John 12
12
Jesus Bethany ah Sathau Kinoai
(Mt 26:6:13; Mk 14:3-9)
1Paisan Poai tu ni luk a kisap ciangin, Bethany ah Jesus pai a, thina pan a thawsak Lazarus ii inn ah tung hi. 2Amate in ama atu nitak an tua munah huansak uh hi. Martha in an piak hu hi; Lazarus sia Jesus taw sabuai kiim ah a tokhawmte sungah a kihel khat hi. 3Tua zawkciang Mary in a manham mama nard sathau namtui litre lang hong paipui a, Jesus peang tungah buakin, a sam taw nawlsak hi. Sathau namtui in inn sung bup zel hi.#Lk 7:37-38 4Jesus nungzuite khat ahi Judas Iscariot — ama a leeheak tu pa — in, 5“Banghangin sathau namtui sia ngunn dangka zathum taw zuakin mizawngte kipia ngawl ziam?” ci in dongh hi. 6Ama ii hi bang a paute sia a zawngte awlmaw takpi hi ngawl a, ngutapa khat ahihang ahi hi. Ama in sum ip keam a, sumte ama atu in a la ku tawntung pa ahi hi.
7Ahihang Jesus in, “Ama koi po vun! Ka kiphum ni ciang atu in, ama ii neisunte keamsak po vun. 8Mizawngte sia no taw hong omkhawm tawntung tu hi, ahihang kei sia no taw hong omkhawm tawntung ngawl tu khi hi,” ci hi.#Thkna 15:11
Lazarus A Kithasawmna
9Bethany ah Jesus om hi ci in a za mihing tam mama te in tua munah hong pai uh sia Jesus hang bek zongh hi ngawlin, thina pan Jesus ii a thawsak Lazarus mu nuam a, hong pai ahi uh hi. 10Tua ahikom thiampi liante in Lazarus zongh thalup natu vaihawmna nei uh hi, 11banghang ziam cile ama tung thupiang hu in Jew mi tam mama te in amate nial a, Jesus um uh hi.
Jerusalem ah Mualsuana taw Tumna
(Mt 21:1-11; Mk 11:1-11; Lk 19:28-40)
12A zing ciangin Paisan Poai siim tu in hong pai mihonpi in, Jerusalem khua ah Jesus hong pai natu thu za uh hi. 13Tua ahikom amate in palm thingbaakte la in, ama muak tu in pai uh a, “Pathian pok vun! Topa min taw hong paipa, Pathian in thupha pia tahen! Pathian in Israel Kumpipa thupha pia tahen!” ci in au uh hi.#Ps 118:25-26
14Jesus in laa khat mu in a tungah to hi, laithiangtho in hi bangin a at sia a taangtun natu ahi hi.
15“Zion khuapi awng
lau heak in!
Hi sungah na kumpipa
hong pai a,
laano tungah to hi.” #Zec 9:9
16A nungzuite in hi thu sia tua hun laitakin a tel bua uh hi; ahihang Jesus minthanna sungah a thawtosak ciangin, laithiangtho in ama huvau, hi bangin at a, amate in hi bangin ama atu in vawt hi, ci sia phawk kik uh hi.
17Lazarus thaan sung pan sam a, thina pan a thawsak lai in, Jesus taw a omkhawm mihingte in bang thu piang ci thu kiko tek uh hi. 18Tuasia hu in mihon in ama muak uh hi — banghang ziam cile hi nalamdang a vawt sia amate in za zo uh hi. 19Phariseete in khat le khat, “Na mu bang hi, eite in ih zo zo peuma bua hi! En vun, leitung bup in ama zui zo hi!” ci uh hi.
Greek te Pawlkhat in Jesus Zong
20Jerusalem ah poai sung teng biakpiakna nei tu in a paite sungah Greek te pawlkhat om hi. 21Amate in Philip (Galilee ngam Bethsaida khua mi) kungah pai in, “Syapa awng, ko Jesus mu nuam khu hi,” ci uh hi.
22Philip pai in Andrew kungah a son zawkciang, a nii in pai a Jesus munah son uh hi. 23Jesus in, “Tu in Mihing Tapa ii a lian minthanna a saan tu hun hong tung zo hi. 24A tatakin kong ci hi: zungtaang tang khat lei ah taak a, a thi phot buale tang khat nguak hi top hi. A thi le a tang tam piangsak hi. 25A kuama po ama ii nuntakna a it sia in taan tu hi; ama ii nuntakna hi leitung ah a ngaimaw peuma in, tawntung nuntakna a keam ahi tu hi.#Mt 10:39; 16:25; Mk 8:35; Lk 9:24; 17:33 26Ka naseampa sia keima omna po ah, keima taw a om thei natu in, kei atu hong sepsak nuam peuma in kei hong zui kul tu hi. Tuaciang kei atu a seam khat pawpo sia ka Pa in patoai tu hi.
Jesus in A Thi natu Son
27“Tu in ka thinngim hi — tua hi a, bang son tu khi ziam? ‘Pa awng, hi hun sia kei tungah hong tungsak heak in,’ ci tu khi ziam? Ahihang kong paina thu in hi thuakna hun a nawk tu ma in hong pai ka hi hi. 28Pa awng, nangma min thangsak in!” ci hi.
Tuaciang vantung pan aw nging khat in, “Minthangsak zo khi hi, tuaciang in minthangsak lai tu khi hi,” ci hi.
29Tua munah a ding mihonte in tua awnging za a, amate sung pan pawlkhat in vanto hi ci a, a dangte in, “Vantunglalang khat in ama paupui hi!” ci uh hi.
30Ahihang Jesus in, “Hi aw sia kei atu hi ngawlin no atu in hong nging ahi hi. 31Tu hun sia hi leitung ii thukhen thuak tu hun ahi hi; tu in hi leitung a ukpa kisuanthal tu hi. 32Leitung pan hong kilapto ciangin mihing theampo ka kungah ka kai tu hi,” ci hi. 33(Hi bangin a pau sia ama thuak tu thina zia a sonna ahi hi.)
34Mihonpi in “Ih Thukham in Messiah nungta tawntung tu in hong son hi. Tua ahile bangbangin Mihing Tapa kilaamto tu hi, ci thei ni ziam? Hi Mihing Tapa sia akua ziam?” ci uh hi.#Ps 110:4; Is 9:7; Eze 37:25; Dan 7:14
35Jesus in zo kik a, “Khuavak sia no sungah tawmvei hong om lai tu hi. Khuazing sia no tungah hong thet man ngawl natu in, khuavak na nei uh laitakin, na paina lampi ah paisuak tavun; banghang ziam cile khuazing sungah a pai khat in a zot natu mun a he bua hi. 36Tuaciang khuavak na nei uh laitak, khuavak ii mihingte na sua natu in, khuavak na um vun,” ci hi.
Mihingte Thu Up thei ngawlzia
Jesus in hi teng a ci zawkciang amate paisan in kiheam hi. 37Nalamdang lakna hi zata amate mai ah vawt zo hi napi amate in ama a um bua uh hi, 38Tua in kamsaangpa Isaiah ii sonna teng a tun natu ahi hi:
“Topa awng, ko ii son thu sia
akua in um na ziam?
Topa in a kuate tungah
a vaangletna pualaak ziam?”#Is 53:1
39Tua ahikom amate in um zo ngawl hi, banghang ziam cile Isaiah in hi bangin ci lai hi,
40“Pathian in amate ii
mit tawsak a, a thinsung khacipsak hi,
tua in, a mit khua
a mu ngawl natu,
a thinsung taw a tel ngawl natu,
tuaciang amate in
keima ii amate ka damsak natu
kei kungah hong heak kik ngawl natu, ahi hi,
Pathian in ci hi.” #Is 6:10 (LXX)
41Isaiah ii hi bangin a ci sia Jesus ii vaangletna mu a, ama huvau a son hang ahi hi.
42Tua zawk ciang ngawngawnin Jew thuneite tam mama in Jesus um uh hi; ahihang Phariseete ii synagogue pan amate a hawlkeak ngawl natu in, a kilangh taakin a upna thu a son ngam bua uh hi. 43Amate in, Pathian ii lungkimna sangin, mihingte lungkimna dei zaw uh hi.
Jesus Kammal taw Thukhenna
44Jesus in awnging takin, “A kuama po kei hong umte in kei bek hong um hi ngawl a, kei hong sawlpa zongh um ahi hi. 45A kuama po kei hong mu te in kei hong sawlpa zongh a mu ahi hi. 46Kei hong um peuma khuazing sungah a omcip ngawl natu in leitung ah khuavak bangin kong pai zo hi. 47Kong thupuak sia za napi a ni ngawlte tungah thu ka khen buatu hi. Leitung ngum tu in kong pai a, a tungah thukhen tu in kong pai bua hi. 48Kei hong nial a, kong thupuak a saang ngawl peuma ama tungah thukhen tu khat a nei hi. Ka pau sa kammal te in ni tawpkhak ni ciangin ama ii thukhenpa hi tu hi! 49Hi thu in thumaan hi, banghang ziam cile keima aituam thuneina taw ka pau bua hi, ahihang kei hong sawl Pa in ka son tu le ka pau tu thu hong pia hi. 50Tuaciangin ama ii thupiakna in tawntung nuntakna hong puak hunlam ka he hi. Tua ahiciang ka thuson teng sia Pa ii son a hong sawl teng ahi hi,” ci hi.
Currently Selected:
John 12: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016