LOX KAB 31
31
Lox Sidiex Lemoelax
1Phan mawh lox pa sidiex gau miex simiang, Lemoelax ka kawn simex ti ah nin, 2kawn simex aux eue, khex yuh ka mawx? Kawn simex pa keh aux eue, khex yuh ka mawx? Kawn simex aux, pa keh mai pa dex dawd mai sijax mukheu eue, khex yuh ka mawx? 3Paw tawx riang rao maix ka bun khankix, paw lai tawx krax keud ka pui pa sang yuh simiang khankix laux. 4Lemoelax eue, simiang mai kawn simiang khankix, ang khaw tix nyaux rawm plix siiet mai plai ceu pa chix yoek heue. 5Lhat kix tak nyaux mai piawm ka lox tawm beenli mai prawng ca pa ang khaw ang jiet ka pui hot sibhawm khankix heue. 6Tawx plai ka pui pa sang dex hoek krax laux leeing mai tawx rawm plix siiet ka pui pa koe krax khi rhawm heue. 7Kieh kix nyaux, sonsang piawm kix ka pa hot sibhawm mai ceu pa khi rhawm heue. 8Ot plak pui daox pui aw mai teem ka pui pa ang koe dee deuh rhawm khankix heue. 9Ang moing tix mai teem prawng rahsee ka pui hot sibhawm mai pui pa cud cha khankix awx.
Bun Pa Mhawm Been
10Pui mawx pa yaox ka bun pa grum naog ka been pa rahsee, bun pa yuh nan, nie lheu ngawh khaing siang raoh pa mhawm heue. 11Mex nawh deuh rhawm ka nawh mai ang koe krax khi rhawm heue. 12Moeng pa yuh nan, nawh chix priex ka mex tix mai chix yuh ceu pa mhawm ka mex tix tom sidah ju tix heue. 13Nawh sawg hauk yung mai tai, yuh kaing taix tix heue. 14Nawh awm reu pui yuh lai pa chix viex pa ih khaing dee singai heue. 15Nawh kaoh caocao, tom ang praix nyang riang mai khre tix tawx pa ih, ka kawn praix daux nyiex ma mai bun siliex khankix heue. 16Nawh chix keud chix gau mhawm mhawm mai liag ma kaung mai mau pa pon nawh, chix khre chix cox ka sipeem plix siiet tix heue. 17Nawh nhawt maox rawd nyoi tix cong mai kieh taix tix cong phai heue. 18Nawh tawng kaing pa yuh tix mawh pa mhawm mai nawh ang kieh kawk ngu tix yeet leeing sawm. 19Taix nawh giex kong mai kling mawh keei heue. 20Nah taix tix ka pui hot sibhawm mai nyeu plawng taix tix tawx ka pui pa cai rhawm, pa siya khankix heue. 21Viang rawm rha lih kawx, nawh ang khi rhawm son kawn praix daux nyiex ma, grawh grawng nawh, hoik koe kraung ceep pa raoh pa si u hoik koe son kix khawmuik heue. 22Nawh taing prux son tix mai ceep kraung man raoh rawt pa mhawm heue. 23Mex nawh kawx, ngawm tau ka diang siviex veng mai pui haktiex pa mawh pui ting khankix heue. 24Nawh chix taing tix coh ka man pa mhawm heue. Coh maox rawd nyoi ka pui yuh lai gee khankix heue. 25Man pa taing nawh mawh pa kaux mai jiet mhawm grang, mawh kheu nan, nawh tak sang koe krax gaux rhawm son bawg yam bawg phao khaix heue. 26Nawh chix ah lox pa koe pingnya mai jheeh nawh chix ah lox been krax moh krax rhawm pa rahsee heue. 27Nawh chix kia ngien ka jhawm yuh kawn praix daux nyiex tix, nawh ang ih pa ih ceu pa chix kieh nieh. 28Kawn simex, kawn bun nawh khankix kaoh mai chix nawb bwanson ka miex tix heue. 29Mex nawh kawx, ka daux bun tom nie maix hoik yuh pa mhawm, lheu khaing an maix nie lheu yuh khaing kix khawmuik mai yaw nawh yuh nan heue. 30Ceu pa mhawm chix dia mai: pa pie lhen, pa mhawm grang mawh pa giex going, phan mawh bun pa lhat graung ka Siyiex, tak pon pa yaogyaw heue. 31Bun pa yuh nan, tawx ngawh riang ka kaing pa yuh nawh, kaing pa yuh nawh, kieh min plakngai nawh sidawng ka diang siviex veng heue.
Currently Selected:
LOX KAB 31: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012