Thiampite 1
1
Pum bup Meihal Biakpiaknate
1 Topa ompuina Puanbuk sung pan Topa in Moses sam a, 2Israel te ii biakpiakna a nei ciang a zui tu in a nuai a ngeinate pia hi.
Mihing khat pawpo in nganhing taw biakpiakna a nei ciang, a khuihon ahibuale, a tuuhon ahibuale a kealhonte sung pan khat pia tu hi. 3A khuihonte sung pan khat taw meihal biakpiakna a pia ahile, a mealhem ngawl khuital khat hi tu hi. Topa ii a saan natu in Topa ompuina Puanbuk kongbiang ah pia tu hi. 4Ama in khuital lu tungah a khut nga tu a, tuasia ama mawphel natu biakpiakna in kisaang tu hi. 5Tualai ah ama in tua khuital ngo tu a, Aaron suan thiampite in khuital chi sia Topa tungah a piak zawkciang Puanbuk kongbiang ah a om biaknatau pangh li ah a chi the tu hi. 6Tua zawkciang ama in a vun hoai in a sa sem tu a, 7thiampite in biaknatau tungah thing seng in mei taw tu hi. 8Amate in a kisemsa sabak teng, a lu le a thau taw mei tungah koi tu hi. 9Ama in a sungkua le a nungpeangte nii, sil tu a vaipuak nei thiampipa in sa teng biaknatau ah hal tu hi. Tua an taw biakpiakna ii ngimnam sia in Topa lungkimsak hi.
10Mihing khat in a tuu ahibuale a kealte sung pan khat taw biakpiakna a nei le, a mealhem ngawl a tal khat hi tu hi. 11Ama in biaknatau saksang ah tuasia ngo tu a, biaknatau pangh li ah thiampite in a chi the tu hi. 12A sa a sem zawkciang thiampipa in a sa teng mei tungah koi tu a, a lu le a thau zongh kihel tu hi. 13Ama in a sungkua le a nungpeangte nii sil tu a, thiampipa in Topa tungah biakpiaknate pia in biaknatau tungah hal tu hi. Tua an taw biakpiakna ngimnam in Topa lungkimsak hi.
14Mi khat in vacim khat taw meihal biakpiakna a pia le, ngam vakhu khat ahi buale, inn vakhu khat hi tu hi. 15Thiampipa in tua biakpiakna sia biaknatau ah paipui tu a, a ngawng meaktan in, biaknatau tungah a lu hal tu hi. Biaknatau pangh ah a chi taaksak tu hi. 16A longtawl le a tawl sungah a om teng la tu a, vut koina, biaknatau ii nisuana sangah vawk tu hi. 17Ama in a thate nii pan len tu a, a thate tatsak ngawlin a pum balkeak tu a, biaknatau tungah a pum bup hal tu hi. Tua an taw biakpiakna ii ngimnam in Topa lungkimsak hi.
Currently Selected:
Thiampite 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016