DANYELAX 1
1
Paox Grawm Danyelax
1Daux num kwang Yawyakim simiang meung Yudax loe num tix num, Nebukhaneza simiang haktiex Babulon hoik hoek ka veng Yerusaliem mai lai lawm ka veng heue.#2Sim 24:1; 2Been 36:5-7 2Siyiex hoik ap ti tawx Yawyakim simiang meung Yudax ka daux tawm taix nawh mai khawm kraung khrai pa shiao daux nyiex bwan Siyiex khankix tiblah mai nawh hoik teei ti viex ankix ing ka daux haktiex Shina ka dee koe nyiex siyiex nawh mai nawh hoik sau kraung khrai ankix laig ka daux nyiex krao sinngao siyiex nawh heue.#2Sim 20:17-18, 24:10-16; 2Been 36:10; Isa 39:7-8 3Khaix an simiang tawx lox ka Ashapenat pa mawh cao kaing ting pui sieh pa kwang cub laux simiang khankix, sonsang teei nawh tix viex kawn praix ceu pui Isarelax khankix tiblah mai khawm doeh ru simiang tiblah mai khawm can pui ting lhaong khankix tiblah. 4Pui awn ju pa ang koe dee ne raw mai pa mhawm grang khankix, pa hoik grum naog ka pingnya cuyi mai pa koe krax tawng yung mai pa lhak lhiem tiem phai sonsang pon yuh kaing jhaw ka daux nyiex haw mai pa mawh pui pa tak sang pon gau tix chix lox mai lai ceu pui Khaladie khankix heue. 5Simiang hoik deuh priex pa ih pa nyawm pa tie cie tix ka son kix ku singaix mai khawm rawm plix siiet pa nyaux nawh mai tawx krax gau ka kix loe num mai yam hoik sidah ka daux bawg yam an, kix tak pon yaox ti yuh kaing jhaw ka plak sivoe simiang heue. 6Khaing daux sinax kix koe ceu pui Yudax pa mawh Danyelax, Hananix, Mishelax mai Azariyax khankix heue. 7Cao kaing ting pui sieh pa kwang cub laux simiang khankix hoik sum ceu kaux pa khraox ka kix, Danyelax kok mawh Belatashaza, Hananix kok mawh Shadariet, Mishelax kok mawh Meshak mai Azariyax kok mawh Abedanego heue. 8Viang mawh nan, Dayelax hoik but rhawm tix, son ang nawh yuh tokaux tix seeing ka priex pa ih pa nyawm pa tie cie simiang mai ka rawm plix siiet pa nyaux nawh khankix heue. Mawh kheu nan, nawh hoik rawg akhwang ka cao kaing ting pui sieh pa kwang ka cub laux simiang khankix son ang nawh sang yuh tokaux tix seeing heue. 9Siyiex hoik kieh Dayelax pon bwanson krax caux rhawm ka plak sivoe ngai cao kaing ting pui sieh pa kwang ka cub laux simiang khankix heue. 10Cao kaing ting pa kwang cub laux simiang khankix ah nin ka Danyelax, “Aux lhat graung ka cao aux pa mawh simiang mai pa hoik tat ti deuh ceu pa ih mai pa nyaux pex heue. Grawh grawng nawh, phan nawh yaox ka pakngai baox pex koe krax mhawm grang awm pui awn ju paox graoh paox gru pex sang yuh ka mawh lie? Khaix an pex tak kieh aux se kaing tix ka plak sivoe simiang heue. 11Danyelax deeh ah nin ka cao khan kheu priex piang Danyelax, Hananix, Mishelax, Azariyax khankix, pa hoik deuh cao kaing ting pui sieh pa kwang ka laux simiang khankix heue. 12Yuh bwanson, cheu ti yaox siliex maix khankix son kao singaix mai tawx ih taux lhax mai rawm nyaux ngie, 13Khaix an kieh maix jhak ti yaox pakngai yix mai khawm pakngai pui awn ju khankix, pa yaox ti ih priex nyawm priex tie cie simiang mai yuh awm pa yaox ka mawh pa khaw caw ka siliex maix khankix liak.” 14Nawh hoik koe krax khaw rhawm ka kix ka grawng in mai hoik cheu ti yaox kix kao singaix heue. 15Yam hoik sidah kao singaix, pakngai kix hoik nie lheu mhawm mai nie lheu kluing khaing pui awn ju an khankix, pa hoik ih priex pa nyawm pa tie cie simiang heue. 16Mawh kheu nan, cao khan kheu priex hoik teei priex pa nyawm pa tie cie kix mai rawm plix siiet pa caw kix tix sang nyaux khankix hu mai tawx kix ih taux lhax heue. 17Ka pui awn ju inkix pon kaux, Siyiex hoik tawx kix koe krax tawng kra yung mai krax lhak lhiem ka ngai lai mai pingnya cuyi khawmuik mai Danyelax hoik koe krax chix tawng pa plak jhi mai grawng dee bleeh camaox khankix khawmuik heue. 18Yam hoik naog singaix pa ah simiang ti kieh kix mawh pa viex ti hoek ka daux nyiex haw, cao kaing ting pui sieh pa kwang cub laux simiang khankix hoik viex kix hoek ka plak sivoe Nebukhaneza heue. 19Simiang chawk ti yaox kix, ka daux sinax kix ang lai yaox pa sidu awm Danyelax Hananix Mishielax mai Azariyax khankix tix kaux kawx heue. Mawh kheu nan, kix hoik yaox ti yuh kaing plak sivoe simiang heue. 20Grawng pingnya cuyi mai krax pa tawng pa yung pa hoik chawk cheng simiang ti yaox ka kix, nawh hoik yaox nie lheu chix kix kao son khaing pui ting pingnya cuyi mai cao pa chix sibawk khankix khawmuik pa hoik koe ka daux haktiex pa kwang nawh khawmuik heue. 21Mawh kheu nan, Danyelax hoik yaox ti ot tan, tom hoek num jah simiang Kurux ti kwang ka haktiex heue.
Currently Selected:
DANYELAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012