John 10
10
Tuucingpa Thusonteena
1Jesus in, “A tatakin kong ci hi: tuukhawk sungah a kongpi pan tum ngawlin leidang pan kaato a, a tum sia nguta le ngualsuam phalakte ahi hi. 2Kongpi pan a tum sia in, tuucingpa ahi hi. 3Kongkhacingpa in ama atu kongkha honsak hi; ama ii neisa tuute a min taw a sam ciangin a tuute in ama aw a za uh hi, tuaciang ama in, a tuute lampui in pusua pui hi. 4A tuute a pusuasak zawkciang, ama in a mai ah pai in, tuute in a nung zui uh hi, banghang ziam cile a tuute in a aw tel uh hi. 5A tuute in ngualdang khat zui ngawl tu uh hi; tuabang mihing dang khat ii kung panin a tuute taikeak zaw tu hi, banghang ziam cile tuute in tua pa aw a tel bua uh hi,” ci hi.
6Jesus in hi thu sonteena son ahihang, amate in bang ci nuam ziam, a tel zo bua uh hi.
Tuucing Pha Jesus
7Tua ahikom Jesus in hi bangin ci kik hi. “A tatakin kong ci hi: Kei sia tuute ii kongpi ka hi hi. 8Kei mai a hong pai sa theampo sia ngutate le phalakte ahi uh hi, ahihang tuute in, amate aw a ngai bua uh hi. 9Keima in kongpi ka hi hi. A kuama po kei hong tawnin a tumte kingum tu hi; amate sungtang si, pusuak si tu a, nganthana mun mu tu hi. 10Ngutapa ahile a ngu tu, a that tu le a susia tu bekma in hong pai hi. Kei kong paina sia, nuntakna na nga natu uh le a kicing nuntakna na nga thei natu uh ahi hi.
11“Keima in tuute atu in a nuntakna a pia ngam tuucing pha ka hi hi. 12Tuu neipa a hi ngawl, a kicial tawm tuucingpa ahile ngiapui hong pai a mu ciangin, a tuute nusia in taisan hi; tua ahikom ngiapui in a tuute man a, kithethaangsak hi. 13A kicial tawm pa banghangin tai ziam cile, ama sia a kicial tawm hi bek a, tuute a awlmawk bua hi. 14-15Keima in tuucing pha ka hi hi. Pa in kei hong heak bangma in kei zongh in Pa ka he hi, tuasia bangma in ka tuute ka he a, amate in kei hong he uh hi. Amate atu in ka nuntakna ka pia ngam hi.#Mt 11:27; Lk 10:22 16Hi tuukhawk sung a om ngawl keima neisa tuu dangte zongh om lai hi. Tuate zongh ka paipui kul hi; amate in ka aw hong ngai tu a, tuucingpa khat ii a cin tuuhon khat suak tu uh hi.
17“Ka nuntakna ka nga kik natu in, keima nuntakna pia ngam ka hikomin, Pa in kei hong it hi. 18Kuama in kei kung pan ka nuntakna hong laaksak bua hi. Keima uuk thu in ka piak ahi hi. Ka piak tu le ka laak kik tu sia keima thu ahi hi. Hisia in ka Pa ii ka sep tu hong thupiak ahi hi,” ci hi.
19Tuaciang hi kammalte hu in mihingte sungah kikhenna om leleau hi. 20Amate sung pan tam mama in, “Ama doaivei hi! Ama a thin amh hi! Banghangin a thuson ngangai nu ziam?” ci uh hi.
21Ahihang a dangte in, “Doaivei pa khat in hi bangin thuson thei ngawl hi! Banghang doai khat in mittawte khuamu kiksak thei tu ziam,” ci uh hi.
Jesus Kisaang ngawl
22Phalbi hun hi a, Biakinnpi Aapna Poai Jerusalem ah a kivawt hunsung ahi hi. 23Jesus sia Biakinn huang sung Solomon Talaap sungah a vavak laitakin, 24mihingte a kiim ah hong kikhawm uh a, amate in, “Bang tanvei thinngim hong pia tu ni ziam? Thumaan tatak sia hong son tan: nangma sia Messiah na hi ziam,” ci uh hi.
25Jesus in “Hong son zo khi hi, ahihang kei hong um nuam ngawl nu hi. Ka Pa thuneina taw ka septe in keima luangin pau hi; 26ahihang nong um bua uh hi, banghang ziam cile note in ka tuute na hi bua uh hi, 27Ka tuute in ka aw hong ngai hi; amate ka he a, amate in ka nung hong zui uh hi. 28Amate tawntung nuntakna ka pia a, tuaciangin amate a thi ngei nawn buatu hi. Amate ka khut sung panin kuama in hong sut zo buatu hi. 29Ka Pa hong piak sia na theampo sangin thupi zaw a, kuama in Pa ii kepcingna sung panin a sut zo buatu hi. 30Pa le keima in pumkhat ka hi uh hi,” ci in zo hi.
31Tuaciang mihingte in ama a den natu suang tawm kik uh hi. 32“Ka Pa ii sep tu hong piak na pha tam mama noma mai ah kong seam zo hi; tuate sung pan koisia ka sep hu in, suang taw den hong sawm nu ziam?” Jesus in ci hi.
33Amate in “Na pha khat pawpo nasep hu in, hong deang nuam hi ngawl khu hi. Ahihang Pathian zawnsakna kam na pau hu in suang taw hong deang nuam khu hi! Nang sia mihing ma hi napi nangma le nangma Pathian in kivawt tu na hanciam hi,” ci in zo kik uh hi.#Thiam 24:16
34Jesus in “Na Thukham sungah ki at a, Pathian in ‘Note sia pathiante hi nu hi’, hong ci hi.#Ps 82:6 35Laithiangtho ii ci sia a tawntungin maan hi, ci in ih he hi; tuaciang Pathian ii thupuak a nga tua mite sia ‘pathiante’ ci hi. 36Kei ka hile Pa in hong teal a, leitung ah hong paisak hi. Tua ahile, Pathian Tapa khi hi ka ci ciang, bangbangin Pathian zawnsakna kam pau hi hong ci thei nu ziam? 37Pa ii seam a hong oaite seam ngawl ka hile, tuasia ciangin hong um heak vun. 38Ahihang tuate ma ka seam nale, Pa sia kei sungah om a, kei sia Pa sungah om ka hina thu na up thei natu in, kei nong um bua uh zong, ka septe beak na up tu uh ahi hi,” ci in zo hi.
39Khatvei ma amate in Jesus man tu in hanciam ahihang, amate khut taw kipeal hi.
40Tua zawkciang Jesus in, Jordan ngun kaantan in John ii tuiphumna munah pai kik a, tua munah taam hi. #Jn 1:28 41Mihing tam mama ama kungah hong pai uh hi. Amate in, “John in nalamdang laknate vawt ngawl hi. Ahihang hisia pa thu ama son theampo maan hi,” ci uh hi. 42Tuaciang in, tua munah a om mihing tam mama in ama um uh hi.
Currently Selected:
John 10: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016