1 Kumpite 2
2
David ii Solomon tungah A khakbel A hilna
1David in a thi tu nai ciang a tapa Solomon sam a, a khakbel hilna teng son hi: 2“Ka thi tu hun hong theng zo hi. Kimuang in a, takkha in; 3tuaciang Topa na Pathian ii vawt a hong sawl teng vawt in. A thukhamte le a thupiakna te a vekpi in Moses ii thukham sungah a ki at babang zui in, tua hile na paina po, na sepna pawpo ah na nuamsa thei tu hi. 4Ama thu na ni le, Topa ii kei tungah hong piak ka suan ka paalte in thumaan tak le thintak lungtak taw ama ii thupiakte a nit tu a kidop uh laiteng in, Israel ngam uk tu hi ci in kamciam sia ama in kholet tu hi.
5“Thudang khat om lai hi. Joab in kei tungah hong ngamtatna ciamtee tu ni hi, ama in Israel te ngalkaphonpite a uk, Ner ii tapa Abner le Jether ii tapa Amasa te nii hong thalupsak hi. Ngal sungah thina hangin ngal kilem hun sungah phulam in tualthat ahi sia na phawk tu hi. Ama in mihing mawnei ngawlte that ahikom tu in ama ngamtatna teng keima pu khi hi, tuasia taw kizui in a piang babang thuak khi hi. #2 Sa 3:27; 2 Sa 20:10 6Na vawt tu bangziam ci in he ni hi; ama sia thi ngei bang thawthongin thisak ngawl tu ni hi.
7“Ahihang Gilead pan Barzillai tapate tungah hesuakna lak ta'n a, a pha takin ou ta'n, banghang ziam cile na suapuipa Absalom kung pan ka tai lai in amate in kei hong hesuak hi. #2 Sa 17:27-29
8“Benjamin ngam Bahurim khua panin Gera ii tapa Shimei a ci khat zongh om hi. Mahanaim ka zot lai in nasia takin hong haamsiat hi, ahihang Jordan ngun ah ka kisik ciangin ama a kithalup ngawl natu in Topa min taw a ciliap huai kamciam ka pia hi. #2 Sa 16:5-13; 19:16-23 9Ahihang ama daan piak ngawlin thaa thong ngawl het tu ni hi. Bang vawt tu ci in nangma he ni hi, ama a kithisak natu na vaihawm kul tu hi,” ci hi.
David ii Thina
10David thi a David khuapi ah kiphum hi. 11Ama in kum 40 sung Israel kumpi seam a, Hebron ah kum sali, Jerusalem ah kum 33 sung maang hi. #2 Sa 5:4-5; 1 Khang 3:4 12Solomon in a pa David ii kumpi za lua a, ama ii kumpi vaangletna kip hi. #1 Khang 29:23
Adonijah ii Thina
13Tua zawkciang Haggith ii tapa, Adonijah sia Solomon ii nu Bathsheba kungah haw hi. “Kilem vai in hong vak na hi ziam?” ci in Bathsheba in dongh hi.
Adonijah in, “Hi hi,” ci in zo hi, 14tuaciang, “Kong nget nop khat om hi,” ci lai hi.
Ama in, “Tua sia bang ziam?” ci in dongh hi.
15Ama in, “Na heaksa bangin kei sia kumpi ka sua natu hi, Israel ngam ah mi theampo in tuabangin muangmaw hi. Ahihang a tuam dang khat in hong piang a, ka suapuipa sia kumpipa suak hi, banghang ziam cile tuasia Topa deina hi. 16Tu in nget nop khat hong nei khi hi; nong hesuakna in hong nial heak in,” ci in zo hi.
Bathsheba in, “A bang ziam?” ci in dongh hi.
17Ama in, “Nong hesuakna in Kumpipa Solomon tungah Shunem panin numei Abishag sia ka zi tu in hong ngetsak ta'n — nang sia ama in hong nial ngawl tu ci in he khi hi,” ci in zo hi. #1 Kum 1:3-4
18Tua nu in, “Pha mama hi nang atu Kumpipa tungah kong sonsak tu hi,” ci in zo hi.
19Tua ahikom Bathsheba sia kumpipa kungah Adonijah taangin a paupui tu in pai hi. Kumpipa sia a nu muak tu in dingto a, a nu kun hi. Tuasia zawkciang ama kumpi tokhum tungah to a, a nu atu tokhum dang khat lasak in a ziatsang ah tosak hi. 20Ama in, “Hamphatna no khat hong ngen nuam khi hi; nong hesuakna in hong nial heak in,” ci hi;
Ama in, “Bang ziam nu awng?Hong nial bong,” ci hi.
21A nu in, “Na suapuipa Adonijah ii zi tu in Abishag pia in,” ci hi.
22Kumpipa in, “Banghangin ama piak tu in Abishag hong ngen ni ziam?” ci in dongh hi. “Kumpi tokhum zongh ngetsak vet in. Adonijah sia ka u ahikom, thiampi Abiathar le Joab zongh ama ii sangah pang hi!” ci hi. 23Tua zawkciang Solomon in Topa min taw kiciam a, “Adonijah in hi bang hong nget hu in ama nuntakna taw ka lulsak bua ngawngaw le Pathian in kei hong vualum tahen! 24Topa in ka pa David ii kumpi tokhum tungah kip takin kei hong koi zo hi; ama in a kamciam kholet in kumpi ngam sia ka suan ka paalte dongin hong pia zo hi. Adonijah sia tu ni mama in thi tu hi ci in a nungta Topa taw kiciam khi hi!” ci hi.
25Tua ahikom Solomon kumpipa in Benaiah thupia a, tua pa va pai in Adonijah that hi.
Abiathar Kihawlkhiakna le Joab ii Thina
26Tua zawkciang Kumpipa Solomon in Abiathar thiampipa tungah, “Na teenna ngam Anathoth ah cia ta'n. A thi tu kilawm ni hi, ahizong ka pa David taw na om lai in Topa Thuciamna Thingkuang a keam pa na hi hu le ama ii ngim ngana theampo a thuakpui pa zongh na hi hu in, tu in hong thisak ngawl tu khi hi,” ci hi. #1 Sa 22:20-23; 2 Sa 15:24b 27Tua zawkciang Solomon in thiampi Abiathar sia Topa ii thiampi a sepna pan tawpsak hi, tuabangin Topa ii Shiloh ah thiampi Eli le a suan a paalte huvau a pauna taangtungsak hi. #1 Sa 2:27-36
28Joab in thupiang teng za hi. (Ama in Absalom panpui ngawl ahihang Adonijah panpui hi.) Tua ahikom ama tai in Topa ii ompuina puanbuk sungah biaknatau ii kingte lenin om hi. 29Kumpipa Solomon in Joab sia puanbuk bealh tu in tai a, biaknatau hui ah a om hunlam a zaak ciang, Kumpipa Solomon in kamtai khat sawlin Joab munah banghangin biaknatau a bealh tu in tai ni ziam ci in donghsak hi. Joab in Topa kungah ka tai sia Solomon ka kiitak hang hi ci in zo hi. Tua ahikom Kumpipa Solomon in Joab a that tu in Benaiah paisak hi. 30Ama Topa ii ompuina Puanbuk ah pai in Joab munah, “Kumpipa in pusuak a hong sawl hi,” ci hi.
Joab in, “Hong pusuak ngawl tu khi hi. Hi sungah thi zaw tu khi hi,” ci in zo hi.
Benaiah heak kikin kumpipa munah Joab pauna teng son hi.
31“Joab ii ci bangin vawt in. Ama that in a, phum in. Tuasia ciangin kei ka hi zong, David ii suan le paal dangte ahizong Joab ii mawnei ngawl a thalupte huvau ah vaipuak ka nei nawn buatu hi. 32Ka pa David ii heak ngawl laanin, mihing a thana hu in Topa in Joab daan pia tu hi. Joab in ama sangin mi pha ahizaw, a maw ngawl mihing nii thatlum a: Israel te ngalkaphonpi ukpa Abner le Judah te ngalkaphonpi ukpa Amasa te ahi hi. 33Amate ii mihing thanate hu in daan piakna sia Joab le a suan a paalte tungah a tawntungin tung tu hi. Ahihang Topa in David suan le paal te ama ii kumpi tokhum tungah a to peuma zawna pia tawntung tu hi,” Solomon in ci in zo hi.
34Tua ahikom Benaiah in Topa ompuina Puanbuk ah pai in Joab that hi, tuaciang ama sia ama ii inn, ngam taanzauna ah kiphum hi. 35Kumpipa in Benaiah sia Joab taangin ngalkaphonpi ukpa suaksak a, thiampipa Zadok in Abiathar za laihsak hi.
Shimei ii Thina
36Tua zawkciang kumpipa in Shimei samsak a, “Hi sung Jerusalem ah nangma atu in inn khat sa in. A sungah teang in a, khuapi nusia heak in. 37Inn nusia in Kidron lui na kaantan le thi tatak tu ni hi — tuaciang nangma mawna hi tu hi,” ci hi.
38Shimei in, “Pha mama hi, Kumpipa awng, na ci babangin ngamta tu khi hi,” ci in zo kik hi. Tuabangin ama Jerusalem ah ngei ma teang hi.
39Ahizong kum thum zawkciang, Shimei ii silate nii sia, Maacah ii tapa Achish, Gath kumpipa tuu in tai uh hi. Shimei in amate sia Gath ah om hi ci in a zaak ciangin, 40a laa tung to in Gath khua Achish kumpipa kungah pai a tua silate zong hi. Amate mu in inn ah hong cia pui kik hi. 41Solomon in Shimei ngamtatna teng a zaak ciangin, 42ama samsak a, “Jerusalem na nusiat ngawl natu in Topa min taw kamciam kong piasak hi. Tuaciang na nusia napo le thi tatak tu ni hi ci in na kidop natu thu kong piaksa hi. Tuabang thukim in na thu kong ni tu hi nong cisa hi ngawl ziam? 43Tua ahile banghangin ciampeal in kong thupiakna hong mang ngawl ni ziam? 44Ka pa David tungah na tatkhialnate theampo he nginge ni hi. Topa in nang tua hu in daan hong pia tu hi. 45Ahihang ama in kei thupha hong pia tu a, David ii kumpi ngam sia ngammuangsak tawntung tu hi,” ci hi.
46Tua zawkciang kumpipa thupiak bangin Benaiah pusuak a, Shimei that hi. Tu in Solomon in uk siat hi.
Currently Selected:
1 Kumpite 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016