Thukhente 2
2
Bochim ah Topa ii Vantunglalang
1 Topa ii vantunglalang sia Gilgal pan Bochim ah pai a, Israel te munah, “Egypt ngam panin no kong lakhia a, na taanghpupite tungah ka kamciamsa leitang tungah kong then hi. ‘Nang taw ka thuciamna ka peal ngei buatu hi. 2Hi ngam a teang te taw thuciamna vawt ngawl het tu nu hi. Amate biaknataute na baltham nanak tu uh hi,’ ka ci hi. Ahihang kong sawl bangin na ngamta bua uh hi. A lee lalam in na ngamta uh hi! #Pu 34:12-13; Thkna 7:2-5 3Tua ahikom tu in kong cina pan, mai sang na manaw kawmin hi mite not nawn ngawl tu khi hi. Amate sia na ngalte uh hong hi tu a, tua ciangin amate ii pathian biakpiakna in no thaang hong sia tu hi,” ci hi. 4Vantunglalang in hi teng a ci zawkciang, Israel mite theampo kap hi, 5tua hu in tua mun sia Bochim kici hi. Tua munah amate in Topa tungah sangaw biakpiakna pia uh hi.
Joshua ii Thina
6Mi sim in ama ii neisa ngam le lei tel a nga tu in Joshua in Israel te paisak hi. 7Joshua nuntak lai tengin Israel mite in Topa na seam uh hi, tuaciang a thi zawkciang zong, Topa ii Israel atu na lianpi a vawt teng a mu lampuite nuntak lai teng tuabang ma seam tan uh hi. 8Topa naseampa Nun ii tapa Joshua sia kum za le kum sawm a phak ciang thi hi. 9Ama sia Ephraim mualtung ngam Gaash Mual saksang ama ii leitang ahi Timnath Serah a kicina ah kiphum hi. #Jos 19:49-50 10Tua khang bup mi theampo zongh thi siat zo a, tuaciang a khang kikte in Topa le ama ii Israel atu a sep a vawtte mangil uh hi.
Israel in Topa A biakna pan Tawp
11Tua zawkciang Israel mite in Topa tungah mawna vawtin, Baal pathiante bia tu in hong kipan uh hi. 12A taanghpupite ii Pathian, Egypt ngam panin amate a pusua pui Pathian, Topa bia nawn ngawlin a kiim le a paam mihingte ii pathiante, pathian dangte bia tu in kipan uh hi. 13Topa a biak uh nusia in, Baal le Astarte te bia uh hi. 14Tua ahikom Topa sia Israel tungah nasia takin thin uuk a, a simthamte in simsak a, suttolsak hi. Kiim le paam a ngalte in Israel te zosak a, amate le amate kihung zo nawn ngawl uh hi. 15Ngal kidona ah a kuan uh simin, a ci sa bangma, Topa in amate langpan hi. Amate sia thinkiam in hee mama uh hi.
16Tuasia ciang Topa in a simthamte ii khut pan a hung tu Israel lampuite pia hi. 17Ahihang Israel te in a lampuite sia awlmawk vawt ngawl uh hi. Israel te Topa tungah thumaan ngawlin pathian dangte bia uh hi. Amate ii pate in Topa thupiakte ni hi, ahihang hi khangthakte in thu ni nawn ngawl paih uh hi. 18Israel te tungah Topa in lampui khat a piak simin, tua lampui pa ii nuntak lai teng Topa in ama hu a, mite sia ngalte khut sung pan hung hi. Nenniamna le ngim thuakna taw a tau hu in Topa in amate hesuak hi. 19Ahihang lampui sia a thi ciangin amate ngamtat ngeite ngamta kik in, a khang masa te sangin a ngamtatna uh sia zaw hi. Amate in pathian dang bia in a na sepsak uh a, amate ii khansiatna te a thasua nuam peuma bua uh hi. 20Tuasia ciang Topa sia Israel te tungah thin uuk mama a, “Hi minam in a taanghpupite tungah a kepcing tu in thu ka piaksa thuciam sia paltan hi. Amate in kei thu hong ni ngawl ahikom, 21Joshua ii thi hun dong a ngam sungah a om lai minamte notkeak nawn ngawl tu khi hi. 22A taanghpupite vawt bangma in hi Israel mite in ka zia hong zui ziam hong zui bua ziam ka heak natu in amate zangh tu khi hi,” ci hi. 23Tua ahikom Topa in tua minamte sia a ngam sungah teangsak lai a; Joshua in a zosak bua hi, Joshua ii thi zawk po ciang zong amate a notkeak bua hi.
Currently Selected:
Thukhente 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016