John 20
20
Thaankuul Hawm
( Mt 28:1-8; Mk 16:1-8; Lk 24:1-12)
1Nipi ni zingsang tuung khuavak ma in, Mary Magdalene thaan vil tu a pai ciang, a kongvang pan suangtumpui sia kilakeak sa in a om mu hi. 2Ama in Simon Peter le a dang nungzui, Jesus ii itpa kung zuan in tai a, “Amate in Topa sia thaan pan la zo hi, ama koisungah koi ziam ci sia he ngawl khu hi!” ci hi.
3Tuasia ciang Peter le a dang nungzui pa sia thaan ah pai uh hi. 4Amate nii in del khawm ahihang nungzui dangkhat sia Peter sangin a ngang zawin tai ahikom thaan theng masa hi. 5Ama kun in thaankuul sung a et suk ciang a kituunna puannealte mu hi, ahihang a sungah tum ngawl hi. 6Ama nung pan Simon Peter hong pai a, thaankuul sung thakhatin tum paih hi. Ama in a kituunna puannealte lei ah a om mu hi, 7tuaciang in Jesus lutang tunna puan zongh mu hi. Tua lutang kituunna puan sia puanneal dangte taw omkhawm ngawl a, a kizialsa in om tuam hi. 8Tuasia ciang thaan a theng masa nungzui dang khat sia zongh tum hi; ama in mu a um hi. 9(Amate in, “Laithiangtho ii ama thina pan tho kik nanak tu hi,” a ci sia a tel bualai uh hi.) 10Tuasia ciang nung zuite inn ah cia kik uh hi.
Mary Magdalene kungah Jesus Kilangh
(Mt 28:9-10; Mk 16:9-11)
11Mary sia thaan pua sangah dingin kap hi. A kaa kawmin kun a thaankuul sung en hi, 12tuaciang vantunglalangte nii puanpaak silh in, Jesus luang sialna ah, khat a luthung, khat a khawdop ah to in a om sia mu hi. 13“Numei awng, banghangin kap ni ziam?” ci in amate in dongh hi.
Ama in, “Amate in ka Topa la a, koisungah koi ziam, ci in ka he bua hi!” ci in zo hi.
14Tuaciangin ama a kiheak le, ama kungah a ding Jesus mu hi; ahihang ama in Jesus ahi hunlam he ngawl hi. 15“Numei awng, banghangin kap ni ziam? Na zon sia akua ziam?” ci in Jesus in dongh hi.
Ama in huan neipa sa ahikom in, “Ama la zo na hi le, syapa awng, na koina hong son ta'n. Pai in ka la tu hi,” ci hi.
16Jesus in, “Mary awng!” ci hi.
Numeinu ama sangah nga in, Hebrew kam in, “Rabboni!” ci hi. (Hi kammal sia Syapa a cinopna hi.)
17“Hong len top heak in, banghang ziam cile Pa kungah paito ngawl lai khi hi. Ahihang ka suapuipate kungah pai in va son ta'n. Ka Pa le amate ii Pa, ka Pathian le amate ii Pathian kungah heak kik tu khi hi,” Jesus in ci hi.
18Tua ahikom Mary Magdalene pai in nungzuite tungah, Topa a muna thu le ama ii son in a sawl teng son hi.
A Nungzuite Kungah Jesus Kilangh
(Mt 28:16-20; Mk 16:14-18; Lk 24:36-49)
19Nipi nitak khua niam sang hi a, nungzuite in inn kikalh in kikhawm tua uh hi, banghang ziam cile amate in Jew thuneite kiita uh hi. Tuasia ciang Jesus hong tum a, amate sungah hong ding hi. Ama in “Note sungah thinnopna om tahen,” ci hi. 20Hi teng a ci zawkciang ama in a khutte le a pangh amate tungah lak hi. Nungzuite in Topa a mu uh hu in, lungnopna taw kidim uh hi. 21Jesus in, “Note sungah thinnopna om tahen,” “Pa ii kei hong sawl bangma in, kei in note kong sawl hi,” ci kik hi. 22Tua zawkciang amate tungah, a hu muutin, “Thaa Thiangtho saang vun. 23Mihingte tungah mawmaisakna na pia uh le amate kimaisak tu hi; amate mawna na maisak bua uh le amate a kimaisak buatu hi,” ci hi.#Mt 16:19; 18:18
Jesus le Thomas
24Jesus hong pai lai in, nungzui sawm le niite sung pan khat ahi, Thomas (Apeang a kici) sia amate taw a omkhawm bua hi. 25Tua ahikom nungzui dangte in, “Topa ka mu zo uh hi,” ci in ama tungah son uh hi.
Thomas in, “A khut tung thikpim mapawnte mu a, ka khutme taw a mapawnte tham in ka khut taw a pangh ka tham buale ka um buatu hi,” ci hi.
26Nipi khat zawkciang nungzuite inn sungsang ah omkhawm kik uh a, Thomas zongh om hi. Kongkhate kikalh ahihang, Jesus hong pai a, amate sungah dingin, “Note sungah thinnopna om tahen,” ci hi. 27Tua zawkciang, Thomas tungah, “Na khutme taw hi sung hong tham ta'n, ka khutte hong en ta'n; tuaciang na khut vaan in ka pangh hong tham ta'n. Um khial heak in, um takpi in!” ci hi.
28Thomas in, “Ka Topa le ka Pathian awng!” ci in zo hi.
29Jesus in, “Nong mu hu in hong um ni ziam? Hong mu ngawl napi a hong umte bangza in lungdam tu ziam!” ci hi.
Hi Laibu ii Deina
30A nungzuite ii mutang in, Jesus in hi laibu sungah a kikhum ngawl, nalamdang lakna dang tam mama vawt hi. 31Ahihang hite hong ki atna sia Jesus in Pathian Tapa Messiah a hina thu, na up natu uh le ama na upna uh tungtawnin, nuntakna na nga thei natu uh ahi hi.
Currently Selected:
John 20: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016