Thukhente 1
1
Judah le Simeon Minamte in Adonibezek Pummat
1Joshua thi zawkciang Israel te in Topa dongh a, “Akuate nam pai masa in Canaan te sim tu khu ziam?” ci uh hi.
2 Topa in, “Judah nam pai masa tu hi. Amate ngam uksak tu khi hi,” ci in zo hi.
3Judah mite in Simeon mite tungah, “Ei hong kipia ngam sungah ko taw hong pai tavun, Canaan te ih sim khawm tu hi. Tua zawkciang no hong kipia ngamte sia ko zongh kong sim pui tu uh hi,” ci hi. Tua ahikom Simeon namte le 4Judah namte sia ngalsim tu in kuan khawm hi. Topa in amate sia Canaan mite le Periz mite zosak a, Bezek ah mi 10,000 zo uh hi. 5Amate in tua munah Adonibezek mu in sim uh hi. 6Ama tai hi, ahihang amate in del a, pummat in a khutpite le a peangpite tansak uh hi. 7Adonibezek in, “Kumpi sawmsali, a khutpite le a peangpite a kitante in ka sabuai nuai ah antaakte tawm uh hi. Amate tung a ka vawt teng Pathian in kei tungah tu in hong vawt hi,” ci hi. Jerusalem ah ama kipaipui a, tua munah thi hi.
Judah nam in Jerusalem le Hebron Zothal
8Judah mite in Jerusalem simin la uh hi. A mite thatin a khuapi haltham hi. 9Hisia zawkciang amate in mualtung ngam, mualpeang le thangsang ngam kona ah a teang Canaan mite sim uh hi. 10Amate in, Kiriath Arba a kici ngei Hebron khuapi kiim a teang Canaan mite kuan in sim uh hi. Tua munah amate in Sheshai, Ahiman le Talmai bee le phungte zo uh hi.
Othniel in Debir Khuapi Zothal
(Joshua 15:13-19)
11Tua mun panin Judah mite sia tua hun lai in Kiriath Sepher a kici Debir khuapi sim tu in kuan uh hi. 12Amate sung pan khat ahi Caleb in, “Kiriath Sepher a la zo pa sia ka tanu Achsah taw teangsak tu khi hi,” ci hi. 13Caleb naupa Kenaz ii tapa Othniel in khuapi la zo hi, tua ahikom Caleb in a tanu Achsah sia a teenpui tu in pia hi. 14Mo kiteen ni in Othniel in ama munah, a pa tung pan lo khat ngenin sawl hi. Ama sia a laa tung pan hong tuak a, Caleb in bang dei ni ziam ci in dongh hi. 15“Tuicing pawlkhat dei khi hi, leitang nong piak sia mun kona hi thong hi,” ci hi. Tua ahikom Caleb in ama cik tungnung le cik nuainung pia hi.
Judah namte le Benjamin namte ii Zawnate
16Moses sunghpa ii suan Ken mite sia Judah mite taw paitanin palm thing pona Jericho pan mualkolna ngam Judah ngamsung Arad thangsang zuan uh hi. Amate sia Amalek te taw tua munah teang khawm uh hi. 17Judah mite le Simeon mite kuan khawm in Zephath khuapi a teang Canaan mite zo uh hi. Amate in khuapi tomlaw a, susia in, Hormah ci in min phua uh hi. 18-19Topa in Judah mite hu a, amate in a neisa tu in mualtung ngam la uh hi. Ahihang amate in Gaza, Ashkelon, ahibuale Ekron le a kiim a ngamte a la bua uh hi. Hi mite tuipi hui ah teangin thik siphu ngalleang nei ahikom Judah mite in a nawtkeak zo bua uh hi. 20Moses ii thupiak bangin, Hebron sia Caleb kipia a, ama in khuapi sung pan Anak suan bee le phung thum teng notkeak hi. #Jos 15:13-14 21Ahihang Benjamin nam mite in Jerusalem khua a teang Jebus te notkeak ngawl ahikom Jebus mite sia Benjamin mite taw tua hun a kipan teang khawm hi. #Jos 15:63; 2 Sa 5:6; 1 Khang 11:4
Ephraim nam le Manasseh nam in Bethel Zothal
22-23Ephraim le Manasseh namte sia tua hun lai in Luz a kici Bethel khuapi sim tu in kuan uh hi. Topa in amate hu hi. Amate in khuapi sungah thudawpkute paisak uh a, 24pasal khat khua pan a pusuak a mu ciang, “Khuapi sung tumna hong lak le te bangma hong law ngawl tu khu hi,” ci uh hi. 25Tua ahikom ama in lak a, tuasia ciang Ephraim le Manasseh mite in tua pasal pa le a innkuanpui teng simngawl mon siat uh hi. 26Ama in tua zawkciang Hit te ngam ah pai in, khuapi khat tua munah saat hi, Luz ci in a min phuak a, tu dong ma tua min taw kina lai hi.
Israel te ii Nawkeak ngawl Mite
27Manasseh namte in Beth Shan, Taanach, Dor, Ibleam, Megiddo, le a nai a khuate sung a teang mite a notkhia bua uh hi; Canaan mite tua munah teang suak uh hi.#Jos 17:11-13 28Israel mite a thahat vaial a, Canaan te zawthawk thu taw amate ii na seamsak hi, ahihang notkeak siat ngawl lai hi.
29Ephraim namte in Gezer khuapi panin Canaan mite notkeak ngawl ahikom Canaan mite sia amate taw teang khawm suak uh hi. #Jos 16:10
30Zebulun namte in Kitron khuapi le Nahalal khuapi sung a teang Canaan mite notkhia ngawl ahikom Canaan mite sia amate taw teang khawm top a, zawthawk thu taw amate ii na seamsak hi.
31Asher namte in Canaan mite sia Acco, Sidon, Ahlab, Achzib, Helbah, Aphek, le Rehob khuapite sung teang mite a notkeak bua uh hi. 32Asher mite in Canaan tualsuak mite notkeak ngawl ahikom amate taw teang khawm hi.
33Naphtali namte in Beth Shemesh le Bethanath khuapite sung a teang mite a notkeak bua uh hi. Naphtali mite in Canaan tualsuakte taw teang khawm uh hi, ahizong zawthawk thu taw amate ii na seamsak hi.
34Amor mite in Dan namte sia mualtung ngam ah not to uh a, zaanglei ah a tuaksuk tu khaam uh hi. 35Amor mite sia Aijalon, Shaalbim, le Heres Mual ah teang suak a, ahihang Ephraim le Manasseh te in amate uk in, zawthawk thu taw amate ii na seamsak hi.
36Sela saksang ah Edom te ngamngi sia Akrabbim Mualciangh kaantan in pai hi.
Currently Selected:
Thukhente 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016