Kaa late 2
2
Topa ii Jerusalem Daan A piakna
1 Topa a thin uuk in Zion sia khuazing taw tuam zo hi.
A vantung hoina te ama in sia sak zo hi.
A thin uuk ni in a Biakinnpi ngawngawn nusia hi.
2 Topa in Judah ngam khuano theampo hesuak ngawlin lalthamsak a,
Ngam huukna kulhpite baltham hi.
Ama in kumpi ngam le a ukte maizum pia hi.
3Ama in a thinso in Israel te thahatna saattham hi.
Ngalte hong kuan ciang ama in
hong hu nuam ngawl hi.
Kaanghmei bangin ama in
ei hong zaap keak a, na theampo lalthamsak hi.
4Eite sia ngal bang phetin
a thaltangte taw hong tuung hi;
Ih lungdamna le ih diksak
theampo ama in thatlum hi.
Hi lai Jerusalem ah ama ii thin uukna meikuang eite in ih thuak hi.
5 Topa in ngal khat bangin Israel susia zo hi.
Ama in a kulhte le kumpi innte a zaancip sa in nusia hi.
Ama in Judah mite tungah a bo thei ngawl heena tungsak hi.
6Ama ih biakna mun
Biakinnpi sia ama in a bebekin sutham hi.
Ama in ni thiangthote le Sabbath te bosak zo hi.
Kumpipa le thiampipa in ama thin uukna a kibangin thuak khawm uh hi.
7 Topa in a biaknatau nial a, ama ii a thiangtho Biakinnpi taisan hi.
Ama in Biakinn pangte sia ngalte in balthamsak hi.
Khatvei lai in lungdamna taw ih biakna munah amate ngalzo in au uh hi.
8Zion khuapi luphungte a cipthap tu sia Topa in ciangtan zo hi.
A vekpi a sia tu in ama in see zo hi.
Tu in tausaangte le luphungte lal khawm hi.
9Kongpite sia leivum suangvum sungah kivuknelh a,
a zawlte a bebekin kivaat tham zo hi.
Kumpipa le namliante tu in saltaang in om hi.
Thukham kihil nawn ngawlin,
kamsaangte in mu kholnate Topa ii tung pan nga ngawl hi.
10Jerusalem ii pasal huaite sia huthe ngawlin lei ah to khipkhep uh hi.
A lu tungah leivui kithe in khau-ip puan silh uh hi.
Ngaknu note lei ah a lu kun uh hi.
11Ka ka kaana in
ka mitte paat zo a,
ka thin na mama hi.
Ka mite lalna hangin hee in ka tha zawm ngawp hi.
Patangnote le nausente khuapi lampite ah butthi uh hi.
12Amate ngilkial dangtaak in a nute kaa uh hi.
Amate sia a liamte bang phetin lampi ah puk uh a,
Tuaciang a nute ii kaang sungah dadam in thi uh hi.
13Jerusalem awng,
kong it Jerusalem awng,
bang kong ci thei tu ziam?
Bangbangin nang hong heeneam thei tu khi ziam?
Kuama in hi bang peuma in thuak ngeingawl hi.
Na tuasiatna sia tuipi bangin mong nei ngawl a;
bangma muanmawk thei tu om ngawl hi.
14Na kamsaangte in
leilot thu ngawl po nang tungah son tu nei ngawl hi.
Na mawna a pholaak ngeingawl amate thuhilna taw
nang hong theam ahi hi.
Amate in na kisii kik tu
a kul ngawl tu dongin hong ngaisunsak hi.
15Khuapi kaantan in a pai
mihingte in nangma hong ngaimawk et uh hi.
Amate in Jerusalem ii zaanthapna sia a lu pei in nuisan uh hi:
“Hisia, tua khuapi hoi sia ma hi kana ziam?
Hisia, leitung bup ii kiphatsakpui sia hi ka na ziam?”
16Na ngalte theampo in hong selno in etsatna taw nang hong salh uh hi.
Amate mukmen in
“Khuapi lalthamsak zo hing!
hisia ih ngalaakbel ni hi!” ci in selno uh hi.
17 Topa in hong tawnna teng a khak belin tungsak hi.
Ama in hun saupi lai a
eite kidop natu hong hil sa bangin hesuakna om ngawlin
hong lalsak hi.
Ama in ih ngalte ngalzosak a, ih ngallelna ah amate lungdamsak hi.
18Jerusalem awng, na luphungte mama in Topa ko tahen!
Na thituite a sun a zanin ngun bangin luangsak in;
kaana le khuangaina taw nangma le nangma kingawt in!
19Zankhuateak Topa tungah ko tu in tho kikik in!
Na thin na lung takpi taw na patangte — lampi king sim ah neak tu nei ngawl pukhong in a thi tu
na patangte atu in ama tungah hesuak ngen in.
20En in, Topa awng! Banghang hi bangin daan hong thuaksak ni ziam!
Nupite in a it a tate ii sa ne uh hi!
Thiampite le kamsaangte sia Biakinnpi sung mama ah kithatlum hi!
21A moi a haam a kibangin lampi ah thi uh hi.
Ngalte in ngaknu le tangval teng namsau taw thatlum uh hi.
Na thin uuk ni in hesuak ngawlin amate na thatlum hi.
22Nangma in keima ii kiim ah
hong lausak poai vawt tu in ka ngalte na sam a,
Tuaciang tua na thin uuk ni in
kuama suakta zo ngawl hi.
Amate in itna taw ka vak ka taa
sa tanote suamlum uh hi.
Currently Selected:
Kaa late 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016