Galatia te 2
2
Paul le A dang Sawltakte
1Kum sawm le kum li zawkciang Barnabas taw Jerusalem ah ka cia kik uh a, Titus sia keima in ka tonpui hi.#Sawl 11:30; 15:2 2Pathian in ka pai natu hong pualaak ahikom ka pai hi. Lampuite taw ka kimu tuamna sungah, Gentile te tung ka hil lungdamna thu teng ka sonthiang hi. A bosa hun ahizong, tu laitak ahizong, ka nasepna sungah lelna ka thuak tu ka uuk bua hi. 3Ka kitholpuipa Titus sia Greek mi ahitazong zawthawk thu taw a vunteap ki atsak ngawl hi, 4ahizong mihing pawlkhat in vunteap atsak nuam hi. Christ Jesus taw ih kipumkhatna tungtawnin ih nga suatakna thu kan nuamin, hi mite pawlkhat sia ih thu uppuite bangin hong kivawt a, eite sungah thudawpku tu in hong tum ku hi. Amate in eite sila in hong kai nuam hi, 5ahihang lungdamna thu ii thumaanna sia note atu a kikepcing thei natu in, amate deina tawmvei bek zongh ih zawp hun a om bua hi.
6Ahizong lampui tu bang ahi tuate — amate bang po ahizong kei atu a lamdan ngawlna taw hi bangin ka pau ahi hi; Pathian in a puasang pianzia te taw thukhen ngawl hi — tua lampui te in kei tungah ngaisutna thak piakna bangma hong nei ngawl hi ka ci hi.#Thkna 10:17 7Jew te tungah lungdamna thu hil tu nasep sia Peter tungah a piak bangin Pathian in kei sia Gentile te tungah lungdamna thu hil tu in nasep hong piak sia amate ii a musa ahi hi. 8Banghang ziam cile Pathian ii vaangletna taw kei sia Gentile te atu in sawltak ka hi a, Peter sia Jew te atu in sawltak ahi hi. 9Lampui ahi tuak James, Peter le John te in Pathian ii hi nasep tuam hong piakna hong heakpui hi; tua ahikom amate in Barnabas le kei hong nukset a, tuasia in ei teng maapang khawm tek tu ci in limlakna ahi hi. Barnabas le kei sia Gentile te sungah seam tu a, amate sia Jew te sungah seam tu in ka thukim uh hi. 10Amate hong nget thu khat sia amate pawl sungah, a cimawte ka phaw pui natu hi a, tua thu in sep tu ka lawp thu tatak ahi hi.
Antioch ah Paul in Peter Teih
11Ahihang Antioch ah Peter hong pai ciangin, mihon mai ah ama ka nalh hi, banghang ziam cile ama in khial citak ma in khial hi. 12James ii hong puak mihing pawlkhat tua mun a thet ma in, Peter sia Gentile suapuite taw an nekhawm zo hi. Ahihang hi mite hong thet zawkciang, vunteap a atsak nuamte a kiitak hu in, ama kikeam a, Gentile te taw an a nekhawm nuam bua hi. 13Jew suapui dangte zongh Peter bangma in a lauthauh te bang hong hi paih hi; tuaciang Barnabas ngawngawn zongh amate lauthauh ngamtatna in zo hi. 14Lungdamna thu thumaan lampi tang sia, amate in tawn ngawl hi, ci in ka mu ciangin, Peter munah amate theampo mai ah hi bangin ka ci hi. “Nang sia Jew mi khat hi napi Gentile te bangin a nungta nginge sa na hi a, Jew te bangin na nungta bua hi. Tua ahiciang Gentile te sia Jew te bangin a nuntak natu in bangbangin zawthawk thu taw na sawl zo tu ziam,” ka ci hi.
Jew te le Gentile te in Upna taw Ngupna nga
15A tatakin eite sia ih pian panin Jew te ih hi hi, “Gentile mawneite” a kici te ih hi bua hi. 16Ahizong mihing khat sia Jesus Christ ih upna tung bek tawnin, Pathian mai ah thutang kisuaksak hi ci in ih he a, Thukham ii deina bang sepna taw hi ngeingawl hi. Eite zongh in Thukham ii deina bang ih sepna taw hi ngawlin, Christ ih upna tungtawnin Pathian mai ah thutang ih sua natu in, Christ Jesus ih um zo hi. Banghang ziam cile Thukham ii deina zuina taw Pathian mai ah kuama thutang kisuaksak ngawl hi.#Ps 143:2; Rom 3:20-22 17Tua ahile Christ taw ih kipumkhatna pan thutang suak tu in, ih hanciam tak ciang, Gentile te za ma in mimawte in hong kimu ahile Christ sia mawna a piangsak tu in a seam ahi tu ziam? Hi ngawl het hi! 18Thukham ka phiat sate puuapha kik tu in, ka kipan le — Thukham a paltan khat ka hi hunlam keima le keima a kipualaak ka hi hi. 19Ahihang Thukham taw kisai in kei ka thi zo hi — Thukham mama in hong thatlum zo hi — Pathian atu ka nuntak thei natu ahi hi. Christ taw ama ii thinglamtee tungah ka thi khawm zo hi, 20tua ahikom, a nungta sia kei ka hi nawn bua a, ahihang kei sungah a nungta sia Christ ahi hi. Tu a ka nuntakna sia ahile kei hong it a, a nuntakna kei atu hong pia Pathian Tapa ka upna taw a nungta ka hi hi. 21Pathian ii thuthiamna nial tu ka uuk bua hi. Ahihang mihing khat in Thukham tungtawnin Pathian mai ah thutang kisuaksak ahile Christ ii thina in khiakna nei ngawl a suak hi!
Currently Selected:
Galatia te 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016