Zephaniah 2
2
A kisiik kikna tu Thuumna
1A maizum maw minam awng, 2note vui ii muut taangvai bangin hong kibet ma, Topa thin uukna a kuang sia hong thet ma, ama thinsona hong lak ma in khua hong phawk tavun. 3Ama ii thupiakte a ni, ngam sungah a kiniamkhiak note theampo awng, Topa sangah hong kiheak tavun. A maan sia vawt vun a, Topa mai ah noma le noma kiniamkhiak vun. Tua hile Topa ii a thin uukna hong lak ni ciangin daan khak natu pan suakta tha tu nu hi.
Israel kiim A ngamte Lal natu
4Gaza khuapi ah a kinusia kuama om ngawl tu hi. Ashkelon kitaisan tu hi. Ni lang sungah Ashdod mite kihawlkeak tu hi, tuaciang Ekron mite sia amate khuapi pan kihawlkeak tu hi. 5Tuipi hui ah a teang no Philistine mite awng, a lal hi zo nu hi. Topa in no tungah thukhen zo hi. Ama in hong susia tu a, khat zongh na taang buatu uh hi. 6Tuipi hui na ngam uh sia tuucingte bukte le tuukhawkte omna lozau suak tu hi. 7Judah mi a nungta laiteng in na leitang uh la tu hi. Amate in a ngan honte thana in nei tu a, Ashkelon innte ah ngiak tu uh hi. Topa a Pathian in amate taw omkhawm tu a, amate nuamsasak kik tu hi. #Is 14:29-31; Jer 47:1-7; Eze 25:15-17; Jol 3:4-8; Amo 1:6-8; Zec 9:5-7
8 Topa Vaanglianbelpa in, “Moab le Ammon mite in ka mite a zawnsakna, a nomuna le, a ngam ka sut tu hi ci in a kiphatsakna zongh ka za zo hi. #Is 15:1—16:14; 25:10-12; Jer 48:1-47; Eze 25:8-11; Amo 1:13-15; Jer 49:1-6; Eze 21:28-32; 25:1-7; Amo 1:13-15; Pian 19:24 9Israel te ii Pathian, a nungta Topa ka hi bangma in Moab le Ammon sia Sodom le Gomorrah bangin kisusia tu hi, ci in ka kiciam hi. Tuate sia cikhukte le a laltham top, lopa bek pona mun suak tu hi. Ka mi a nungta laite in amate vanh suttol tu a, a ngam laaksak tu uh hi,” ci hi.
10Moab le Ammon mite kiphatsakna, a kisaktheina le vaanglianbelpa Topa ii mite a selno hu in daan a piak tu zia sia tuabang ahi hi. 11Topa in amate lausak tu hi. Ama in leitung pathiante sia bangma ngawl suaksak tu a, tua zawkciang minam theampo in amate ngam tek ah ama bia tu hi.
12 Topa in Ethiopia mite zongh thisak tu hi.
13 Topa in Assyria suksiat natu in a vaangletna zangh tu hi. Ama in Nineveh khuapi sia a lalsa a kinusia sa, tui om ngawl sennealngam suaksak tu hi. 14Tua mun in tuuhon, khuihon le nganhing namcin tatna mun hi tu hi. Tua a lalsa munah simbute teangin khelkite panin haam tu hi. Kongkha saamkiil tungah va-akte haam tu hi. A inn sakna thingkal ahi cedar thingte kilakeak tu hi. 15Khuapi kiphasak mama, a thahatna suangin, ngam muang a kisa khat tungah tuabangin piang tu hi. A mite in amate khuapi sia simleitung ah khuapi lianbelin ngaisun uh hi. Bangza a ngamtongta mun, ngamsate tawl omna mun suak tu ziam! A kaantan in a pai pawpo in a mu ciang patau in ton tu hi.
Currently Selected:
Zephaniah 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016