1 John 2
2
Ei Hong Hupa Christ
1Ka tate awng, mawna khialna na vawt ngawl natu in hi lai kong at hi; ahihang khat po in mawna a vawt le Pa mai ah ei taangin hong ngetsak tu khat — thutangpa Jesus Christ ih nei hi. 2Tuaciang Christ mama in eite ii mawna bek hi ngawlin a kuama po ii mawna zongh maisakna a pianna pa ahi hi.
3Pathian thupiakte ih zui le tuasia ciangin ama a he ih hi hunlam ih tel hi. 4Khat po in ama ka he hi ci napi, a thupiakte a zui buale mihing leilot hi a, ama sungah thumaan thutak a om bua hi. 5Ahihang a kuama po a kammal a zui sia in Pathian a itna kicingtaaksak takpi zo hi. Pathian taw pumkhat ih hina hi thu in hong telsak thei hi: 6Pathian taw pumkhatin nungta ing a cite in Jesus Christ ii nuntak bangin a nuntak kul hi.
Thupiak Thak
7Ka it lawmte awng, tu a kong at hi thupiakna sia thuthak hi ngawl hi; tuasia in thupiak lui hi a, a kipatciil pan ma na neisa uh ahi hi. Thupiak lui sia noma ii zaaksa thu ahi hi.#Jn 13:34 8Ahihang tu a kong at thupiakna sia a thak hi, banghang ziam cile tua ii a maanna sia Christ sungah kimu a, no sung zongh ah kimu hi. Banghang ziam cile khuazing om nawn ngawl a, khuavak tatak sia taang zo hi.
9A kuama po khuavak sungah ka om ci napi a, a suapuite a ensan le ama in tu dong ma in khuazing sungah om hi. 10A suapuite a it te sia khuavak sungah teang ahikom ama sungah ngualdang khat khialsak thei natu bangma a om bua hi. 11Ahihang a suapuipa a ensan khat pawpo sia khuazing sungah om ahi hi; ama khuazing sungah lampai a, khuazing in a mit tawsak ahikom, a zot natu he ngawl hi.
12Ka tate awng, na mawnate uh Christ hangin hong kimaisak zo ahikom lai hong thaak ka hi hi. 13Pate awng, a kipatciil pan a om pa na heak uh manin lai kong thaak hi. Tangvalte awng, Ngilo Pa zo zo na hi uh manin lai kong thaak hi.
14Ka tate awng, Pa na heak uh manin, lai kong thaak hi. Pate awng, a kipatciil pan a om pa sia na heak uh manin lai kong thaak hi. Tangvalte awng, note na tha uh hat ahikom lai kong thaak hi; Pathian kammal no sungah nungta hi, Ngilo Pa na zo zo uh hi.
15Leitung ahizong leitung na khat pawpo ahizong na it heak vun. Leitung na it uh le Pa it ngawl na hi uh hi. 16Leitung neisa ahi — hong mawsak thei eima atu lungngulnate, mite ii mit taw mu in a dei sia le mihingte kiphatsakpui leitung na theampo — hite sia khat beak zongh Pa kung pan hong pai ahi bua hi; a vekpi in leitung pan hong pai ahi hi. 17Leitung le a sungah a om, mihingte lungngul thei na theampo hong bo tu hi; ahihang Pathian ii deina bangin a seamte in a tawntungin nungta hi.
Christ ii Ngalpa
18Ka tate awng, hun bo tu hong nai zo hi! Christ ii Ngalpa hong pai tu hi ci in no tungah hong kison zo hi; tu in Christ ii ngalte tam mama hong kilangh zo a, tua ahikom hun bo tu sia nai zo hi ci in ih he hi. 19Hi mite in ei kipawlna sungah hong om tatak ngawl ahi hu in ei hong nusia hi; ei pawl sungah hong om hile ei taw hong omkhawm top tu hi. Ahihang eite taw hong kipawlkhawm tatak ngawl ahi hunlam a kithiangtel thei natu in amate in hong nusia hi.
20Ahihang Christ ii no tungah Thaa Thiangtho hong buak sia na saang zo uh hi, tua ahikom na vekpi in thumaan thutak na tel uh hi. 21Tua ahikom lai kong thaakna in thumaan thutak na tel ngawl uh hang hi ngawl hi; thumaan thutak na heak uh hang hi zaw a, tuaciangin thumaan thutak sung pan leilot thu hong piang ngeingawl ci zongh na heak uh ahi hi.
22Tua ahile a leilot pa sia akua ziam? Jesus sia Messiah hi ngawl hi a ci pawpo in leilot pa ahi hi. Tuabang mihingte sia Christ ii Ngalte ahi uh hi — amate in Pa le Tapa nial khawm hi. 23Banghang ziam cile Tapa a nial pawpo in Pa zongh nial hi. Tapa a saang pawpo in Pa zongh nei hi.
24Tua ahiciang a kipat pan na zaak uh ngupna thu sia noma thinsung uh ah na keamcing hamtang tavun. Tua thu na keamcing uh le Pa le Tapa taw pumkhatin na nungta tawntung tu uh hi. 25Tuaciangin Christ ama mama ii eite hong piak tu hong kamciam sia — tawntung nuntakna ahi hi.
26Note hong theam tu a hong kipante ii thu hong at khi hi. 27Ahihang note na hi uh le, Christ in a Thaa no tungah hong buak zo hi. Note sungah ama Thaa a om laitengin hong hil tu kuama dang na kitaangsamh bua uh hi. Banghang ziam cile ama Thaa in na theampo huvau hong hil a, hong hil teng sia thumaan hi a, khial ngawl hi. Tua Thaa ii hilna na ni vun a, Christ taw pumkhat in na om vun.
28Hi hi, ka tate awng, ama taw pumkhat in na om vun, tua hile ama hong kilangh ciangin eite sia thinletna taw ih kidim tu a, ama ii hong pai Ni ciangin maizum in ih buk a kul buatu hi. 29Christ sia thumaan thutang hi ci in na he uh hi; tua ahikom na heak tu uh thu sia a maanin a seam peuma Pathian ta hi ci thu ahi hi.
Currently Selected:
1 John 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016