TITUX 3
3
Kaing Yuh Kawn Khrit
1Kieh kix doh keud kah, sonsang chix ot kix greem simiang giex kaing, pa koe sibrawm khankix, son sang koe krax chix cu chix nghiet, sonsang rien tix ka son kaing pa mhawm ku ceu. 2Son ang sang ah lox caox ka grawng pui tix kaux kawx, son ang sang simah, son sang koe rhawm pa mhawm, son sang plak jhi rhawm pa awn pa tiem ka pui khawmuik heue. 3Ex kawx hoik sax mawh pui pa daox aw tix bawg, pa ang chix cu nghiet, pa hoik pie lhen kah, pa hoik yuh son alo nex nham mai krax gaux rhawm ku ceu, ot ka daux pa nieb keud ti yuh pui laux, pa boh rhawm, pa chix koeng, koeng ka paox tix, tix kaux lai tix kaux heue. 4Yam lih bleeh krax moh ceu pa mhawm rhawm Siyiex Cao Taoh ex, ka kawn pui. 5Ang mawh kheu pa hoik yuh tokaux ex ka daux pa rahsee, mawh kheu pa caux rhawm Nawh, Nawh hoik taoh ex, ka pa sigrhah pa dex dawd mai ceu pa deeh keh, ka Khuan Singax Singeh deeh kieh mawh pa khraox, 6pa hoik prauk Nawh Cao lih ka piang ex tom nie grum, ka daux Yesux Khrit Cao Taoh ex, 7son sang hoek ex ka krax rahsee kheu bwanson Nawh, son sang mawh ex pui pa sang pon sin, pa khaw mai krax keud pot jun pot son ju leeing ju heue. 8Lox in mawh pa kaux sijax, aux simie ti kieh maix sidiex grawng ceu in khankix mawh pa lung pa loi, son pui pa hoik yum rhawm ka Siyiex khankix, tak rien rhawm tix, yuh kaing ceu pa mhawm heue. Ceu in khankix mawh pa mhawm mai pa koe bwanson son kawn pui heue. 9Via hu khaing lox chawk pa daox aw, ka grawng doeh ru pa ang jud jai khankix, pa simah simiang, pa thung thiang ka grawng lox lai beenli, ceu an khankix mawh pa ang koe bwanson, pa giex going heue. 10Pui pa yie kieh pui ang khaw gwieh paox tix, khaix hoik sidiex nawh tix bawg ra bawg paw lai baox rieb nawh heue. 11Maix pon ti tawng grawng pui pa yuh nan hoik tieh ti lud hu khaing krax, yuh phimap, viang tokaux nawh kawx hoik deuh phimap ka tokaux tix tiru.
Lox Ghoik Pa Tawm
12Yam ploi aux Atemax, Tukhik hu ka maix, coca ti hoek ka aux ka veng Nikawpolix, #Cau 20:4; Efe 6:21-22; Kaw 4:7-8; 2Ti 4:12mawh kheu hoik bak aux ti ot tan yam kuat heue. 13Nied ti coca teem Zenax pa mawh cao gau lai beenli, Apawlux, #Cau 18:24; 1Kaw 16:12son krax sang hu kiex, son ang kiex lai sang cud tix ceu kawx heue. 14Kieh pui ex khankix gau ti yuh ceu pa mhawm jheung jheung, son sang koe pa shiao kix, son ceu pa lo khankix, son ang kix sang mawh pa ang plix plix heue. 15Can pui pa ot mai aux khawmuik nawb ka maix heue. Nawb ka kix pa moh ka ex daux krax yum rhawm awx. Kieh bwanson ot mai pex khawmuik liak.
Currently Selected:
TITUX 3: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012