KALATIX 1
1
Lox Nawb Bwan
1Pawlux pa mawh kawncau pa ting, ang mawh khaing pui, viang, kheu pui kawx ang mawh, mawh kheu Yesux Khrit mai Siyiex Keeing Cao, pa hoik kieh Nawh deeh kaoh im khaing krax yum, 2puxaik can pa ot tau mai aux, tawx ka ceu cao pa ot ka daux meung Kalatix khankix heue. 3Kieh bwanson mai pa nhim Keeing ex Siyiex mai Yesux Khrit koe mai pex, 4Kaw pa hoik tawx tokaux tix son phimap ex, sonsang taoh Nawh ex khaing ju pa caox in, awm pa khaw mai alo Keeing ex Siyiex, 5Kieh Nawh Cao koe min pakngai leeing ju liak. Amen.
Lox Bwan Gaux Rhawm tix Ceu Khaing
6Aux daox deng ka grawng pex, phex khran gwieh hu khaing kaw pa hoik kok ka pex ka daux bwanson Cao Khrit, son lox bwan gaux rhawm pa tang siyox, 7pa ang mawh lox bwan gaux rhawm tang ceu, viang mawh nan koe pui tix blah pa lak lheut ka pex mai simie ti loh, lox bwan gaux rhawm Cao Khrit kieh tang heue. 8Ex ang ah, kawncau Siyiex pa kaoh khaing raoma ang ah, phan sidiex ka pex lox bwan gaux rhawm pa lheu pa tang khaing lox bwan gaux rhawm pa hoik sidiex ex ka pex, kieh nawh mawh pa pon pa jhax lawg heue. 9Awm hoik ah ex glang ka, aux baox deeh ah nan yam in tix bawg, phan pui tix kaux kaux sidiex lox bwan gaux rhawm ka pex pa lheu pa tang khaing pa hoik rieb pex ti teei, kieh nawh mawh pa pon pa jhax lawg heue. 10Yam in aux sawg ti pon pa khaw khaing pui lie? Phan ang mawh nan khaing Siyiex lie? Phan ang mawh nan aux nied ti yuh son sang caw ka rhawm pui lie? Phan aux kawn yuh pa caw ka rhawm pui, aux tak ang lai mawh siliex Cao Khrit heue.
Pawlux Lih Ti Mawh Kawncau
11Puxaik khankix eue, aux kieh pex tawng grawng lox bwan gaux rhawm pa hoik sidiex aux ang mawh pa khaw pa dex mai pui heue. 12Aux ang pon lox bwan an khaing pui mai ang mawh pa gau ka aux, pon kheu Yesux Khrit pa plak jhi aux yaox heue. 13Pex hoik mhong grawng pa yuh aux ka mawx, yam ot aux daux been Yudax, daux bawg yam pa hoik luan, grawng pa tuktiak aux ka ceu cao Siyiex nie lheu khaing pa chix pon ti tiag mai pa yieh yuh laux leeing heue.#Cau 8:3, 22:4-5, 26:9-11 14Aux nie ting tawng ka daux been Yudax, khaing ceu pui aux, pa sidu ju mai nie lheu nied ti yuh son been tax keeing aux khankix heue.#Cau 22:3 15Yam caw rhawm Siyiex, Kaw pa hoik tiah ti deuh aux, khaing daux vaig miex tix mai kok aux kheu bwanson Nawh, 16son sang plak jhi Kawn Nawh ka daux aux, #Cau 9:3-6, 22:6-10, 26:13-18son sang sidiex aux grawng Nawh ka sinax pui tang ceu khankix mai dom mawx dom an aux ang kum kawng tau mai nex nham, 17viang, ka veng Yerusaliem kawx aux ang haok hu ka kix pa hoik mawh kawncau pa ting ka sivoe aux, aux hu ka daux meung Arebia mai aux deeh hu ka veng Damase tix bawg heue. 18Khaix an loe num aux haok hu ka veng Yerusaliem,#Cau 9:26-30son sang pon ti meed, tawng ka Kephax mai aux ot tau mai nawh kao phwan ngaix heue. 19Lheu khaing Yakop pux Simiang ang aux yaox kawncau pa ting tang kaux tix kaux kawx heue. 20Grawng ceu pa tiiem aux ceu in ka pex, ka plak sivoe Siyiex aux ang pie lhen. 21Khaix an aux hu ka meung Surix mai meung Kilikix heue. 22Yam an ceu cao Cao Khrit pa koe ka daux meung Yudax khankix ang nyang bax tawng pakngai aux. 23Kix hoik mhong ngie lox pa yuh nin, “Kaw pa hoik sax tuktiak ex, yam in sidiex gau grawng krax yum rhawm, pa hoik sax yieh nawh ti yuh laux leeing tix bawg.” 24Kix yaog yaw ka Siyiex kheu grawng aux heue.
Currently Selected:
KALATIX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012