Atu cu Samaria ram ah cun mangṭam cu a fak ko cang. 3Cun Ahab nih, a innchungkhar zohkhenhtu Obadiah kha a kawh. (Obadiah nih cun Bawipa cu fak piin a upat i, 4Jezebel nih Bawipa profet hna a thah hna ah khan, Obadiah nih profet za khat a lak hna i sawm nga sawm nga in lungkua ah a thuh hna i ti le rawl in a cawm hna). 5Cun Ahab nih Obadiah cu a thawh i, “Ti chuahnak tihram vialte le hor vialte va ṭol awkah ram chungah i chawk tuah; ram hawi hna kan hei hmuh hnga i rang le laa hna hi kan hei khamh khawh sual ko hna hnga i kan saṭil hna hi sung loin kan hei um ko hnga dah kaw?” tiah a ti. 6Cucaah ram cu ṭol awkah an i phaw i Ahab cu amah lawngin khattelei ah a kal, cun Obadiah cu amah lawng in khattelei ah a kal ve.
7Cun Obadiah cu lam i a kal lioah khin, zohhmanh, Elijah nih a rak ton; cun Obadiah nih cun a hngalh i a bawk i, “Ka bawipa Elijah, nangmah na si maw?” tiah a ti. 8Cun anih nih a leh i, “Keimah ka si. Va kal law na bawipa kha, ‘Zohhmanh, Elijah hika ah hin a um ko,’ tiah va chim,” tiah a ti. 9Cun anih nih a thawh i, “Khuazei ah dah ka sual i na salpa hi rak thah awkah Ahab kut chungah na ka pek hnik? 10Bawipa, na Pathian a nun bangin, ka bawipa nih hin nangmah kawl ah mi a thlah lonak ram le miphun a um ti lo; cun annih nih, ‘Hika ah a um lo,’ tiah an rak ti tikah, cu ram cu siseh, cu miphun cu siseh, kan hmu lo tiin, chiat a serter hna. 11Cun atu cu nang nih na thawh i, ‘Va kal law, “Hika ah Elijah cu a um ko,” tiah na bawipa cu va chim,’ na ka ti. 12Nangmah sinin ka kal cangka, Bawipa thlarau nih ka hngalh lomi hmun ah an kalpi lai i cucaah ka rat i Ahab kha ka chimh i an hmuh khawh lo tikah, a ka thah lai, keimah na salpa nih hin ka tlanval lio in Bawipa cu ka upat ko dahkaw. 13Jezebel nih Bawipa profet hna a rak thah hna ah khan, zeitindah Bawipa profet za khat hna kha sawm nga sawm nga in lungkua ah ka thuh hna i ti le rawl in ka cawm hna kha ka bawipa hi an in chim lo maw? 14Atu ah nang nih naa thawh i, ‘Va kal law, na bawipa cu, “Elijah cu hika ah a um ko,” tiah va chim, na ka ti;’ amah nih cun a ka thah ko lai,” tiah a ti. 15Cun Elijah nih a thawh i, “A hmai i ka dirmi ralkapbu Bawipa nih a nun bangin, nihin ah amah sinah kaa langh hrimhrim lai,” tiah a ti. 16Cucaah Ahab kha va ton awkah Obadiah cu a kal i a va chimh; cun Ahab cu Elijah ton awkah khan a kal.
17Ahab nih Elijah cu a hmuh tikah, “Nangmah na si maw? Israel hnahnawhnak petupa?” tiah a ti. 18Cun anih nih a leh i, “Keimah nih Israel mi cu harnak ka pe hna lo, nangmah le na pa hrin nih pei nan pek hna tiah, zeicahtiah nannih nih Bawipa nawlbia kha nan hlawt hna i Baal kha nan zulh hna. 19Cucaah mi thlah hna law Israel mi vialte le Baal profet za li le sawm nga hna kha le Asherah profet za li Jezebel cabuai i rawl a eimi hna kha Karmel Tlang ah pum hna,” tiah a ti.
Karmel Tlang ah Elijah le Baal Profet Hna
20Cucaah Ahab nih Israel mi vialte cu bia a cah hna i profet hna cu hmunkhat ah Karmel Tlang ah a pumh hna. 21Cun Elijah cu mi vialte pawngah khan a ra i, “Zei can dah bei lengmang in ruahnak pahnih he nan kal lai? Bawipa cu Pathian a si ahcun, amah cu zul u; sihmanhsehlaw Baal cu Pathian a si ahcun, amah cu zul fawn ko u,” tiah a ti hna. Mi zapi nih cun bia kaa khat hmanh an let lo. 22Cun Elijah nih mizapi cu a thawh hna i, “Keimah, keimah lawnglawng hi Bawipa profet a tangmi ka si; sihmanhsehlaw Baal profet cu za li le sawm nga an si. 23Cawtum pahnih in kan pe u; annih nih tum khat i thim hna seh law, can cikcek hna seh law, thing cungah chia hna seh, mei bel kau loin; cun kei nih tum khat kha kaa can ve lai i thing cungah ka chiah lai, mei ka kau ve lai lo. 24Cun nannih nih nan pathian min kha nan auh lai i kei nih Bawipa min kha ka auh lai; mei in a kan lettu Pathian cu, amah cu Pathian cu a si lai,” tiah a ti. Cun mi vialte nih an leh i, “Na chimmi cu a ṭha,” tiah an ti. 25Cun Elijah nih Baal profet cu a thawh hna i, “Nannih nih cawtum pakhat kha i thim u law can hmasa u, nannih cu nan tam deuh cu ta; cun nan pathian min kha au u, sihmanhsehlaw mei bel kauhnawh hlah u,” tiah a ti. 26Cun annih nih an pekmi hna cawtum cu an i lak i an can i Baal min cu zingka in chun tiang an auh i, “Maw Baal, kan let tuah!” tiah an ti. Sihmanhsehlaw zei aw hmanh a um lo i zeihmanh nih a let hna lo. Cun an sermi biakṭheng a velchum ah cun heh tiah an i hlok. 27Cun chun ah khin Elijah nih cun a nihsawh hna i, “Fak piin au ngat u, pathian pei a si cu; khuadang a ruah lio hoi hna maw a si maw, ka khatkhat ah a kal ta rih i maw a si maw, asiloah, khual a tlawng i dik a si ko lai, aa hngilh i ṭhangh a herh zong a si ko lai dah kaw!” tiah a ti hna. 28Cun annih nih fak piin an au i an phung bantukin fei le nam in anmah le anmah cu an thi pawt thluahmah in an i chun an i at. 29Cun ni cu a run i mer i thlet thawinak caan tiang an au cuahmah ko, sihmanhsehlaw zei aw hmanh a um lo; zeihmanh nih a let hna lo, ahohmanh nih zei ah a rel hna lo.
30Cun Elijah nih mi vialte cu a thawh hna i, “Ra ka naih tuah u,” a ti hna i mi vialte nih cun an naih. Cun anih nih an hrawh cangmi Bawipa biakṭheng kha a remh; 31Bawipa bia a sinah a phan i, “Na min cu Israel a si lai,” tiah a timi Jakob i a fapa hna an phun zat khan Elijah nih lung hlei hnih aa lak i #Gen 32.28; 35.10 32Bawipa min in biakṭheng pakhat a ser. Cun a velchum cun kahcham a cawh i a ngan lei cu thlaici rel hnih tlum hrawng a si. 33Cun thing kha a ningcang tein a chiah hna i cawtum kha a can cikcek i thing cungah cun a chiah. Cun amah nih cun, “Ti ralca pali khat in chia u law, khangh thawinak le thing kha toih hna u,” tiah a ti. 34Cun aa thawh i, “Tuah ṭhan rih u,” tiah a ti i an tuah ṭhan. Cun, “A voi thumnak tuah ṭhan rih u,” a ti i a voi thumnak an tuah ṭhan. 35Cun ti nih cun biakṭheng cu a kulh i kahcham zong cu ti a khat.
36Cun thlet thawinak caan ah khin profet Elijah cu a pawngah a ra i, “Maw Bawipa, Abraham, Isak le Israel i Pathian, nangmah cu Israel mi chungah hin Pathian na si i keimah cu na sal ka si i hi thil vialte hi nangmah bia in ka tuah ti kha nihin ah hin langhter ko. 37Maw Bawipa, nangmah cu Pathian na si i nangmah nih annih cu an lung na kirter ṭhan hna ti kha mi hna nih hin an hngalh nakhnga, ka let tuah, maw Bawipa, ka let tuah,” tiah a ti. 38Cun Bawipa mei cu a rung tla ciammam i khangh thawinak le a thing le lung le leidip kha a kangh dih hirhiar hna i kahcham chung i a ummi ti kha a liah dih. 39Cun mah cucu mi vialte nih khan an hmuh tikah an bawk i, “Bawipa hi pei Pathian cu a rak si hi, Bawipa hi pei Pathian cu a rak si hi,” tiah an ti. 40Cun Elijah nih annih cu, “Baal profet kha tlai hna u, pakhat hmanh luatter hna hlah u,” tiah a ti. Cun annih nih an tlaih hna i Elijah nih Kishon tivate ah khan a vun kalpi hna i khika ah a thah hna.
Ruah Surnak Dingah Thla A Cam
41Cun Elijah nih Ahab cu a thawh i, “Hung kal law hung ei law hung ding tuah, zeitintiah ruah a sur hluahmahmi thawng a um,” tiah a ti. 42Cucaah ei awk le din awkah Ahab cu a hung kal. Cun Elijah cu Karmel Tlang par ah a kal i vawlei ah a kun i a hmai cu a khuk le a khuk karlak ah a chiah. #Jei 5.18 43Cun a sinum cu a thawh i, “Hung kal law rili lei kha hung cuan tuah,” tiah a ti. Cun a hung kal i a hung zoh i, “Zeihmanh a um lo,” tiah a ti. Cun, “Voi sarih in hung kal ṭhan tuah,” tiah a ti. 44Cun a voi sarihnak ah cun, “Zohhmanh, rili chungin mi kut tiate khi khuadawm a kai iaimai,” tiah a ti. Cun amah nih, “Hung kal law, Ahab kha, ‘Ruah nih an hren sual lai, na rangleng kha tim law vung kal cang,’ tiah hung chim,” tiah a ti. 45Cun tlawmpal ah khin van cu khuadawm le thli in a nak khuihmaih i ruah cu fak piin a sur. Cun Ahab cu a rangleng kha aa cit i Jezreel ah a kal. 46Cun Bawipa kut cu Elijah cungah khan a um i a biar aa rengh i Ahab hlanah Jezreel luhnak kutka ah khan a rak tli.
Currently Selected:
1 SIANGPAHRANG 18: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006