2 Samuel 2
2
David Judah Kumpipa in Kikoi
1Hisia zawkciang David in Topa dongh a, “Keima pai in Judah khuate khat ka uk tu ziam?” ci hi.
“Uk in,” ci in Topa in zo hi.
David in “Koisia ziam?” ci in, dongh hi.
Topa in, “Hebron” ci hi. 2Tua ahikom David in Hebron ah a zite nii ahi Jezreel pan Ahinoam le Carmel pan Nabal ii zi meingongnu Abigail te kengin pai hi. #1 Sa 25:42-43 3Ama in a mite le tuate ii innkuanpuite zongh paipui a, Hebron kiim a khuate ah teang uh hi. 4Tua zawkciang Judah pan a mite Hebron ah hong pai in David sia Judah kumpipa tu in sathau noai uh hi. #1 Sa 31:11-13
Gilead ngamsung Jabesh mite in Saul luang a phum sia David in a zaak ciangin, 5tualai ah mihing pawlkhat paisak a, kam vaitha hi: “Na kumpipa tungah a luang na vuina taw thumaanna na lak uh a, na lak uh hu in Topa in thupha hong pia tahen. 6Tu in Topa dikna, a thumaanna no tungah hong tung tahen. Noma nasepna sa te hangin kei zongh no hong phatvawt tu khi hi. 7Hat vun a, hang vun! Noma kumpipa Saul thi zo a, Judah mite in kei sia a kumpipa ci in sathau hong noai zo hi.”
Ishbosheth sia Israel Kumpipa in Kikoi
8Saul ii ngalkaphonpi ukpa Ner ii tapa Abner sia Saul ii tapa Ishbosheth taw Jordan ngun kaantan in Mahanaim ah tai khawm hi. 9Tua sungah Abner in Ishbosheth sia Gilead, Asher, Jezreel, Ephraim le Benjamin ngam teng ii kumpipa in koi a, a tatakin Israel ngam buppi uk hi. 10Israel kumpipa in a kikoi hun in, ama sia kum 40 pha a, kum nii sung uk hi.
Ahihang Judah nam in David tungah thumaan ahiciang, 11ama in Hebron panin Judah te kum sali le kum lang sung uk hi.
Israel te le Judah te Ngal Kidona
12Abner le Ishbosheth ii uliante Mahanaim pan Gibeon khuapi ah pai uh hi. 13Zeruiah ii tapa Joab le David ii ulian dangte sia amate taw tuicing khat hui ah kisii uh hi, tua munah amate teng, pawlkhat sia tuicing ii langkhat ah, pawldang khat sia tuicing ii a langkhat ah to hi. 14Abner in Joab munah, “Eima sang tek panin khangnote pawlkhat veve sawlin kido kidemsak tawng,” ci hi.
Joab in, “Hi hen,” ci hi.
15Tua ahikom Ishbosheth le Benjamin namte taangin mihing sawm le nii, le David mihing sawm le nii te kidosak hi. 16Misim in a kido pui tek sia a lu pan kizamh in, namsau taw a pangh tek kihol uh ahiciang mihing 24 sia pukin thi siat uh hi. Tua ahikom Gibeon ah tua mun sia, “Namsaute Lo” kici hi.
17Tua zawkciang kidona nasia mama khat hong nei in, David mite in Abner le Israel te zo uh hi. 18Zeruiah ii tapate thum tua sungah kihel hi: Joab, Abishai, le Asahel ahi uh hi. Asahel sia ngamsa, sangai bangin a tai ngang a, 19Abner del tan pai hi. 20Abner in nung lee et kik a, “Nangma Asahel ni ziam?” ci hi.
Ama in, “Hi khi hi,” ci in zo hi.
21Abner in, “Kei hong del heak in! Ngalkapte khat del in a, a nei po laaksak in,” ci hi. Ahihang Asahel in ama del tan lai hi. 22Khatvei ma Abner in, “Hong del heak in! Banghang nang hong thatlumsak hamtang tu ni ziam? Tuabang hi leng bangbangin na suapui pa Joab mai mu ngam tu khi ziam?” ci hi. 23Ahihang Asahel a tawlnga nuam bua hi; tua ahikom Abner in a tei taw a nungsang a khaw le Asahel ngil kha in a nungah pailet hi. Asahel lei ah topsuk in thi hi, tuaciang tuak a luang sialna munah hong pai peuma in tawlnga in en uh hi.
24Ahihang Joab le Abishai in Abner ii nung zuizenin, nitum ciangin Giah ngam nisuana sang, Gibeon duisung paina lampi tung, Ammah mual theng hi. 25Benjamin nam pan pasalte Abner ii kiim ah kikhawmtua kikin mualdawn khat tungah ngalnanna mun la uh hi. 26Abner in Joab oksan a, “Tawp hun nei ngawlin kido tan tu hi ziam? A khakbel ciang thin lalna simngawl bangma dang taang nawn ngawl tu ci in mu thei ngawl nu ziam? Ko sia na ngammipuite khu hi. Na mite munah ko hong del a tawp natu thu na piak tu, bang tanvei hai tu ziam?” ci hi.
27Joab in, “Pau ngawl hi thong lete ka mite in zingsang khuavak dong hong del tu hi, ci in a nungta Pathian taw kiciam ngam khi hi,” ci in zo hi. 28Tua zawkciang Joab in Israel te a del a mi teng a tawlngak natu in lemle tum hi; tuabangin kidona tawp uh hi.
29Abner le a mite sia Jordan Kuam dungah zankhua in pai uh hi; amate Jordan ngun kaantan in, a zingsang kik hunsung bup a pai suak zawkciang, Mahanaim theng kik uh hi.
30Joab in ngal del a tawp zawkciang a mi teng a khoptua le, Asahel kihel in a kingawm mihing sawm le kua kisamh hi. 31David ii mite in Benjamin nam Abner ii mite 360 that uh hi. 32Joab le a mite in Asahel luang phaam in, Bethlehem khua a innkuan ii thaan ah phum uh hi. Tua zawkciang zankhua in pai a, zingsang khuavak bek in Hebron theng kik uh hi.
Currently Selected:
2 Samuel 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016