KALATIX 2
2
Pawlux Mai Kawncau Tang Kaux
1Khaix an yam hoik luan kao pon num aux deeh haok ka veng Yerusaliem#Cau 11:30, 15:2 tau mai Banabax mai khawm Titux kawx, aux viex hu mai tix heue. 2Aux haok hu kheu plak jhi ti kieh aux yaox mai aux krai lox bwan gaux rhawm ceu pa sidiex aux ka sinax pui tang ceu khankix ka sivoe kix, aux krai ngie ka kix pa koe min plakngai, ka dee ang pui ot, phan ang mawh nan ha pa to aux yam in, phan ang mawh nan pa hoik to aux kox mawh pa giex going heue. 3Pie Titux pa ot tau mai aux, pa mawh pui Helasax kawx ang khin ti kieh pat hak. 4Kheu koe pa yuh grang awm puxaik tix blah pa briex ti laig son sang jiang ka ceu pa ploi ex, pa koe ex daux Yesux Khrit, yuh ka mawx sonsang deeh kieh ex mawh siliex heue. 5Ex ang doh cu ka kix, pie tix nari kawx, ceu pa mawh meh, pa dex mai lox bwan gaux rhawm, tak sang kaux cong ka sinax pex heue. 6Kix pa mawh pa koe min pakngai khankix, kix hoik sax mawh pa yuh ka mawx ang ah, ang mawh tidtix ka aux. Siyiex kienie, ang mawh pa jhak ka pakngai pui#Pi 10:17), pa ah aux kix pa koe min pakngai khankix ang tie lai tawx tidtix ka aux, 7jalao sang mawh nan, yam yaox kix grawng hoik tawx pong lox bwan gaux rhawm pa ang pat hak ka aux, awm hoik tawx lox bwan gaux rhawm pa pat hak ka Petrux, 8Grawh grawng nawh Kaw pa yuh ka daux Petrux sonsang kieh nawh mawh kawncau pa ting ka son pui pa pat hak khankix, viang ka daux aux kawx, hoik yuh ti kieh mawh kawncau pa ting ka son pui tang ceu khankix, 9Yam tawng kix grawng pa hoik tawx bwanson ka aux, Yakop, Kephax mai Yohan, pui ah mawh kix rong, tawx pa singeuh taix khawn dawm ceu pa yuh paox pie ka aux mai Banabax, sonsang hu yiex ka pui tang ceu mai sonsang hu kix ka pui pa pat hak khankix heue. 10Kix koe ngie rhawm ti sang kieh yiex doh keud ka pui hot sia khankix, ceu an mawh pa koe rhawm aux ti sang nied ti coca yuh heue.
Pawlux Neraw Ka Petrux
11Yam hoek Petrux ka veng Antiuk, aux ne raw nawh sidu pakngai nawh, mawh kheu koe grawng dee deuh phimap ka nawh. 12Ka sivoe sang hoek pui tix blah khaing Yakop, nawh sawm tau mai pui tang ceu khankix, yam hoek kix, nawh deeh toek tokaux tix, tiah khaing kix, kheu ring ka kix pa mawh cub pa pat hak heue. 13Pui Yudax pa deuk khankix yuh ti pie awm paox tix tau mai nawh, tom pie Banabax kawx hu plak kix kheu pa pie kix heue. 14Yam yaox aux grawng ang kix hu rahsee, awm pa khaw mai pa mawh meh lox bwan gaux rhawm, aux ah nin ka Kephax sivoe kix khawmuik, “Phan maix pa mawh pui Yudax, yuh ti ot yaung pui tang ceu khankix mai ang yuh ti ot awm pui Yudax mai khex sang khin ti kieh pui tang ceu khankix yuh ti ot awm pui Yudax yuh ka mawx?
Pon Krax Taoh Kheu Krax Yum Rhawm
15Ex raux mawh nex nham pui Yudax mai ang mawh pui phimap tang ceu, 16Ex tawng grawng pui ang hoek krax rahsee, kheu pa twah klaung ka lox lai beenli,#Yaog 143:2; Ro 3:20viang mawh nan hoek kheu krax yum rhawm ka Yesux Khrit,#Ro 3:22 awm hoik yum rhawm ex ka Yesux Khrit, son sang pon ex ti hoek krax rahsee kheu pa yum rhawm ka Cao Khrit mai ang mawh kheu krax twah klaung ka lox lai beenli, mawh kheu pui tix kaux kawx ang hoek krax rahsee, kheu pa twah klaung ka lox lai beenli heue. 17Yam sawg ex ti hoek krax rahsee ka daux Cao Khrit, phan yaox tokaux ex mawh pui pa yuh phimap, khex mawh Cao Khrit cao pa yuh son phimap lie? Ang doh mawh nan. 18Phan aux deeh cox sum ceu pa hoik yieh aux laux, aux plak jhi grawng tokaux aux mawh pui lud tiru heue. 19Lheu khaing an kheu lox lai beenli aux hoik yum ka pa dex mai lox lai beenli, son sang im aux ka pa dex dawd mai Siyiex heue. 20Aux hoik yum tau mai Cao Khrit ka khaox lhak mai yam in aux kawn ang baox mawh pa im, Cao Khrit im ka daux aux heue. Ceu pa im aux ka daux nex nham yam in, aux im ka daux krax yum rhawm, pa mawh pa yum rhawm ka Kawn Siyiex, pa hoik moh ka aux mai hoik tawx tokaux tix son aux heue. 21Aux ang yuh ti kieh bwanson Siyiex mawh pa giex going, phan pon krax rahsee kheu lox lai beenli, pa yum Cao Khrit mawh pa giex going heue.
Currently Selected:
KALATIX 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012