DANYELAX 2
2
Krax Camaox Nebukhaneza
1Ka daux num kwang simiang Nebukhaneza ka haktiex ra num tix num, nawh hoik camaox mai rhawm nawh hoik kied lukliak mai nawh ang lai pon ti laig it ka jao heue. 2Khaix an simiang tawx lox tix hu sonsang kok ka pui ting pingnya cuyi khankix mai cao pa chix sibawk mai cao pa chix simeed chix sat khankix mai khawm pui Khaladie khankix hoek, sonsang krai pa camaox simiang heue. Mawh kheu nan, kix hoik hoek cung ka plak sivoe simiang heue.#Jah 41:8 3Simiang ah nin ka kix, “Aux hoik camaox tix ceu mai rhawm aux hoik kied koe krax pa khi ka sang tawng ka grawng camaox an heue.” 4Pui ting pingnya cuyi Khaladie khankix, sikah mai simiang ka plak lox ceu pui Asurix ah nin, “Kieh simiang lang ju heue. Krai siliex maix khankix mhong grawng pa camaox an kix mai ex tak sang deeh krai dee bleeh heue.” 5Simiang deeh pawk lox pui Khaladie khankix ah nin, “Grawng in aux hoik tat ti deuh phan pex ang pon krai grawng camaox mai khawm dee bleeh ka aux, tak sang gaing pex tom phawng, mai nyiex ma pex tak sang mawh pum phon heue. 6Phan pex pon krai grawng camaox an mai dee bleeh nawh pex tak pon rieb ti teei totaix khankix khaing aux mai khawm pa yaog min plakngai pa ting lhaong khankix heue. Mawh kheu nan, krai aux mhong grawng camaox mai khawm dee bleeh nawh khankix heue.” 7Kix deeh pawk lox ra bawg tix bawg ah nin, “Kieh simiang krai grawng pa camaox ka siliex tix khankix mai ex tak sang krai dee bleeh heue.” 8Simiang deeh pawk lox ah nin, “Au tawng su pex ti yuh bawg yam rheung, mawh kheu tawng pex aux hoik piawm ka camaox an heue. 9Phan pex ang pon krai grawng camaox an ka aux, krax pa keud koe ngie tix ceu son pex heue. Grawh grawng nawh, pex hoik khre tix sang krai lox pie lhen mai lox pa ang koe cee khankix ka plak sivoe aux tom hoik tieh loh bawg yam tix heue. Mawh kheu nan, krai aux mhong grawng pa camaox an mai aux tak tawng pon krai pex dee bleeh nawh khankix ka aux heue.” 10Pui Khaladie khankix deeh pawk lox simiang ah nin, “Pui pa pon krai grawng pa chawk simiang ang lai koe tix kaux kawx piang haktiex heue. Mawh kheu simiang ang ah, mai cao pa kwang ang ah, ang koe tix kaux kawx pasax mhaing grawng ceu pa awm in ka pui pa ting pingnya cuyi mai pa chix sibawk khankix ang ah mai ka pui Khaladie khankix heue. 11“Grawng pa chawk simiang in mawh pa kied nu, lheu khaing Siyiex ang koe pui tix kaux kawx pa sang pon krai ka plak sivoe simiang heue.” 12Kheu jao grawng in, simiang hoik kied song rhawm mai kied saux rhawm mai tawx gumlox sonsang yuh pui pa ting pingnya cuyi, khaing daux haktiex Babulon khankix laux leeing khawmuik heue. 13Mawh kheu nan, hoik tawx gumlox lih hu, sonsang pah ka pui pa ting pingnya cuyi khankix yum mai kix hu sawg ka Danyelax mai paox grawm nawh khankix, sonsang pah kix yum heue.
Caomaox Nebukhaneza
14Khaix an Danyelax deeh pawk tix krai lox mhawm ka Arok, pa mawh cao kaing naing cub lien pa pau simiang khankix, pa hoik lih hu ti sang pah pui ting pingnya cuyi haktiex Babulon khankix yum, 15Nawh pawk lox mai ah nin ka Arok, pa mawh cao kaing naing cub lien pa pau simiang khankix, gumlox pa tawx simiang kied phai yuh nin yuh ka mawx lie? “Khaix an Arok hoik kieh Danyelax tawng ka grawng lox pa hoik tat tix heue. 16Danyelax hu laig ka daux nyiex haw mai rawg mhaing bawg yam ka simiang, sonsang pon krai dee bleeh grawng camaox an ka simiang heue. 17Khaix an Danyelax deeh ing ka dee ot tix mai krai grawng in ka Hananix, Mishielax mai Azariyax, pa mawh paox grawm nawh khankix, 18sonsang rawg mhaing kix krax caux rhawm ka Siyiex piang raoma, sonsang plak jhi grawng pa raux mox in mai son ang Danyelax mai can paox grawm nawh khankix pon tix laux leeing tau mai pui pa ting pingnya cuyi ka daux haktiex Babulon pa kawn deuk an khankix heue. 19Grawng pa raux mox in, hoik plak jhi kieh Danyelax yaox riang susai ka daux pon sawm heue. Mawh kheu nan, Danyelax hoik yaogyaw bwanson ka Siyiex piang raoma heue. 20Danyelax ah nin, “Kieh ceu kaux Siyiex mawh pa koe bwanson leeing ju heue. Grawh grawng nawh, pingnya cuyi mai riang rao sibrawm mawh cie Nawh Cao heue. 21Nawh Cao tieh loh ka bawg yam mai khawm ka praix klawng khankix, Nawh Cao gah ti tik simiang mai pa yaog ti deuh simiang khankix, Nawh Cao tawx pingnya cuyi ka pa koe pingnya cuyi mai krax tawng ka pui an kix pa koe krax lhak lhiem heue. 22Nawh Cao hoik jhi ceu pa raux mox khankix, Nawh Cao tawng ka ceu pa koe ka daux pa faik mai pa riang ot ka daux Nawh Cao heue. 23“Siyiex keeing aux khankix eue, aux ting bwanson ka Maix Cao mai yaogyaw ka Maix Cao heue. Maix Cao hoik tawx aux koe pingnya cuyi mai riang rao sibrawm khankix mai hoik kieh aux tawng ka ceu pa rawg mhaing ex ka Maix Cao heue. Grawh grawng nawh, Maix Cao hoik kieh yix tawng ka grawng ceu pa chawk simiang heue.”
Danyelax Krai Grawng Camaox
24Mawh kheu nan, Danyelax hu ka Arok, pa mawh pui pa hoik tawx simiang beeh glawm pa sang yuh pui ting pingnya cuyi haktiex Babulon khankix laux leeing, ah nin ka nawh, “Paw yuh pui ting pingnya cuyi haktiex Babulon khankix laux leeing liak. Viex aux hu ka plak sivoe simiang mai aux tak sang krai simiang mhong dee bleeh grawng pa camaox an heue.” 25Khaix an Arok nied ti viex Danyelax hoek ka plak sivoe simiang mai ah nin ka nawh, “Aux hoik yaox pui tix kaux khaing daux pui pa giex laung ceu pui Yudax pa mawh pui pa tak sang pon krai simiang mhong ka dee bleeh grawng camaox an heue.” 26Simiang deeh ah nin ka Danyelax, pa hoik kok ceu kaux mawh Delatashaza heue. “Mawh pon krai maix aux mhong grawng pa caomaox pa hoik yaox aux mai khawm dee bleeh nawh lie?” 27Danyelax deeh pawk lox ka plak sivoe ngai simiang ah nin, “Grawng ceu pa raux mox pa hoik chawk maix simiang khankix pui ting pingnya cuyi khankix, cao pa chix sibawk, cao pa chix jhak lai taix mai cao pa chix tawng singaix pa sang hoek khankix ang pon krai grawng ankix ka simiang heue. 28“Mawh ngie Siyiex piang raoma tix kaux khaing pa pon plak jhi grawng pa raux mox an khankix mai Nawh hoik jhi simiang Nebukhaneza tawng ka ceu pa tak sang lih ti koe ka daux singaix pa sang hoek khaix in heue. Grawng pa camaox maix mai riang susai pa koe daux dong maix piang dee it maix hoik awm inkix heue.” 29“Simiang eue, phan mawh pa keud maix grawng pa tak sang hoek yam kawn ot maix piang dee it tix mai Nawh Cao hoik plak jhi ceu pa raux mox khankix mai hoik jhi maix tawng ka grawng ceu pa tak sang lih ti koe khaix in heue.” 30Phan mawh ka son aux grawng pa raux mox in hoik plak jhi ka aux, mawh kheu nie lheu koe pingnya cuyi aux khaing can ceu pa im ju khankix khawmuik ang mawh, hoik mawh sonsang kieh simiang tawng ka dee bleeh grawng pa camaox an mai krax keud maix ka rhawm tix heue.” 31Simiang eue, maix hoik camaox ti yaox riang grang pa ting tix mu, pa kied ting lhaong, pa kied pruh riang mai an hoik jung ti ot ka plak sivoe maix mai grang pakpeung nawh mawh pa koe krax pa lhat kah heue. 32“Kaing riang grang in mawh khri ceu pa mhawm, naok nawh mai plawng taix nawh mawh mau, vaig nawh mai nyoi nawh mawh tawng lheung, 33ba nawh mawh rhiem mai caong nawh mawh rhiem tix plak mai tiex tix plak heue. 34Yam jhak maix lon simaox tix lon pa ang pui yuh ka taix tix lih dheem piang caong riang grang an, pa mawh rhiem tix plak mai tiex tix plak pot phawng heue. 35Khaix an rhiem, tawng lheung mai mau khri khankix hoik phawng tix max tau mai hoik lih ti awm grhip nghox khaing daux biang pauh pui nghox daux bawg yam rung mai bhaung hoik phlu khankix luan tom ang lai yaox rhoi heue. Lon simaox pa hoik dheem riang grang an hoik lih ti mawh gawng pa ting lhaong tix mu mai hoik naog piang haktiex khawmuik khawm leeing heue. 36“In mawh grawng pa camaox maix heue. Yam in, yix tak sang krai dee bleeh grawng pa camaox an ka plak sivoe simiang heue. 37Simiang eue, maix mawh simiang piang simiang khankix heue. Siyiex pa ot piang meung raoma, hoik tawx maix cie meung haktiex khawm siawp sibrawm mai riang rao pa ting lhaong mai min pakngai khankix, 38mai kawn pui khankix pa ot dee mawx ang ah, totiag piang haktiex mai sim daux raoma khankix ang ah, Nawh Cao hoik tawx an kix ka daux tawm taix maix mai hoik kieh maix kwang piang ankix khawmuik heue. Maix tom mawh kaing khri an heue. 39Khaix maix meung tang meung tak sang yaog tix deeh kaoh tix meung khaix an, meung pa ang awm maix, pa mawh meung tawng lheung an loe meung tix meung tak sang lih ti koe mai tak sang kwang piang haktiex khawmuik heue. 40Meung pon meung tix meung tak sang awm rhiem pa kiien mai awm krax pon kieh rhiem ceu an khankix pot tix max mai phawng, meung an tak sang yuh laux mai phawng yuh meung tang dah khankix khawmuik heue. 41Ka dee hoik yaox maix caong mai gien caong khankix pa mawh tiex glaox pa shiao cao pa yuh aw tix, tix plak mai rhiem tix plak, meung an tak sang mawh pa gwieh tix hu heue. Viang mawh nan, krax pa kaux cong rhiem tak sang kawn koe ka daux nawh awm hoik yaox maix klu klao rhiem tix mai tiex glaox tau heue. 42Awm hoik mawh giien caong an khankix rhiem tix plak mai tiex glaox tix plak, awm an meung an tak sang mawh pa kaux cong tix plak mai pa chix max chix laux leeing tix plak heue. 43Awm hoik yaox maix ka hoik klu klao rhiem tix tau mai tiex glaox, kix tak mawh pa klu klao tix tau mai pui tang ceu khankix mai kix tak ang pon neuex tix ot tau mai paox tix, awm ang rhiem chix neuex tix tau mai tiex glaox heue. 44Ka daux baux ju singaix simiang inkix, Siyiex piang raoma tak sang yaog tix pang meung pa tak ang chix koe krax laux leeing tix meung mai meung an tak ang lai mawh pa prah tix ka daux pui tang ceu khankix heue.Meung in tak sang yuh laux leeing mai phawng yuh meung ankix mai nawh tak kaux cong leeing ju heue. 45Awm pa hoik yaox maix mawh lon simaox tix lon pa hoik lih khaing gawng ka pa ang yuh ka taix tix mai lon simaox an hoik dheem rhiem, tawng lheung mai tiex glaox, mau mai khri khankix phawng, Siyiex pa ting lhaong, hoik jhi simiang tawng ka ceu pa tak sang bleeh tix hoek khaix in heue. Grawng pa camaox in rug mawh tete mai dee bleeh nawh khankix kawx mawh pa mawh meh tete heue.”
Ghaok Ara Danyelax
46Yam an, simiang Nebukhaneza, gup ti krub ka Danyelax mai tawx lox tix sonsang yuh kix tix tawx krax tan mai nyawng bhawng ka son nawh heue. 47Simiang deeh pawk lox ka Danyelax ah nin, “Siyiex maix mawh Siyiex piang Siyiex khankix tete mai mawh Siyiex piang simiang khankix mai cao pa plak jhi ceu pa raux mox khankix, mawh kheu maix hoik plak jhi ka ceu pa raux mox in heue.” 48Khaix an simiang hoik ghaok Ara Danyelax mai hoik tawx totaix ceu pa ting lhaong khankix tom nie mai hoik kieh nawh mawh cao pa kwang piang baoh haktiex veng Babulon khankix khawmuik khawm leeing mai mawh cao kaing ting pa kwang piang pui pa ting pingnya cuyi haktiex veng Babulon khankix khawmuik heue. 49Danyelax deeh khyox khaw lox ka simiang mai nawh hoik yaog ti deuh Shadariet, Meshak mai Abedanego, khankix kwang ka piang kaing jhaw haktiex veng Babulon khankix heue. Viang mawh nan, Danyelax hoik yaox ti ot ka daux nyiex haw simiang heue.
Currently Selected:
DANYELAX 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012