Thiampite 2
2
Antang taw Biakpiaknate
1Mihing khat pawpo in antang taw Topa biakpiakna a nei ciang, antang ngoaivui masa nanak tu hi. Ama in olive thau le ngimnamtui buak tu a, 2Aaron suan thiampite kungah paipui tu hi. Thiampipa in anvui khutdim khat, sathau le ngimnamtui theampo la in, Topa tungah kipia siat zo hi ci in a kiheak thei natu in biaknatau ah hal tu hi. Tua an biakpiakna ii ngimnam in Topa lungkimsak hi. 3A taanglai antang teng thiampite neisa hi a, Topa a kipia an sung pan a laak ahikom, thiangtho mama hi.
4A kipia anluum sia, anluum emna bealpeu sungah em ahile, tol saw ngawl hi nanak tu hi. Tuasia olive thau taw a kihel a anluum liante ahibuale olive thau taw a kizut a muhpaate hi thei tu hi.
5A kipia anluum sia moh emna taw minsak ahile, olive thau le anvui a kihel hi tu a, ahizong tol saw ngawl hi tu hi. 6Biakpiakna in na nei ciang, tuasia balneen in a tungah sathau na buak tu hi.
7Beal baannei taw a kihuan anluum a kipia ahile, olive thau le anvui taw huan hi tu hi. 8Hi an sia Topa tungah biakpiakna khat in paipui a, thiampipa tungah pia in, biaknatau ah paipui tu hi. 9A vekpi in Topa tungah a kipia a hina thu limlakna in thiampipa in tawm la a, biaknatau tungah hal tu hi. Tua an biakpiakna ii ngimnam in Topa lungkimsak hi. 10A taanglai biakpiaknate thiampite neisa hi a; Topa a kipia an sung pan a kila ahikom, thiangtho mama hi.
11 Topa a kipia antang taw biakpiaknate tol kisaw ngawl tu a; Topa tungah na piak an sungah khuaitui ahibuale tol na zangh ngei buatu hi. 12Anpal taw biakpiakna khat kum simin na paipui tu uh a, ahizong biaknatau ah na hal buatu uh hi. 13Antang taw biakpiakna theampo ah ci saw vun, banghang ziam cile ci sia noma le Pathian kilaklaw ah thuciamna lim ahi hi. (Biakpiakna theampo ah ci saw nanak vun.) 14Anpal taw Topa tungah biakpiakna na nei uh ciang, kan sa antang ahibuale ngoaivui sa an hi tu hi. 15Tua tungah olive thau helin ngimnamtui na buak tu uh hi. 16Topa tungah an taw biakpiakna a hina, limlakna in antawm, sathau le ngimnamtui theampo zongh thiampipa in hal tu hi.
Currently Selected:
Thiampite 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016