Micah 7
7
Israel ii Ngamtat Siatna
1Ka lametna bo hi! Thingnga pangh sa, sapitnga thot sa a vil mihing ngilkial khat taw ka kibang hi. Sapit theampo le theinga lim theampo kilo siat zo hi. 2Ngam sungah thumaan mihing khat zongh taang ngawl a, Pathian tungah kuama thumaan ngawl hi. A kuama po in ngual a thalup thei natu hunpha ngak hi. A kuama po in a mipuite savai bangin vai hi. 3Amate siatna vawt tu thiam siat uh hi. Uliante le thukhenmangte in sumnguk ngen uh hi. Mihing ci thei khat in ama uuk teng amate tungah son a, tuabangin amate vaihawm khawm uh hi. 4Amate sung pan a phabelte le a thumaan belte ngawngawn lopate bangin mannung ngawl uh hi.
Pathian in amate a encik kamsaangte tungtawnin amate a kidop natu a hil khol bangin ama in tua mite daan a piak tu ni hong theng zo hi. Tu in amate lungmang uh hi. 5Na innpaam ahizong, na ngualtamh ahizong umin muang heak in. Na zi tungah na pauna ngawngawn kidawm in. 6Hi hun sungah tapate in a pate sia a mawmaw bangin vawt tu a, tanute in a nute nalh tu uh hi, mote in a tonupite taw kihau tu a; mihing khat ii ngalte sia ama innkuanpuite ma hi tu hi. #Mt 10:35-36; Lk 12:53
7Ahihang keima in Topa ka mitsuan tu hi; kei hong ngum tu Pathian kimuang takin ka ngak tu hi. Ka Pathian in kei hong za tu hi.
Topa in Ngupna Hong puak
8Ih ngalte in ei tungah hong oaiaam natu thu om ngawl hi. Ei ih pukvawk zo a, ahihang ih tho kik tu hi. Tu laitak khuazing sungah ih om a, ahihang Topa in khuavak hong pia tu hi. 9Eite in Topa tungah ih maw zo hi, tua ahikom tu in ama ii thin uuk tutna tawmvei ih thuak kul tu hi. Ahihang a tawpna ah ama in eite hong dal tu a, ei tungah hong kitat khialnate a maan taw hong laihsak tu hi. Ama in khuavak sung hong then tu a; hong ngupna ih mu dong ih nungta tu hi. 10Tuasia ciang ih ngalte in hi sia mu tu a, kimaimawlsak tu hi — tua ngalte in “Topa na Pathian uh koisung a om ziam?” ci in hong tawtawte ma hi tu hi. Amate ngallelna, lamlai ah buan bangin a kitotcil nate ih mu tu hi.
11Jerusalem mite awng, khuapi luphungte cian kik tu hun hong theng tu hi. Tua hun ciang na ngam kikeak tu hi. 12Na mite mun theampo pan — nisuana sang Assyria pan, thangsang Egypt pan, Euphrates ngamkhen sung pan, tuipi ngalkhat pan le mual khualanate pan no kungah hong heak kik tu hi. 13Ahihang tua leitang sia a tungah a teangte ngitlo seksol hu in sennealngam suak tu hi.
Topa ii Israel A Hesuakna
14 Topa awng, na tealsa na mite tungah tuucing khat hong hi ta'n. Amate in duisung ngampa ah a tuatuamin teang hikale, a kiimkot ah leihoi leipha om hi. Nidang tawngh lai, a kivaak bangin lohing tamna ngam phana Bashan le Gilead ah amate paisak in kivaak tahen.
15 Topa awng, Egypt pan nong pusuasak lai hun a na vawt bangin kote atu in nalamdangte vawt in. 16Ngam tuatuamte in hi sia mu tu a, a thahatna theampo kawm pan a thin lal tu uh hi. Thin kiamin lungmang a, amate a kam im in, a bilte hum tu uh hi. 17Amate leivui sungah ngulte bangin bokvak tu uh a; a kulhpite pan liingin lauin hong pai tu uh hi. Amate in Topa ih Pathian kungah kiitakna taw hong heak kik tu uh hi.
18 Topa awng, nang bang ahi pathian dang om ngawl hi, a nungta lai na mite ii mawnate na maisak hi. A tawntungin thin uukin na om bua a, na itna kip nong lak sia nuam na sa hi. 19Nangma in kote khatvei ma nong hesuak kik tu hi. Kote ii mawna khialnate na peang nuai ah na siikcip tu a, tuipi taw ah na khiasuk tu hi! 20Taanghlai koma ii taanghpupite tungah na kamciam bangin Abraham le Jacob ii suan le paal na mite tungah na thumaanna le tatsat ngawl na itna na lak tu hi.
Currently Selected:
Micah 7: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016